Voorsorg voorkom nasorg, lui die spreekwoord – en dis wat mediese skemas ál meer probeer doen om ernstige mediese toestande en die koste daarvan hok te slaan.

Want hoe vroeër siektes gediagnoseer word, hoe beter kan dit bestuur word. 

Ons kyk na die verskeie opsies en watter skanderings en toetse dikwels uit die risikodeel van die skema betaal word; dit beteken die skema dek die koste en verhaal dit nie uit die spaardeel nie.

1. KAPITASIE-OPSIES

Die maandelikse premies van dié opsies word volgens die lid se maandelikse inkomste bepaal, maar dit word gewoonlik beperk tot lede in die laer inkomstegroep, byvoorbeeld ’n hooflid met ’n bruto maandelikse inkomste van minder as R9 000.

Kapitasie-opsies bied minder gratis voorsorgtoetse as die omvattender opsies. By ­party skemas bied die kapitasie-­opsie geensins gratis voorsorgvoordele nie.

Wanneer hulle dit wel bied, kan dit soos Discovery se KeyCare Plus die volgende insluit*:

  • ALGEMEEN PER LID PER JAAR

Toetse vir MIV, bloedglukose, bloeddruk, cholesterol en liggaamsmassa-indeks (LMI) word gedek; dis gewoonlik een van elke toets per lid per jaar, maar jy moet dit met jou skema bevestig. 

  • VROUE

’n Mammogram elke twee jaar en ’n Papsmeer elke drie jaar 

  • MANS

’n Jaarlikse prostaattoets. 

Kinders Groei-assesserings­toetse wat onder meer kyk of die lengte, gewig, kopomtrek en algehele gesondheid van ’n kind tred hou met dié van sy ouderdomsgroep. 

2. HOSPITAALPLANOPSIES

Die meeste hospitaalplanne se voordele lyk dieselfde, sê Deon Heydenrych, ’n medieseskema­makelaar by Secure My Future. As voorbeeld kyk ons wat Momentum Health se Custom-opsie onder meer bied*.

  • ALGEMEEN PER LID PER JAAR 

’n Gesondheidstoets; een toets elk vir bloedglukose, bloeddruk, cho­lesterol en gloukoom; griepinspuiting, tetanus-difterie-­inspuiting en een longontsteking-inenting vir ’n hoërisikolid of ’n lid ouer as 60. 

Elke drie jaar Een DEXA-­beendigtheidskandering vir lede ouer as 50. 

Elke 5 jaar Een MIV-toets vir lede ouer as 15. 

VROUE

Een Papsmeer (die toets asook die dokterskonsultasie daarvoor) jaarliks en een mammogram elke twee jaar vir lede ouer as 38.

MANS

’n Jaarlikse prostaattoets.Kinders Baba-inentings by staatsklinieke.

3. NUWE GENERASIE-OPSIES

Dié opsies bied hospitaaldekking.

Uitgawes buite die hospitaal word ook gedek, maar uit die lid se spaardeel betaal. Sommige voorsorgvoordele word wel deur die skema self gedek.

As voorbeeld kyk ons na Bestmed se Beat 4-opsie*.

  • ALGEMEEN PER LID PER JAAR

Inenting teen griep en longontsteking, een biometriese skandering (meting van onder meer bloeddruk, cholesterol en glukosevlak) by voorkeurverskaffers; een fiksheidsassessering by ’n gekontrakteerde Basa-biokinetikus vir lede ouer as 13 en een voedingsassessering per gesin.

  • VROUE

’n Papsmeer en mammogram vir vroue van 18 en ouer elke twee jaar; HIB-inenting (teen hae-mophilus influenza-tipe B-bakterie).

  • MANS

’n Prostaatskandering elke 24 maande vir lede van 50 jaar en ouer.Kinders Inentings vir babas en jong kinders.

4. OMVATTENDE OPSIES

Lede van dié opsies geniet gewoonlik meer voorsorgvoordele as met die goedkoper opsies. Ons neem Bonitas se BonComprehensive-opsie as voorbeeld*:

  • ALGEMEEN PER LID PER JAAR

’n MIV-toets; ’n griep-inenting; ’n toets vir dikdermkanker (vir lede van 50 tot 75) en ’n skandering vir bloeddruk, glukose, cholesterol, LMI en middel-tot-heup-verhouding.

Elke vyf jaar ’n Longontsteking-inenting (vir lede bo 65); ’n beendigtheidskandering vir vroue ouer as 65 en mans ouer as 70 en ’n lipogram vir lede ouer as 20. 

  • VROUE

’n Mammogram elke twee jaar (vir lede van 40 tot 74) en ’n Pap­smeer elke drie jaar (vir lede van 21 tot 65). 

  • MANS

Een prostaattoets per jaar (vir lede van 45 tot 69).

Kinders Gehoortoets vir pasgeborenes en sifting vir aangebore hipotireose vir babas jonger as een maand.

* Hierdie skema-opsies bied ook ander gratis voordele; die bogenoemdes word net as voorbeelde genoem.

Hoe maak jy seker dit word gedek?
  • Vra of jy magtiging nodig het. As jy volgens die skema se reëls vooraf­magtiging moet kry en jy doen dit nie, kan hulle weier om te betaal.
  • Vra die skema of hulle voorkeurverskaffers het. (Dit behoort op hul webtuiste en opsie-inligtingsblaaie te verskyn.) 
  • Maak seker jou dokters verstrek die regte ICD-10-kode op hul rekeninge, anders betaal die skema dalk nie. Bel die skema voor mediese afsprake om seker te maak jy het die regte kodes om voordele te eis.