Sy steier na buite terwyl haar dogter se verskrik­like gille deur die stilte agter haar skeur. Maar Drusilla Vorster (61) veg om haar eie behoud: Met haar hande probeer sy die warm lewensbloed keer wat uit die meswond in haar maag vloei.

Van die oomblikke daarna in die straat buite die apteek op Joubertina, waar sy en haar dogter albei gewerk het, weet sy niks. Die volgende wat sy onthou, is die gesig en gerusstellende woorde van die paramedikus wat agter in die ambulans oor haar buk.

“Ek het gewag dat my kind ook in die ambulans gelaai word voor dit wegry . . . Maar dit het nie gebeur nie. Toe weet ek sy is dood,” onthou Drusilla vandag in haar huis op Despatch.

Later het sy ­gehoor haar dogter se vermeende moordenaar het ná die aanval doodluiters uit die apteek gedrentel en in die straat ’n sigaret aangesteek en gerook.

Sy het nie veel oor Marthinus gesê nie, maar ek kon agterkom sy is bang vir hom; bang hy gaan haar kom haal.

Binne het haar dogter, Maritza van der Linde, in ’n plas bloed gesterf. Sy is twee keer in die maag gesteek en een keer in die hart. Buite het Maritza se eksman, Marthinus van der Linde (46), glo sy halfgerookte sigaret in die straat neergegooi voor hy geboei en na die polisievoertuig geneem is.

Marthinus Wessel van der Linde is des­tyds betrek
Marthinus Wessel van der Linde is des­tyds betrek by klein Jeandré se dood.

Net 24 dae tevore het Drusilla in haar motor geklim en na Koppies in die Vrystaat gery om Maritza (43) te gaan haal omdat sy glo in doodsvrees vir haar eks­man geleef het.

“Die laaste drie weke van Maritza se lewe kon ek sien sy is gelukkig hier by my. Sy het nie veel oor Marthinus gesê nie, maar ek kon agterkom sy is bang vir hom; bang hy gaan haar kom haal,” sê Drusilla.

Sy wou haar dogter help om oor te begin. Maar toe, op 25 Februarie, daag Marthinus by die apteek hier op die Oos-Kaapse dorpie op en die droom het aan ’n einde gekom.

Benewens die seer oor haar dogter se dood spook nog iets nou weer by Drusilla: die herinnering aan Maritza se kind uit ’n vorige verhouding.

Raaiselagtige dood van ’n driejarige

Maritza se eersteling, Jeandré, is op drie oorlede
Maritza se eersteling, Jeandré, is op drie oorlede.

Dié seuntjie is 24 jaar gelede dood toe hy net drie jaar oud was. Sy lyfie is in sy bed gekry, en daar was vrae of hy moontlik voor sy dood mishandel is . . .

Die seuntjie se stiefpa, die einste Marthinus wat nou van Maritza se dood aangekla word, is destyds van strafbare manslag aangekla nadat haar kind onder raaiselagtige omstandighede dood is. Maar hy is later onskuldig bevind en die seuntjie se dood het ’n raaisel gebly . . .

Haar oë het nie saam­gelag nie. Haar oë het die hartseer binne haar ­gewys.

Drusilla sluk swaar aan haar koffie voor sy kop­skuddend sê: “Hulle sê mos die Here plaas nie ’n las op jou te groot om te dra nie, maar ek het al met Hom gepraat en gevra: Hoeveel moet ek nóg verduur?”

Sy beduie na die foto’s teen die muur. Eers na ’n blondekopseuntjie, en dan na ’n blonde vrou wat oopmond lag. Dis ­Maritza, vertel sy.

“Weet jy, my kind het hierdie manier van glimlag gehad; jy sien net tande. Maar haar oë het nie saam­gelag nie. Haar oë het die hartseer binne haar ­gewys.”

Maritza van der Linde.
Maritza van der Linde.

En nou is albei weg, eers haar kleinkind en toe haar dogter.

“Hoe vergewe ’n mens? Ek dink nie ek sal ooit kan vergewe nie.”

In haar nagmerries herleef sy die ver­skrikking in die apteek op Joubertina oor en oor.

“Ek onthou die angs in haar stem toe sy ‘Mamma!’ roep . . . Dit was haar laaste woord aan my.”

Martizélle van der Linde (22) – Maritza se tweede kind, uit haar huwelik met Marthinus – is ook vandag hier om haar ouma te ondersteun. Sy vee trane af voor sy sê: “Ek verwyt my pa. Hy het my ma finaal van ons weggevat.”

Wanneer ons weer sien, is sy terug by hom. Dan het hy haar verneder en aangerand.

Drusilla vryf die bruin steekhaarhondjie op haar skoot agter die ore.

“Brody was Maritza se hondjie. Die laaste paar weke van haar lewe het sy en die hondjie by ons kom bly. Dit is al wat ek nou van haar oorhet.”

Hoewel Marthinus en Maritza in 2008 geskei is, het Marthinus se houvas op Maritza gebly, beweer Drusilla.

“Hy het hierdie manier gehad om my kind te manipuleer. Wanneer ons weer sien, is sy terug by hom. Dan het hy haar verneder en aangerand,” beweer Drusilla. “Ons het haar heelgemaak net sodat hy haar weer kan afbreek.”

Drusilla en Maritza se hondjie, Brody. Dis al wat
Drusilla en Maritza se hondjie, Brody. Dis al wat sy nou van haar dogter oorhet. Foto: Michael Sheehan

Maritza was weer saam met Mar­thinus op Koppies toe sy haar ma op 31 Januarie vanjaar gebel het.

“Ek sal die oproep nooit vergeet nie. Sy het angstig geklink en gesê: ‘Help my, Mamma.’

“Ek kon nie agterkom wat aangaan nie, maar ek het vermoed dis Marthinus. Ek het die polisie gebel en ’n vrouebeampte het na hul huis gegaan. Sy het my teruggebel en gesê sy is bekommerd oor Maritza; as dit haar kind was, sou sy haar gaan haal.”

Dis presies wat Drusilla toe die volgende dag doen.

Drusilla, ’n aptekersassistent, het afloswerk by apteke in die Oos-Kaap gedoen. Sy het ’n plan gemaak dat Maritza opleiding kry as ’n kassier sodat sy êrens oor kon begin.

Op 22 Februarie is hulle van Despatch na Joubertina om ’n week saam in die dorpsapteek te werk.

Maar wat Drusilla nie geweet het nie, was dat Marthinus ook sy weg na Joubertina gevind het . . .

’n Doodgewone oggend

Kloof-apteek in Joubertina. Foto: Michael Sheehan
Kloof-apteek in Joubertina. Foto: Michael Sheehan

Vir Drusilla en Maritza het hul laaste oggend saam doodgewoon begin.

“Ons het die apteek oopgesluit en koffie gemaak. Ek was besig om die dag se bestellings te doen toe ek hoor iemand skree almal moet uit die apteek gaan. Ek het gedink dit is ’n grap, en toe sien ek Marthinus met ’n mes teen my kind se keel staan . . . My kind het met groot, ­hulpelose oë na my gestaar.”

Marthinus het Maritza glo gedwing na die kantoortjie agter die toonbank waar Drusilla met die bestellings gewerk het.

“Toe sê hy ek moet ook uit die apteek. Ek het geweier, gesê ek bly net hier by my kind. Toe steek hy my in die maag. Hy het my so hard gesteek dat my voete van die grond af gelig het; al my spiere het saamgetrek.”

Bloeiend en in skok het sy uit die ­apteek gesteier. Dis toe dat sy haar dogter se laaste hulpkrete hoor.

“Ek sal nooit die angs en hulpeloosheid in haar stem vergeet nie.”

Ander misdade

Drusilla Vorster en haar kleindogter, Martizélle v
Drusilla Vorster en haar kleindogter, Martizélle van der Linde, is verpletter nadat Maritza, Drusilla se dogter en Martizélle se ma, vermoor is. Foto: Michael Sheehan

Maritza het Drusilla nie vertel van al die ander kere wat Marthinus van ander misdade beskuldig is nie.

Maar Drusilla hét geweet hy is destyds betrek by klein Jeandré (toe 3) se dood en toe onskuldig bevind.

“Dit was ék wat elke aand oor die klein asempie getreur het.”

Toe Maritza en Marthinus mekaar in 1995 ontmoet het, was daar al bewerings teen hom. Hy is toe daarvan beskuldig dat hy oor sy vriend Dawie Coetzee gery het, maar is op ’n aanklag van strafbare manslag vrygespreek. Hy is skuldig bevind aan dronk- en nalatige bestuur en moes korrektiewe toesig uitdien.

Hy is ook in 1994 en 2010 aan bedrog skuldig bevind.

Maar dit bly haar kleinseun se dood wat aan Drusilla vreet. Destyds, in Oktober 1996, het sy in Huisgenoot haar hart daaroor uitgestort, maar vandag leef sy steeds met al die vrae saam.

Maritza het Jeandré gehad toe sy 16 was. Toe sy en Marthinus trou, het hy glo daarop aangedring dat die kleuter by hulle op Virginia woon.

Destyds, nadat Jeandré se lykie in sy bed gekry is, het die polisie Marthinus van strafbare manslag aangekla. Daar was koerantberigte oor die beserings aan sy lyfie en sy rooigeverfde naels; fluisterstories in die gemeenskap oor mis­handeling.

“Maar alles was omstandigheidsgetuie­nis,” vertel Drusilla. Marthinus is in 1997 op Virginia onskuldig bevind aan straf­bare manslag en die kinderverwaar­losing van Jeandré.

En terwyl Marthinus nou verhoor­afwagtend is in die St. Albans-gevangenis in Port Elizabeth, leef Drusilla saam met die vrees dat haar dogter en kleinseun se dood 24 jaar uitmekaar moontlik deur dieselfde man veroorsaak is.

FOTO'S: LULAMA ZENZILE/NETWERK24, MICHAEL SHEEHAN, VERSKAF
Is jy 'n slagoffer van gesinsgeweld?

Hier is organisasies wat kan help:

Kom neem deel aan die gesprek

Volg Huisgenoot op InstagramTwitter en Facebook en teken gerus in op ons nuusbriewe.