Vir Susan Rohde (47) het 'n versteekte Valentynsdagkaartjie haar lewe in stukke laat spat. Dit was 'n kaartjie wat deur 'n beweerde minnares aan haar man gestuur is.

Konfrontasies en 'n diepe ongelukkigheid het gevolg. Toe die internasionaal-bekende eiendomsagentskap Sotheby's in Julie 'n groot konferensie op Spier naby Stellenbosch hou, het Susan opsluit besluit sy gaan dit saam Jason – een van die maatskappy se grootkoppe – bywoon.

Hy was na bewering glad nie gelukkig daaroor nie. Hy sou verkies om die geleentheid, waartydens hy ook 'n besprekingsessie moes lei, op sy eentjie bywoon.

Maar nog voordat die konferensie, wat by tye besonder jolig was, tot 'n einde gekom het, sou 'n skokkende tragedie hom in kamer 22l afspeel toe die lyk van die lenige blonde vrou half kaal agter 'n geslote badkamerdeur gevind word . . .

Huisgenoot Ware Lewensdrama

Moenie die heruitsending op Sondagaand om 21:00 op VIA (DStv-kanaal 147) misloop nie.



Legkaartstukke van Spier se raaiseldood - deur Almari Wessels (Huisgenoot 8 September 2016)

Is sy vermoor of was dit selfdood? Terwyl nog leidrade oor Susan Rohde se afsterwe ondersoek word, maak kenners sin van die inligting wat tot dusver na vore gekom het.

Van die begin af het dit al die elemente van ’n enorme tragedie gehad. Die Johannesburgse vrou Susan Rohde, wat ondanks al haar seëninge – ’n skatryk man, pragtige dogters en ’n weelderige leefstyl – nie meer vir die lewe kans gesien het nie.

Op 24 Julie is haar lyk in die badkamer van haar en haar man se hotelkamer in die spoggerige Spier-hotel in die Stellenbosse wynlande gevind.

Op 24 Julie 2016 is Susan Rohde in die badkamer van haar en haar man se hotelkamer in die spoggerige Spier-hotel in die Stellenbosse wynlande gevind.

Susan (45) het haarself blykbaar met die koord van haar haartang gehang terwyl haar man, Jason (47), enkele meters van haar in die hotelbed lê en slaap het.

Maar binne net twee dae het dié tragedie in iets veel skokkenders verander. In ’n nadoodse ondersoek is bevind die koord is eers ná Susan se dood om haar nek gedraai.

Daarna is Jason, die grootbaas van Geffen International Realty Franchises (’n afdeling van Sotheby’s International), weens haar moord in hegtenis geneem.

Nou loop gerugte dat Susan se laaste ure eintlik allesbehalwe die idilliese lewe was wat ’n mens sou verwag.

Bespiegelings dat Jason ’n buite-egtelike verhouding gehad het, stories oor ’n laatnag-gefuif en woordewisselings in die vroeë oggendure op die luukse wynlandgoed waar hulle ’n werkkonferensie bygewoon het, het alles al in die pers gedraai.

Maar die eiendom-grootbaas (wat glo sowat R30 miljoen sterk is) hou voet by stuk: Susan is nie vermoor nie, haar geestesgesondheid was nie goed nie en sy het haar eie lewe geneem.

Die polisie is tjoepstil oor die fyner besonderhede van dié ontvouende saak, maar Huisgenoot het die legkaartstukke bekyk om sin te probeer maak van wat ons tot dusver weet.

Die oggend van 24 Julie

Reeds die dag ná Susan se dood het Jason in sy eie handskrif ’n verklaring neergepen oor wat volgens hom in daardie hotelkamer gebeur het.

Daarin skryf hy dat hy en sy donkerblonde vrou halfdrie die oggend ’n “woordewisseling” gehad het en na hul kamer by Spier gegaan het, maar Jason het toe besluit “om in ’n vriend se kamer te gaan drink.

“My vrou het my in haar nagrok en sonder skoene aan na sy kamer gevolg, waar sy geval en haar voet en die linkerwenkbrou bo haar oog gesny het.

“Ek het teruggegaan kamer toe en ons albei het gaan slaap. So om en by seweuur die oggend het ons wakker geword en sy was steeds woedend vir my. Sy het baie ontsteld gelyk.

“Sy is badkamer toe en ek het weer aan die slaap geraak. Toe ek wakker word, kon ek nie by die badkamer ingaan nie; die deur was van binne gesluit en ek kon dit nie oopmaak nie.”

Toe hy die deur eindelik met die hotelpersoneel se hulp oopkry, het hulle Susan se lyk binne aangetref.

“My vrou het die ingang versper, want sy het agter die deur gehang,” lui Jason se verklaring.

Al die kamers in die spoggerige Spier-hotel buite Stellenbosch lyk basies dieselfde en is groot en ruim met ’n dubbelbed of twee enkelbeddens.
Die badkamer het ’n stort, ’n bad en twee wasbakke.

Luidens die verklaring van speursers. Marlon Appollis, ondersoekbeampte van die Stellenbosse polisie, is Susan omstreeks 20 voor ses daardie oggend dood.

Jason is die middag terug Johannesburg toe.

Daar is heelwat onbeantwoorde vrae in die polisie-ondersoekbeampte se verklaring, meen Niel van Heerden, ’n privaat speurder van Mosselbaai met 44 jaar polisie-ondervinding.

“Wat het hy op die toneel gevind? Hoe is die toneel beskerm? Is die toneel afgesper? Was die badkamer nog gesluit? Wie het toegang tot die kamer gehad?” is van sy vrae.

Geen aanduiding bestaan dat die hoofverdagte onmiddellik na ’n dokter geneem is sodat ’n DNS-monster geneem kon word nie; ook lyk dit nie asof daar gesoek is na moontlike DNS onder sy vingernaels nie, sê Niel.

“Dit lyk asof daar tot laat ‘gekuier’ is; dus sou ek die verdagte se bloed laat trek het om sy alkoholvlak te toets.”

Luidens die polisieverklaring het die ondersoekers Jason eers twee dae ná Susan se dood vingerafdrukke gevra en om te wys waar presies sy haar ure voor haar dood beseer het.

Verwurg of selfdood?

Die groot ommeswaai in die ondersoek het gekom toe patoloë met die nadoodse ondersoek op Susan se lyk bevind het sy is met die hand verwurg en die haartang se koord is eers ná haar dood om haar nek gedraai.
 
Dié ondersoek is op 26 Julie (twee dae ná haar dood) in die Paarlse lykhuis in speursers. Appollis se teenwoordigheid gedoen.

“As iemand dood is, is daar nie meer bloedsirkulasie nie, maar by ’n lewende mens sal jy wel bloeding kry,” verduidelik Leon Wagner, ’n forensiese patoloog van Bloemfontein, hoekom die wurgmerke anders sou lyk as die koord ná haar dood eers om haar nek gedraai is.

“Gaan jy jouself laat verwurg soos ’n skaap wat ter slagting gelei word? Die antwoord is nee,” wei hy uit.

“Daar sal tekens van ’n struweling wees en jy sal verwag dat daar verskillende bloedings voor in die nek sal wees omdat greepwisseling plaasgevind het. As daar geen sulke tekens is nie, kan dit wees dat dit eerder selfdood was.”

Tog is dit wel moontlik om jouself met ’n haartang se koord op te hang sonder dat jou voete van die grond af hoef te lig, meen prof. Deon Knobel, emeritusprofessor in patologie aan die Universiteit van Kaapstad.

“As ek die koord om my nek sit en die koord aan die deur se handvatsel sit en op my hurke vorentoe leun, sal ek myself kan hang.”

Netwerk24 berig Susan is glo op haar knieë agter die badkamerdeur gevind met die een deel van die koord om haar nek en die ander deel aan ’n haak agter die deur. Die polisie wil nie hierop kommentaar lewer nie.

Die vloerplan van die Rohdes se kamer op die landgoed.

Jason se verdedigingspan het dr. Reggie Perumal, ’n patoloog bekend vir sy getuienis in die Oscar Pistorius-moordsaak, ingespan om sy eie nadoodse ondersoek uit te voer.

Reggie meen Susan het wel haar eie lewe geneem omdat onder meer haar tongbeentjie – wat tipies breek wanneer ’n mens met die hand verwurg word – volgens hom heel was.

Jy kan jou tongbeentjie voel wanneer jy jou duim en wysvinger onder jou kakebeen druk; dié beentjie lê tussen jou twee vingers, verduidelik Deon en voeg by dat die beentjie wel meestal breek wanneer iemand met die hand verwurg word, maar dit is nie altyd die geval nie.

Daar is ook ’n skildklier-kraakbeen so 3 cm laer af van jou tongbeentjie wat byna altyd breek as jy met die hand verwurg word. Dit sal dus insiggewend wees om vas te stel of dié beentjie ook gebreek is.

Die tongbeentjie breek moeiliker by jong kinders en vroue wat tot osteoporose geneig is, wei Leon uit.

Die staat t. Jason Rohde

Met die saak se aanvang laat verlede maand was dit duidelik dat sowel die verdediging as die staat die grofgeskut vir dié hoëprofielmoordsaak uithaal: Jason se span bestaan onder andere uit vyf regsmense – gelei deur adv. Pete Mihalik*, ’n Kaapse senior advokaat wie se voormalige kliënte beweerde ringkoppe in die bendeonderwêreld soos Mark Lifman en Jerome “Donkie” Booysen (vermeende leier van die Sexy Boys) insluit.

Jason het met sy borgtogaansoek in die Stellenbosse landdroshof verwese gelyk.

Die staat steun op adv. Carine Teunissen, destyds ’n aanklaer in die opspraakwekkende Inge Lotz-moordsaak (waarin die Matie-student se kêrel, Fred van der Vyver, in 2007 ná ’n marathon-hofsaak van moord vrygespreek is).

In Jason se borgtogaansoek is die eerste salvo’s afgevuur in wat beloof om ’n reuse-regstryd te wees. Pete redeneer Jason se inhegtenisneming was onwettig omdat die polisie nie ’n lasbrief daarvoor byderhand gehad het toe hulle hom vroegdag op Dinsdag 23 Augustus by sy huis in Bryanston, Johannesburg, opgeklop het terwyl sy drie dogters nog geslaap het nie.

Die nasionale vervolgingsgesag (NVG) hou egter voet by stuk die Strafproseswet maak voorsiening vir sulke gevalle.

“Die inhegtenisneming van Jason Rohde was nie onwettig nie. Die saak gaan voort. Ons glo ons het ’n saak en daarom vervolg ons hom vir moord,” sê Eric Ntabazalila, woordvoerder van die Wes-Kaapse NVG.

Teen druktyd was die uitslag van Jason se borgtogaansoek nog nie bekend nie; die staat het uitstel gevra hangende die uitslae van DNS-toetse, selfoon- en skootrekenaar-ontledings, ’n bloedspatsel-verslag en nog inligting rakende Jason se finansiële posisie en Susan se geestestoestand.

Gerugte dat Jason ’n affair met Jolene Alterskye, ’n Sotheby’s-agent, gehad het, sal volgens Niel nie genoeg wees om hom aan die pen te laat ry vir sy vrou se beweerde moord nie.

Daar word nou bespiegel oor Jason se beweerde affair met Jolene Alterskye.

“SMS’e, e-posse en selfoonboodskappe sal nagegaan moet word om te kyk hoe ernstig die verhouding was en of daar doodsdreigemente was. Was die derde party ook by die hotel? Sy moet as ’n moontlike verdagte uitgeskakel word.”

Dit is totaal irrelevant dat die staat nou inligting probeer versamel oor Jason se beweerde buite-egtelike verhouding, sê Daniel Witz, ’n Johannesburgse prokureur in Jason se regspan. Hy weier egter om kommentaar te lewer oor of Jason en Jolene wél ’n verhouding gehad het.

“Die staat moet sy saak bo alle redelike twyfel bewys; die bewyslas rus nie op die verdediging nie,” sê Niel.

“As hulle kan bewys die oorledene het moontlik haar eie lewe geneem en dat ’n derde party moontlik toegang tot die kamer gehad het, sal die beskuldigde vrygespreek word. Ek ken adv. Mihalik en hy gaan die staat se saak uitmekaartrek as daar leemtes is.”

*Adv. Pete Mihalik (50) is die oggend van 30 Oktober 2018 voor sy seun se skool tydens 'n sluipmoordaanval doodgeskiet. Die voorval het omstreeks 07:35 op die hoek van Cavalcade en Thornhill in Groenpunt, Kaapstad, plaasgevind. Sy seun (8) is ook tydens die voorval gewond.

Huisgenoot Ware Lewensdrama

Moenie die heruitsending op Sondagaand om 21:00 op VIA (DStv-kanaal 147) misloop nie.

EKSTRA BRONNE: IOL.CO.ZA, RAPPORT, NETWERK24, TIMESLIVE.CO.ZA; GRAFIKA: HG-INFOGRAFIKA; FOTO’S: JOANIE BERGH, MISHA JORDAAN, CORRIE HANSEN, KAPT. PIET SMIT/SAP, FACEBOOK, INSTAGRAM