Die kort antwoord is: Ja.

Die meeste fondse soos Discovery en Gems sal hul lede dek uit die fonds se risikovoordele. Dit beteken die fonds dra die koste en trek dit nie van jou daaglikse voordelebedrag af nie.

Maar daar is natuurlik voorwaardes.

Hier is die antwoorde op sewe belangrike vrae.

1. WAT GEBEUR AS MY TOETSUITSLAG POSITIEF IS?

As jy positief toets vir COVID-19, moet jy jou dokter en mediese fonds onmiddellik daarvan laat weet.

  • Jou fonds sal die koste van die toets dek.
  • Die dokter sal behandeling voorskryf volgens die erns van jou simptome. Die meeste fondse dek die behandeling uit hul eie risikogedeelte en nie uit jou daaglikse voordele nie.
  • Gewoonlik moet jy ’n dokter of hospitaal op jou mediese fonds se voorkeurlys gebruik omdat fondse met dié dokters en hospitale oor vaste tariewe onderhandel. Dit kan privaat hospitale en spesialiste insluit en is nie minderwaardig nie. Voorkeurmedikasie is meestal generies (goedkoper).
  • As jy positief toets, maar nie siek is nie, sal sommige fondse die koste vir simptomatiese behandeling dalk van jou daaglikse voordelebedrag aftrek. Die toets behoort steeds deur die fonds gedek te word.

2. WAT AS DIE TOETS NEGATIEF IS?

As die diagnose negatief is, word die toets- en dokterskonsultasie van jou daaglikse voordele afgetrek en nie deur die risikovoordeel betaal nie.

As jy ’n hospitaalplan met ’n spaarvoordeel het, kan die koste van die negatiewe toets uit jou spaarvoordeel kom.

3. MOET EK EERS BETAAL EN DAARNA VAN MY FONDS EIS?

Dit sal afhang van die dokter of kliniek wat jy gebruik. Sommige sal vereis dat jy as pasiënt direk betaal, wat beteken jy moet dit dan self later van jou fonds eis.

Ander diensverskaffers sal die rekening reguit aan jou mediese fonds stuur.

As daar in die laasgenoemde geval enige bybetalings vir jou eie sak is, sal jou fonds jou daaroor kontak.

  • As jy die eis indien voor jou toestand bepaal is, sal die fonds jou terugbetaal sodra ’n positiewe diagnose bevestig is. As jy negatief toets, sal dit gedek word uit jou daaglikse voordele. As dit opgebruik is, sal jy moet opdok.
  • Gesondheidsorgverskaffers se eise aan jou mediese fonds moet deur die regte tariefkode (ICD10-kode) vergesel word – dan weet jou fonds hoe om dit te dek. Gesondheidsorgverskaffers weet wat die kodes is, maar herinner hulle altyd daaraan.
  • Is die finale diagnose negatief, sal die koste van jou daaglikse voordelebedrag afgetrek word. As dit uitgeput is, moet jy self opdok.

4. IS EK TYDENS WAGTYE TEEN COVID-19 GEDEK?

Wanneer jy van fonds verander of by ’n nuwe mediese plan aansluit, is daar dikwels ’n wagtydperk van byvoorbeeld drie maande waarin jy tradisioneel geen of baie be- perkte dekking het.

Sekere fondse het intussen hul reëls aangepas om nuwe lede te dek wat binne die voorgeskrewe wagtyd positief toets vir COVID-19.

Maar as jy reeds positief getoets het en eers daarna by ’n mediese fonds aansluit, sal daardie fonds jou waarskynlik nie dek nie.

Wenk
Die meeste mediese fondse het nou spesifieke inligting oor COVID-19 op hul webtuistes. Baie fondse bied ook telefoonkonsultasies met hul voorkeurdokters as jy vermoed jy het die virus opgedoen sodat jy nie fisiek na ’n spreekkamer hoef te gaan nie

5. WAT VAN VERWANTE TOESTANDE SOOS LONGONTSTEKING?

Die COVID-19-infeksie kan lei tot komplikasies soos kwaai brongitis, longontsteking en selfs orgaanversaking.

Sulke toestande vereis gewoonlik hospitaalbehandeling en dit behoort deur jou mediese fonds gedek te word.

Jy sal net bybetalings hê as jy die fondsreëls ignoreer deur byvoorbeeld gesondheidsorgverskaffers te gebruik wat nie op die fondsvoorkeurlys is nie.

Enige bykomende toetse wat jou dokter laat doen, sal in die meeste gevalle gedek word as jy positief vir COVID-19 toets of uit jou hospitaalvoordele as jy reeds opgeneem is.

Dit kan gebeur dat daar bybetalings is. As jy op ’n omvattende plan is wat sulke toetse in elk geval dek, sal dit deur jou fonds betaal word.

6. BETAAL MY FONDS UIT VIR DIE TYD WAT EK IN KWARANTYN MOET WEES?

Nee, jou fonds doen nie uitbetalings omdat jy in kwarantyn is nie. Fondse dek net gesondheidsorgdienste wat spesifieke toetse en dag-tot-dag-behandelings insluit, en hospitaaldekking waar nodig.

7. HOE GEMAAK AS EK ONTEVREDE IS MET MY FONDS?

Die meeste mediese fondse het ’n aanlyn klagtevorm op hul webtuiste en ’n inbelsentrum wat klagtes oor eise hanteer. As jy ontevrede is met die hantering van jou klagte, kan jy ’n formele dispuut met jou fonds verklaar. Inligting oor die proses sal op jou fonds se webtuiste te kry wees. As dit ook nie ’n oplossing bring nie, kan jy ’n klag by die Raad op Mediese Skemas (RMS) indien. Dit is belangrik dat jy alles doen om ’n oplossing te vind voor jy jou tot die RMS wend. 

Kry hier nog raad
Geakkrediteerde mediese makelaars of die Raad op Mediese Skemas: www.medicalschemes