Sy het baie skuld op haar kredietkaart en ander ­lenings en kan skaars die minimum betalings elke maand bekostig, skryf ’n leser.

Haar vriende raai haar aan om skuldkonsolidasie te beproef, maar sy het vrae oor wat die proses behels. En is daar nie beter alternatiewe nie?

Ons kyk hoe dit werk en waarvoor jy moet oppas.

1. HOE WERK DIT?

Mense wat sukkel om ’n klomp verskillende lenings of skuldrekenings te betaal, kan skuldkonsolidasie oorweeg.

Dit beteken gewoonlik jy vra jou bank een lening wat groter is as al jou skuld saam. Dit staan bekend as ’n konsolidasielening. Met die geld van dié lening betaal jy dan al jou ander skuld op een slag af.

Dit klink dalk soos skuld maak om skuld te betaal, maar as jy dit reg doen, kan dit vir jou werk.

As jy die laagste moontlike rentekoers kry en die terugbetaling van jou konsolidasielening vir oor ’n gunstiger tydperk reël, behoort jou maandelikse betalings minder te wees as wanneer jy ’n klomp verskillende skuld sou moes betaal.

Dit is ’n lening waarvoor jy nie sekuriteit hoef te voorsien nie; dus loop jy nie gevaar om ’n belangrike bate soos jou huis te verloor nie. Daar kan wel vereistes wees, byvoorbeeld dat jy ’n sekere minimum inkomste moet verdien.

2. WAT IS DIE VOORDELE?

  • Die afbetaling van jou skuld is eenvoudiger omdat jy net een lening delg. So help dit jou ook om beheer oor jou skuld te neem.
  • Jy kan diensfooie verminder omdat net een maandelikse diensfooi betaal word.
  • Jy kan jou kontantvloei verbeter as die gekonsolideerde maandelikse afbetaalbedrag kleiner is as wat al jou skuld andersins sou gewees het.
  • Jy kan sekere skuld, byvoorbeeld jou kredietkaart, waar­skynlik vinniger afbetaal omdat konsolidasielenings gewoonlik binne ’n spesifieke tydperk afbetaal moet word.
WENK: Sodra jy finansieel sterker is, moet jy probeer om jou maandelikse terugbetalings te verhoog sodat jy die lening gouer kan delg. Maak net seker dat jy nie ’n boeteheffing sal moet betaal as jy jou skuld vroeër aflos nie.

WAARVOOR MOET JY OPPAS?

  • Maak seker die maandelikse afbetaalbedrag vir die nuwe konsolidasielening is laer as die somtotaal van al jou afsonderlike skuld. Jou kontantvloei moet liefs verbeter.
  • Jy moet uitwerk of die konsolidasierekening op langtermyn nie meer sal kos as wat die skuld op al jou ander lenings saam sou kos nie. As dit oor ’n te lang tyd gerek word, is die kans goed dat jy meer sal betaal.
  • As jy die koste van die konsolidasieskuld uitwerk, moet jy nie net in die rentekoers vaskyk nie; kyk ook na aanvangs- en diensfooie en versekering.
  • Moenie net die geld gebruik as ’n aanvulling tot jou huidige skuld nie; gebruik dit om al jou kleiner skuld te vereffen.

SAL JY GELD BESPAAR?

Die koste aan ­administrasie, debietorders en versekering behoort laer te wees. Maar jy sal net op die duur spaar as die rentekoers van die nuwe lening laer is as die ander rekenings s’n en as jy dit nie oor ’n te lang tydperk rek nie.

WATTER ALTERNATIEWE IS ­BESKIKBAAR?

  • Praat met jou krediteure: Hulle kan jou tegemoetkom deur die leningstermyn te rek of jou ’n betaalvakansie te gee. Jy moet eindelik alles betaal, asook die rente wat die skuld oor daardie tydperk getrek het, maar dit kan jou ’n blaaskans gee.
  • Betaal duur skuld eerste: Dis veral krediet- en winkelkaarte, waarvan die rente hoog is. Sluit dan daardie rekenings. As jy ’n kredietkaart wil behou, betaal elke maand dit wat jy bestee ten volle af. As die kredietverskaffer jou nie tegemoetkom nie, kontak die Nasionale Kredietreguleerder vir ’n lys van geregis­treerde skuldberaders.
  • Kyk wat jy kan teruggee: Ingevolge artikel 127 van die Nasionale Kredietwet kan jy goedere wat deur ’n gese­kureerde lening of paaiement­ooreenkoms gekoop is aan die kredietverskaffer terugbesorg as jy dit nie meer kan bekostig nie. Jy moet skriftelik kennis gee en die ooreenkoms beëindig. Die krediteur moet dan die item verkoop om sy geld terug te kry. Kry hy nie die volle oorspronklike bedrag daarvoor nie, moet jy steeds die res betaal.
  • Jou huisverband: Jy kan dit vergroot of kapitaal wat jy reeds daarop betaal het, gebruik om jou ander skuld te betaal. Dan het jy net een groot lening (jou huisverband) met ’n laer rentekoers en een stel adminfooie. Wees versigtig: As jy nie jou groter huisverband kan betaal nie, kan jy dalk jou eiendom verloor.
Kry hier nog raad

Die Nasionale Kredietreguleerder by ncr.org.za

Skuldraadgewers by debtbusters.co.za of debtsafe.co.za

Finansiële adviseurs by fpi.co.za of fia.org.za