Die agtjarige Gabriel Strinta Elias ly aan die genetiese toestand wat die vorming van weefsel en ontwikkeling van bene in die gesig verander. 

Die jong seun, wat saam met sy gesin in Ceu Azul in die suid-ooste van Brasilië woon, het 21 operasies ondergaan – die eerste daarvan toe hy maar ’n paar weke oud was. 

Treachers Collins-sindroom tas een uit elke 50 000 babas wêreldwyd aan. 

In Gabriel se geval het hy met asemhaling, eet, luister en praat gesukkel. 

Volgens sy ma, Andreia (35), het haar seun “deur al die struikelblokke in die eerste paar jaar van sy lewe geworstel en wen hy bloot danksy sy persoonlikheid”. 

Andreia, ’n maatskaplike werkster en ma van drie, sê: “Gabriel is ’n wonderlike kind. Hy is baie spraaksaam en gelukkig. Hy kla nie oor die operasies nie, want hy weet elkeen maak hom beter.”

Die eerste tekens van Treachers Collins-sindroom is op 20 dae ontdek toe dokters ’n gesplete verhemelte by die baba gediagnoseer het. 

Op ses weke het Gabriel ’n trageotomie gekry. Die chirurgiese prosedure is uitgevoer om sy asemhaling te vergemaklik, want die misvorming van sy kaak het asemnood veroorsaak. 

Hy is op sewe maande uit die hospitaal ontslaan. 

Adriana sê: “Nie een van die komplikasies het verhoed dat Gabriel voluit leef nie. Hy het matelose positiewe energie."

"Ons het nie gedink hy sou loop nie, maar hy swem, ry op sy fiets, doen koeng foe, leer Engels en sien homself nie as anders as ander kinders nie.”