1. Hoe gebruik jy gewoonlik jou foon, en wat kos dit jou?

Sommige mense betaal vir ’n groot dataplan, maar gebruik min daarvan. Ander moet weer gereeld ekstra data teen duur buitebondelpryse aankoop. 

Jou diensverskaffer behoort ’n selfoonapp of web­tuiste te hê waar jy geregistreer is en jou maandelikse verbruik kan nagaan: getal oproepe, SMS’e, data, MMS’e, hoeveel ekstra data of lugtyd jy aankoop en wat dit kos.

Gewapen met hierdie inligting kan jy vergelyk wat verskillende diensverskaffers en planne jou kan bied. 

2. Is vooraf­betaalde ­dataplanne goedkoper as kontrakte?

As jy ’n kontrakplan met ’n foon neem, betaal jy oor die kontrak­tyd ook die foon af; daarom is die kontrak duurder as net ’n suiwer sim-dataplan of voorafbetaalde plan. Maar voorafbetaling is gewoonlik net goedkoper as jy reeds ’n afbetaalde foon het of ’n nuwe foon kontant koop. Min mense kan duisende rande kon­tant betaal vir ’n slimfoon.

Maak somme. Om jou foon as deel van ’n inklusiewe kontrakplan af te betaal kan dalk goedkoper wees as om ’n voorafbetaalde plan te kry én nog skuld vir ’n toestel te maak. 

3. Maak seker jy verstaan die kontrak se fyn druk

Die diensverskaffer se agent moet verduidelik presies hoeveel jy maandeliks sal betaal, met BTW ingesluit. Vra of jy bykomende data of punte ingevolge ’n lojaliteitsprogram sal verdien. 

En stel vas of jy tydens die kontraktydperk kan op- of af­gradeer. Met ander woorde, of jy na ’n ander lugtyd- of dataplan kan verander as die behoefte ontstaan. 

Daar is gewoonlik nie ’n administratiewe koste as jy na ’n duurder dataplan wil opgradeer nie. Afgradering na ’n goedkoper plan kan dalk ’n eenmalige fooi behels. (Byvoorbeeld as jy ’n foon ontvang het op jou huidige plan, maar dié foon is nie op die goedkoper plan beskikbaar nie.) 

4. Pas die foon jou behoeftes?

Die kontrak lyk dalk goedkoop, maar die toestel frustreer jou. Wat wil jy daarmee doen? As jy graag flieks stroom, benodig jy dalk ’n groter skerm. Deel jy graag foto’s in die sosiale media, is ’n kamera belangrik. Beproef die toestelle voor jy ’n besluit neem, sê Jacqui O’Sullivan, MTN SA se kommunikasiehoof. 

5. Hoe goed is die diensverskaffer se netwerk­dekking?

Dit help nie om slim te kies wat dataplanne en fone betref en dan is die netwerk­dekking in jou gebied swak nie. Die gehalte van dekking hang af van hoeveel die diensverskaffer in die ontwikkeling en instandhouding daarvan belê. 

Toets die diensverskaffer se seinsterkte in die gebiede waar jy woon en werk. MTN, Cell-C en Vodacom het geografiese “netwerkkaarte” op hul webtuistes.

6. Sal die nuwe ver­skaffer goeie diens lewer? 

Swak kliëntediens is een van die grootste redes dat mense van diensverskaffer verander. Is jy tevrede met hoe die nuwe diensverskaffer tot dusver jou navrae hanteer het? 

Kyk of daar goeie aanlyn dienste is, of die winkeldiens goed is en of jou rekening eenvoudig en verstaanbaar uiteengesit sal wees, sê Jacqui. En hoor by kollegas en vriende hoe hulle die diensverskaffer ervaar. 

7. Wat van my kontrak as ek skuif?

  • As jou kon­trak nog nie verval het nie: Ingevolge die Wet op Verbruikersbeskerming moet jy 20 werkdae kennis gee dat jy jou kontrak voor die vervaldatum wil beëindig. Die diensverskaffer mag jou ’n kansellasiefooi vra. Hoe nader jy aan die einde van jou kontrak is, hoe kleiner is dié fooi. As deel van die fooi betaal jy die balans op die selfoon af.
  • As jou kontraktydperk verstryk het: Jy moet dit amptelik kanselleer, anders hou dit aan loop van maand tot maand. Die kontrak mag nie sonder jou toestemming weer vir ’n vaste tydperk vasgemaak word nie. 
Waarom Suid-Afrikaners van selfoonplan verander
  • 39% van Suid-Afrikaners skuif vir ’n beter internetplan. 
  • 31% skuif vir beter netwerkdekking, betrou­baar­heid en ­spoed. 
  • 29% skuif weens swak kliëntediens. 
  • 28% skuif vir billiker foon­pryse en paaie­mente.

Bron: Deloitte Global Mobile Consumer Survey 2017: The South African Cut 

Kom neem deel aan die gesprek

Volg Huisgenoot op InstagramTwitterFacebookWhatsApp en teken gerus in op ons nuusbriewe.