Die uitdaging is om dit reg te bestuur. Hier is raad.

“Suid-Afrikaanse huishoudings voel duidelik die knyp weens verbruikersinflasie se jaar-tot-jaar-verhoging van 4,6 persent in Julie 2017, volgens Statistiek Suid-Afrika. Dit maak dat baie hulle wend tot betaaldaglenings teen hoë rentekoerse,” sê Shirley Smith, uitvoerende hoof van Old Mutual Finansies.

“Die aangaan van ’n groot hoeveelheid skuld is ’n maklike strik om in te trap, en dit het ’n verwoestende uitwerking op jou finansiële welstand. Mense moet verstaan dat skuld bestuur en onder beheer gebring moet word. Om van Pieter te leen om Paul te betaal, is nie ’n slim manier om jou geldsake te bestuur nie.”

Werkende stedelike Suid-Afrikaners gebruik gemiddeld 16 persent van hul maandelikse inkomste om skuld af te betaal, sê sy.

“Dit is besonder hoog. Die feit dat die syfer oor die afgelope ses jaar dieselfde gebly het, is kommerwekkend, want dit wys ons is in werklikheid in ’n herhalende siklus van skuld vasgevang en bestuur nie ons geld behoorlik nie,” verduidelik Shirley.

Volgens haar is nie alle skuld sleg nie. Party skuld maak goeie finansiële sin. “Noodsaaklike langtermynskuld, soos ’n huis, motor of studentelening is aanvaarbaar wanneer dit doeltreffend bestuur word. Die probleem kom wanneer jy gereeld ’n onbeheerbare hoeveelheid skuld aangaan. Dit is noodsaaklik dat jy duur korttermynskuld, soos kredietkaarte of winkelrekeninge, vermy of verminder,” verduidelik Shirley.

Bestuur so jou skuld doeltreffend:

  • Doen jou maandelikse skuldbetalings betyds. Selfs ’n betaling wat net 24 uur laat is, kan sleg vir jou kredietgradering wees.
  • Betaal minstens die minimum premie wat vereis word.
  • Indien moontlik, betaal meer as die minimum betaling op rekenings om jou kredietstatus verder te verbeter.
  • Betaal jou “duurste” skuld eerste af. Dit is gewoonlik dié met die hoogste rentekoers, soos klere- of meubelrekeninge.
  • Sluit rekeninge wat jy nie gebruik nie. Kredietverskaffers beoordeel die volle fasiliteit van die kredietooreenkomste op rekord, al word dit nie gebruik nie.
  • Moenie ’n aanmaningsbrief of enige kommunikasie van jou krediteure af ignoreer nie. Wees altyd pro-aktief en doen gepaste stappe deur jou krediteur te kontak om ’n terugbetalingsplan te bespreek as jy nie jou verpligtinge kan nakom nie.
  • As jy eenvoudig nie betalings op al jou uitstaande rekenings kan maak nie, praat met ’n skuldberader wat namens jou hersiene bepalings sal beding om jou uitstaande skuld te delg.

“Deur hierdie eenvoudige stappe te doen om jou skuld te verminder en bykomende onnodige skuld te vermy, sal jy minder aan rente bestee en meer geld vir doelwitte soos ’n gerieflike aftrede kan spaar of belê,” sluit Shirley af.

Vir nog inligting oor doeltreffende bestuur van jou finansies, besoek Old Mutual vandag.