Die jong man is van bakboord na stuurboord gestuur en was desperaat om uit te vind wat die swelling aan sy nek veroorsaak. Maar die meeste van die mediese kenners wat hy besoek het, was dronkgeslaan.

Nou weet die 19-jarige eindelik waarteen hy baklei.  

Michael het NUT-karsinoom, ’n seldsame vorm van genetiese kanker wat by kinders en volwassenes voorkom.

“Ek onthou ek het na die motor teruggestap en gehuil nadat ek die diagnose gekry het. Dit verwoes werklik jou emosionele toestand,” sê hy.

“Ek het ’n vloedgolf van emosies ervaar. Jy dink aan die begin dit is net ’n klein infeksie, en dan kring dit tot kanker uit.” 

Michael studeer aan die Universiteit van Kaapstad vir ’n B.Sc.-graad in konstruksiestudies. Hy het die groeisel in Maart opgemerk toe hy ter voorbereiding vir die inperking na sy tuisstad, Johannesburg, teruggekeer het. 

Eers is ’n kursus antibiotika vir hom voorgeskryf, want dokters het gedink hy het ’n keelinfeksie. Maar al het hy die behandeling voltooi, het die massa aanhou swel. 

“My tong het gepyn en ek kon nie behoorlik eet nie,” onthou hy.

“Ek is terug na die algemene praktisyn, wat my na ’n tandarts verwys het, want sy het vermoed dit was dalk my verstandtande. Maar voor ek die tand kon laat trek, het my ouers besluit ons moet eers ook ’n oor-, neus- en keelspesialis (ONK) besoek om seker te maak.”

Die ONK-spesialis het vermoed hy ly dalk aan speekselsteentjies, wat gekristalliseerde minerale is wat in speekselkliere in die mond vorm, maar kon nie die moontlikheid uitsluit dat daar ’n abses was wat aan die klier gegroei het nie. 

Michael is toe vir ’n operasie geskeduleer.

“My nek het erger geraak, selfs ná die operasie, en dit is toe dat die ONK-spesialis vir my sê ek het kanker.” 

Terwyl hy op die operasietafel was, het die spesialis ’n abnormaliteit in sy limfkliere opgemerk en ’n monster vir verdere toetste gestuur.

“Ek het nie van die monsters geweet nie, want die dokter wou my nie ontstel nie,” sê hy. Die nuus het hom stomgeslaan.

“Ek is net 19,” het hy gedink.

Teen die tyd dat sy kanker gediagnoseer is, het dit reeds na die bene versprei, maar sy ouers, Johan en Hannelie Cilliers, het alles in hul vermoë gedoen om te sorg hy kry die nodige mediese hulp. 

“Die ONT het geweier om nog chirurgie te doen tensy die oorspronklike gewas gekrimp het,” het sy ouers in die sosiale media gesê. “Die onkoloog na wie ons verwys is, het gesê daar is niks wat sy kon doen nie. Maar ons het dit nie aanvaar nie.”

Hul soektog het hulle na dr. Daleen Geldenhuys, ’n onkoloog by die Life Flora-hospitaal in Roodepoort gelei. Sy het ingestem om Michael te behandel. 

Daleen sê NUT-karsinoom as uiters seldsaam.

“Die kanker kan enige plek aan die lyf ontwikkel, maar vorm gewoonlik op die middellyn, synde die nek, longe of rug.''  

“Ons hoop ons sal in die toekoms vir Michael tot nuwe middels kan toegang kry.”

Daarom het die jong man ’n skenkingsfonds gestig om die koste van sy behandeling te dek. Al was die afgelope paar maande moeilik, het hy nog baie om voor te leef.

“Dis belangrik om nie op te gee of jou te verknies deur te vra: ‘Hoekom ek?’ nie,” sê Michael. “Dinge sal beter raak.” 

Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe