Versorging

Saood Mota, eienaar van die Beard Boys Barber Shop en versorgingsprodukte vir mans, deel sy wenke oor hoe om jou baard te versorg.

  • Die manier hoe jou baard groei, hang van jou gene af. As jou pa en oupa dus nooit gesighare gehad het nie, sal jy waarskynlik ook nie hê nie.
  • As jou baard net plek-plek groei, probeer om jou dieet te verander en kyk of dit ’n verskil maak. Indien nie, skeer dit eerder af. Dis beter om skoongeskeer te wees as om ’n kol-kol-baard te kweek.
  • Baardprodukte help om gesonde hare te handhaaf, maar sal nie hare laat groei waar dit nie van nature wil groei nie. Maar as daar stoppelbaard is, kan baardolies groei aanhelp.
  • Skrop jou vel voor jy skeer. Dit sal help om irritasie en ingroeihare te verminder.
  • Moenie gewone seep gebruik om te skeer nie, want dit kan irritasie veroorsaak. Gebruik eerder skeerrome en skeersepe wat die vel glad maak, die lem makliker oor die vel help gly en teen skeermesbrand beskerm.

VIERKANTIG

Leonardo DiCaprio (akteur)

’n Vierkantige gesigvorm word gekenmerk deur ’n sterk kakebeen wat soms breër as die voorkop is.

Leonardo DiCaprio Foto: Getty Images/Getty Images


Slim wenk
Probeer ’n sirkelvormige stoppelbaard – dit sal jou vierkantige gesigvorm se harde lyne versag. Jy kan ook ’n snor met ’n voller vertikale kenstreep probeer om die vierkantige kaak te komplementeer.


OVAAL

David Beckham (voormalige sokkerspeler)

Ovaal gesigvorms het ’n ken wat effens smaller as die voorkop is met geen harde lyne nie. Hierdie gesigvorm lyk goed met die meeste style.

David Beckham Foto: Gallo Images/Getty Images


Slim wenk
Probeer ’n stoppelbaard wat netjies gesny is om die gesigvorm te beklemtoon. Anders kan jy net ’n volle snor oor die bolip of ’n sirkelvormige baard met effens langer hare onder dra.


ROND

Scott Disick (werklikheids-TV-ster)

’n Ronde gesigvorm het gewoonlik ’n ronde en gladde ken met geen definitiewe lyne nie. Hou die hare welig aan die ken en dra ’n snor met dun kante wat met die voller baard verbind. Dit skep die illusie van ’n smaller gesig. 

Scott Disick Foto: Getty Images/Getty Images


Slim wenk
Vir diegene wat nie ’n volle baard kan kweek nie, kweek ’n vertikale strook aan die ken en om die kakebeenlyn.

REGHOEKIG

Russell Brand (akteur)

Reghoekige gesigte word gekenmerk deur ’n langer gesigvorm met ’n sterk kakebeen wat net so wyd soos die voorkop is. Dra ’n volle baard wat korter onder en langer teen die kante is om die manlikheid van die gesig te komplementeer. 

Russell Brand Foto: Gallo Images/Getty Images


Slim wenk
Hou die snor kort. Jy kan ook ’n dun strook op die ken probeer om die gesig se sterk lyne te beklemtoon.


The Bluebeards Revenge Cuban Blend Beard Oil R23
Badger Mustache Wax R200
Johnny’s Chop Shop The Ultimate Beard Shampoo R119
Johnny’s Chop Shop Beard Oil R119
The Bluebeards Revenge Post Shave Balm R350
Tweezerman G.E.A.R Moustache Scissors with Comb R300
The Hairgum Barbershop Special Beard Oil R249
Nivea Men Skin Revitaliser Shaving Gel R76,99
The Hairgum Barbershop Special Shampoo Beard R260
BaByliss For Men Rechargeable Hair/Beard Clipper R455

Vorming en skeer

STAP 1: Behandel die vel voor jy skeer deur dit te reinig en skrop.

STAP 2: As jou baard lank is, knip dit eers sodat die hare oral dieselfde lengte is. Fatsoeneer daarna jou baard met ’n snoeitoestel – dit sal vir korter hare sorg en ’n definitiewe vorm aan jou baard gee.

STAP 3: Gaan die strook op jou lem na voor jy skeer. As dit verbleik of stomp is, moet jy dit met ’n nuwe een vervang. Wend skeerroom, -jel of -seep aan aan die deel waar jy wil skeer.

STAP 4: Skeer eers in die rigting waarin die hare groei en daarna in die teenoorgestelde rigting vir ’n gladde eindresultaat. Spoel die lem af namate jy skeer om enige oortollige produkte te verwyder.

STAP 5: Wanneer jy klaar is, spoel die geskeerde deel met koel water af. Druk droog en wend naskeermiddel aan




Kry dit hier
Badger (Takealot.com); Fino 0860-254-257 (Clicks); Johnny’s Chop Shop 0800-201-170 (Dis-Chem); Nivea 0860-102-091; The Bluebeards Revenge (Takealot.com); The Hairgum Barbershop 0860-254-257 (Clicks); Tweezerman (Takealot.com)
Hoewel ons alles in ons vermoë doen om korrekte pryse te verskaf, kan foute voorkom waarvoor Huisgenoot en die verskaffers nie verantwoordelik gehou kan word nie. 

Ekstra bronne: gillette.com, gq.com, beardboys.co.za