Xander Bylsma (19), Sharnelle se ekskêrel en die kleinneef van haar boesemvriendin, Marna Engelbrecht (16), wat saam met haar Saterdag 26 Mei verlede jaar in die meisieskoshuis van die Hoërskool Stella vermoor is, staan op hul albei se moord tereg.

Ronnie Hough by sy vermoorde dogter, Sharnelle (links), en haar boesemvriendin, Marna Engelbrecht, wat saam met haar vermoor is.

Woensdag was die tweede dag van die verhoor nadat Xander se eerste prokureur homself aan die saak onttrek het.

“Dit is nie maklik om daar te sit nie,” het Ronnie Woensdag ná die verrigtinge aan Huisgenoot gesê.

Die hof was Woensdag steeds besig met die tweede getuie, die privaatspeurder, Chris Saunders wat Xander van sy pa, Monte se plaas na die polisie in Vryburg gebring het.

Chris het volgens Netwerk24 se regstreekse beriggewing daarby gestaan dat hy nie vir Xander voorgesê het nie.

Adv. Niven Rai, Xander se advokaat, het egter sy getuienis, wat ook op band vasgevang is, uitmekaar probeer trek en volgehou Saunders het Xander in sy bakkie vir ’n getuienis gedruk.

“Ek het nie geweet van die bandopname nie,” sê Ronnie. “Maar ek het min of meer geweet wat daar gesê is.

Op ’n vraag of die persoonlike inligting wat ook as deel van die getuienis uitkom hom ontstel, het hy gesê niks kan dit nou erger maak nie.

Met ’n lighartige grappie te midde van die seer sê  hy: “Gelukkig is ek doof. Ek kan nie altyd als hoor nie.” 

Hy vertel al wat hy nou wil doen is om deur te druk en die saak agter die rug te kry. “Niks wat ons nou hoor kan verander dat hulle (na bewering) vermoor is nie.”

Die verhoor het Dinsdag begin met die getuienis van die staatspatoloog, dr. Tromp Els, wat Sharnelle en haar boesemvriendin, Marna Engelbrecht (16) se lykskouïngs uitgevoer het.

Els het volgens Netwerk24 getuig Sharnelle het verbete teen haar aanvaller geveg en het waarskynlik nog geleef toe sy aan die trapreling binne die koshuis gehang is.

Marna Engelbrecht (16) en Sharnelle Hough (17). Foto: Facebook

Sy was ook seksueel aktief.

Die hof het gehoor Marna is vermoedelik eerste met die handsakband, wat om haar nek gevind is, verwurg.

Huisgenoot het vroeër berig dit was ook die vermoede van Louis Hough, Ronnie se broer, wat die eerste familielid op die toneel was.

Louis moes met Ronnie se aankoms help om haar lyk van die tou af te sny. Louis het toe aan Huisgenoot vertel Marna se lyk was yskoud, maar Sharnelle se lyk was nog warm.