Sedert hulle mekaar twee jaar gelede ontmoet het, was Elizabeth en Scott Shoesmith se romanse soos iets uit ’n sprokie, sê hulle. Maar voor hulle afgehaak het, het die 41-jarige bruid ’n baie spesiale liedjie vir haar aanstaande beplan.

Sy het gebaretaal geleer kort nadat sy en Scott begin uitgaan het, en Liz was bekommerd die betekenis van die emosiebelaaide trouliedjie – A Thousand Years deur Christina Perri – sou met liplees verlore gaan.

Toe leer Liz, uitvoerende hoof van ’n organisasie sonder winsbejag, haarself die lirieke en gebaretaal in die maande voor hul groot dag in die Zest Waterfront by The Spit in Sydney, Australië.

Foto: CATERS/WWW.MAGAZINEFEATURES.CO.ZA

“Scott het net in trane uitgebars toe hy my sien,” sê Elizabeth.

“Hy het seker nou al 100 keer na die video gekyk.

“Ek wou hom verras en hy het geen benul gehad ek sou tydens die seremonie gebaretaal gebruik nie.”

Die gelukkige paartjie het mekaar twee jaar gelede deur Tinder ontmoet. Elizabeth het kort nadat hulle begin uitgaan het, gebaretaal begin leer.

Scott het sy gehoor op vyf verloor en was heeltemal dood teen die tyd dat hy agt was. Ná omvattende spraakterapie kan Scott goed praat, maar Elizabeth was bekommerd die liedjie se betekenis sou verlore gaan met liplees.

“Ek het navorsing gedoen en uitgevind dowe mense kan gemiddeld sowat 60 persent uitmaak van wat gesê word wanneer hulle lippe lees.

“Dus was dit baie belangrik om Auslan (kort vir Australiese Gebaretaal) te leer.

“Ek het die liedjie drie maande voor die troue geleer.

“Ek het kort voor die troue ’n video van myself wat oefen aan een van Scott se vriende, ’n vertolker, gestuur en hy het dit vir my nagegaan.

“Elke keer dat ek in die aanloop tot die troue geoefen het, het ek foute gemaak of goed vergeet.

“Maar toe ek by die bopunt van die gangetjie staan en in Scott se oë kyk, het ek nie weggekyk nie.

“Dit het regtig gevoel asof ons die enigste mense in die vertrek was.”