Dis die tyd van die jaar dat ons seker die meeste tyd buite deurbring: pieknieks, see- of swembadkuiers en staptogte. Maar die hitte veroorsaak ’n hele paar velsorg- en skoonheidsprobleme. Hier is maklike oplossings vir algemene somersorge.

SONBRAND

Ongelukkig gebeur dit alte maklik in die somer.

Jy ontspan langs die swembad en vergeet om weer sonskerm aan te smeer. Nou is jy gaar gebrand en sal jy binnekort begin afdop. Smeer ’n strelende násonproduk aan al die rooi plekke.

Wanneer die rooiheid of ontsteking weg is, skilfer die vel sagkens af om van dooie velselle ontslae te raak. Gebruik ’n bevogtiger met strelende kenmerke, soos aloe vera. En onthou volgende keer die sonskerm!

SANDAALVOETE

Dis sandaaltyd, maar nou word jou voete aan vullis en son blootgestel, en gou-gou lyk hulle slordig. Gebruik ’n voetvyl of puimsteen om van droë, eelterige vel aan jou voete ontslae te raak. Gebruik dan ’n skropmiddel om klaar te speel met dooie velselle. Eindig met bevogtigende voetroom of -olie.

WENK

Wend ’n voetmasker een maal per week aan vir uitstekende ekstra bevogtiging.

AKNEE

Sweet tesame met olierige produkte, soos sonskerm, kan jou vel in die somer meer puisies laat ontwikkel. Kies ’n olievrye sonskerm met die woorde “mattifying” (gee ’n mat voorkoms) of “non-comedogenic” (verstop nie porieë nie) op die etiket.

WENK

As jy heeldag buite was, was jou gesig goed sodra jy tuiskom om ontslae te raak van die sonskerm en olie.

GRIMERING EN DIE HITTE

  • In die somer is minder meer. Swaar onderlaag sal jou taai laat voel. Kies ligter bedekking, soos BB- of CC-room.
  • As jy jou grimering heeldag wil laat aanbly, gebruik ’n basislaag of grimeringsetsproei.
  • Wat jou oë betref, kies waterbestande maskara, want dis minder geneig om te loop.