In hierdie droewige tyd van siekte, nood en sosiale afsondering het ons almal ’n dosis dierbaarheid nodig net om ons ’n bietjie beter te laat voel – en wat kan dan nou ouliker wees as dié twee onwaarskynlike dieremaats? 

Surya, die sesjarige meerkat, en Nice, die negejarige Chartreux, is die hedendaagse antwoord op Timon en Pumbaa en Winnie the Pooh en Piglet – pelle van verskillende spesies wat vir mekaar leef en mekaar tot elke prys sal beskerm.

Terwyl die res van ons maar net daarvan kan droom om ons beste vriende weer te omhels, bring dié twee die grootste deel van hul dag in mekaar se arms deur. Hulle bak in die son, kuier op die balkon, lê lepel en lek selfs soms mekaar se gesig.

Die twee het ’n Instagramsensasie geword met meer as 50 000 aanhangers wat hul daaglikse vriendskapsfees volg. Inperking beteken min vir dié twee, wat in Sint Petersburg, Rusland, woon.

Hul eienaar, Ekaterina Koeraewa, sê niks is vir hulle lekkerder as om saam ingehok te wees nie. Voor die coronaviruspandemie het Surya af en toe in die motor saamgery, maar nou is hy en sy katmaat elke minuut van die dag bymekaar – tot die kiets se oneindige vreugde.

Surya – kort vir Suricata suricatta, die wetenskaplike naam vir meerkatte – het in 2014 by die gesin aangesluit toe Ekaterina hom by ’n troeteldieretuin in Moskou aangeneem het. Sy was besorg oor sy lewensgehalte en wou nie hê hy moes ’n “speelding” word nie.

“As ek hom nie gevat het nie, sou sy lewe aaklig gewees het,” sê sy. “Ek het hom gered, en sedertdien is hy ’n lid van ons gesin. Ons is baie lief vir hom.” Maar niemand is liewer vir hom as Nice nie. “Hulle is altyd saam,” sê Ekaterina.

“Hulle slaap graag in ’n omhelsing. Nice is baie kalm en Suraya is baie lewendig. Hulle kom baie goed oor die weg.”

Nice was die eerste dierelid van Ekaterina se gesin. Deur die jare het sy van ’n tengerige katjie in ’n pragstuk van ’n Chartreux ontpop. Dié seldsame katte het hul oorsprong in Frankryk.

‘Hy het dit dadelik duidelik gemaak: Natuurlik is julle ook koel, ouens, maar Nice is my enigste liefde. Kant en klaar’

Al is Nice groter en ouer as Surya, is die meerkat die beskermende een van die twee. Wanneer Ekaterina gehaltetyd saam met Nice wil deurbring, moet sy ’n troetelsessie gaps terwyl Surya op die balkon in die son baai. Maar sodra die meerkat enige beweging naby sy beste maat vermoed, hol hy met ’n vaart weer in die vertrek in.

“As ek afbuk om Nice se maag te krap, begin Suri stamp, stoot en om die kat loop. Hy skop ’n groot bohaai op,” vertel Ekaterina op Instagram.

meerkat en kat
Die maats geniet dit veral om in die son te lê en bak. Hulle vang graag saam allerhande kattekwaad in die huis aan. Die twee is baie liefdevol teenoor mekaar, volg mekaar oral en slaap graag in mekaar se arms. Foto: Instagram/@meerkat_suren
meerkat en kat
Foto: Instagram/@meerkat_suren
meerkat en kat
Foto: Instagram/@meerkat_suren
meerkat en kat
Foto: Instagram/@meerkat_suren

“Toe ek hom destyds gekry het, het hy dit dadelik duidelik gemaak: Natuurlik is julle ook koel, ouens, maar Nice is my enigste liefde. Kant en klaar.”

Meerkatte is van nature sosiaal. In die natuur leef hulle gewoonlik in groepe van 20 tot 40 uitgebreide familielede. Party neem die brandwagposisie in om kywie te hou vir moontlike gevaar en die res van die groep veilig te hou.

Volgens prof. Anne Rasa, ’n natuurbewaarder wat die afgelope 20 jaar die gedrag en biologie van woestyndiere navors, is troetelmeerkatte daarvoor bekend dat hulle dieselfde gedrag toon wanneer gaste in hul huis inkom.

“Meerkatte is vriendelik wanneer hulle jonk is, maar op sowat ses maande oud kan hulle heeltemal verander in die ‘bulterriër’ van die muishondwêreld – die familie van diere waartoe hulle behoort,” sê sy.

Surya raak gewoonlik beskermend wanneer gaste dit naby haar geliefde Nice waag. “In Surya se wêreld is daar net een rede dat mense kom kuier: om die kat te steel. Surya die lyfwag is altyd aan die voorpunt, skerm vir Nice en blaas vir die kuiermense.”

Die band tussen kat en meerkat het selfs in die Russiese geïllustreerde boek Vir mekaar, ’n versameling stories oor ongewone vriendskappe, verskyn.

Die skrywer van dié boek, Kristina Kretowa, het op Surya en Nice se Instagramblad afgekom terwyl sy stories vir haar boek gesoek het.

Sy het op dié ongewone maats verlief geraak. Maar so oulik soos wat meerkatte is, is hulle nie gewoonlik die beste troetel- diere nie.

Dis in hul bloed om te grawe, en in die natuur het hulle baie plek om vir kos te snuffel en tonnels vir skuilings te dolwe. In ’n huisomgewing kan hulle meubels, matte, potplante, tuine, vloerlyste en elektriese bedrading erg verniel.

In Suid-Afrika is dit onwettig om sonder ’n permit van jou provinsiale bewaringsowerheid ’n meerkat in jou huis aan te hou.

Ekaterina doen haar bes om Surya in haar huis in Rusland gemaklik te hou. Die land se klimaat verskil baie van dié van Suider-Afrika, waar meerkatte natuurlik voorkom.

Die huis het ondervloerse verhitting en ’n spesiale sonlamp, en Surya se hok word ook verhit. Meerkatte het ’n baie dun laag pels aan hul maag wat hulle in staat stel om warm te word deur gesig na bo in die son te lê. En Surya is nie anders as sy wilde familielede nie.

Hy lê graag op die balkon of naby ’n venster op sy rug of leun agteroor om die son in te drink. En natuurlik is Nice altyd naby – soms ook op sy rug uitgestrek. Want beste vriende doen mos als saam.

EKSTRA BRONNE: INSTAGRAM.COM, BOREDPANDA.COM, SANBI.ORG, KALAHARI-TRAILS.CO.ZA, ANIMALFACTGUIDE.COM, REED.EDU