Die vakansiepret is nog nie eens verby nie, maar jy het ’n beursie-babbelas en die volgende betaaldag is nog ver. Hoe gemaak om al jou uitgawes te dek?

Begin deur uit te werk presies hoeveel geld jy vir die maand oorhet. Sodoende weet jy hoeveel geld per dag jy beskikbaar het. Vermy enige persoonlike lenings of nuwe langtermynskuld, want dan vererger jy net jou geldprobleme. Kom ons kyk na twee korttermynoplossings.

Oortrokke rekening 

’n Oortrokke rekening kan jou help met jou kontantvloei, mits jy dit nie gebruik om langtermynskuld te maak nie.

Dis gewoonlik op transaksionele rekenings, soos ’n tjekrekening, beskikbaar. In ’n neutedop kan jy in ’n negatiewe balans op jou tjekrekening ingaan. Die oortrokke bedrag word dan outomaties van jou salaris gedelg sodra dit in jou rekening betaal word.

Die oortrokke fasiliteit op jou rekening het wel ’n limietbedrag wat bepaal word volgens jou vermoë om die lening te delg.

Met ander woorde, volgens jou inkomste en hoeveel ander skuldverpligtings jy het. Raadpleeg jou bank daaroor.

Voordele

Met ’n oortrokke rekening sal jou negatiewe balans nie verhoed dat jou maandelikse debietorders afgetrek en oorgedra word nie. Gevolglik sal jy nie boetefooie moet betaal omdat maandelikse paaiemente nie betaal word nie.

Jy kan ook maklik aanlyn vir ’n oortrokke fasiliteit aansoek doen. Maar ’n mens kan net daarvoor kwalifiseer as jou risikoprofiel en jou vermoë om die ekstra geld terug te betaal na wense is.

Nadele

Die bank hef rente op die oortrokke bedrag en dit het geen rentevrye dae nie. Dit is duur skuld. Probeer dit vermy om jou oortrokke fasiliteit onnodig te gebruik. Sommige banke vra ’n aanvangsfooi om die gerief te begin gebruik benewens die gewone bankfooi en rente.

Kredietkaarte se rentevrae dae 

Dit kan jou in ’n krisis help of om vir goedere of dienste te betaal. Jy moet ’n vaste inkomste verdien om aansoek te doen. Jy kry op jou kredietkaart ’n limietbedrag; dis hoeveel jy op die kaart kan bestee.

Hoe beter jou kredietrekord, hoe hoër die limiet wat jy kan kry. Elke mens se limiet hang van sy kredietrekord af en ook hoeveel die bank bereid is om te gee.

Capitec Bank gee byvoorbeeld sy maksimum kredietlimiet op ’n kredietkaart as R150 000 aan.

Voordele

Kredietkaarte bied gewoonlik tot 55 rentevrye dae, wat voordelig is solank jy betyds die uitstaande bedrag ten volle in jou rekening terugbetaal.

Die rentevrye tydperk begin nie wanneer jy ’n transaksie aangaan nie, maar volgens die rekeningsiklus wat begin met die datum van jou rekeningstaat.

Die rentevrye dae begin op die eerste dag van jou rekeningstaatsiklus en eindig op die betaaldatum. Byvoorbeeld, die 30-dae-siklus van jou staat plus 25 dae tot die betaaldatum is rentevry.

As jy ’n aankoop op dag 1 van ’n siklus gemaak het, het jy 55 dae om dit af te betaal voor rente gehef word. ’n Aankoop op die tweede dag van dié siklus sal 54 dae rentevry wees.

As jy jou kredietkaartskuld betyds delg, wys jy jy is ’n verantwoordelike kredietgebruiker en reflekteer dit positief op jou kredietrekord.

Nadele

Die rentekoers op kredietkaarte is baie hoog. As jy nie betyds die uitstaande bedrag betaal nie (dit sal op jou bankstaat staan, asook die datum wanneer dit inbetaal moet word), betaal jy dadelik rente.

Onthou jy moet die hele bedrag, nie net die minimum afbetaling nie, teen die aangeduide datum betaal.

Die rentevrye dae geld gewoonlik net vir toonbankaankope. Brandstofaankope en kontantonttrekkings of -oordragte uit jou kredietrekening trek onmiddellik rente. 

Dit verskil onder verskaffers, maar kredietkaarte het ook maandelikse administrasiegelde (en dikwels heffings) vir laat betalings, kontantonttrekkings en balansoordragte.

Vra jou bank om alles vir jou te verduidelik. Omdat dit so maklik is om jou kaart te gebruik, gebeur dit dikwels dat mense baie vinnig skuld maak.

Gebruik verkieslik net jou kaart vir belangrike uitgawes en delg dit in die rentevrye tydperk. 

Kry hier nog raad