Skaars ’n week het verloop vandat die ongeluk net om die draai van die Vorsters se huis gebeur het. En Vrydag het Jané se ma, Claudia (34), haar beste vriend se ma ontmoet. Jané, ’n gr.8-leerder aan die Hoërskool Driehoek, het die ongeluk oorleef waarin Shelby, ’n matriekleerder aan dieselfde skool, dood is.


Jané Vorster (14) en haar vriend, Shelby van Wyk (
Jané Vorster (14) en haar beste vriend, Shelby van Wyk (18), was onafskeidbaar. Foto: Verskaf

“Ons het albei gehuil. Ons het mekaar net gegryp en lank vasgedruk. Haar man het vir my blomme gegee, en sy het gesê hulle is jammer. ‘Ons bid vir Jané,’ ” het Claudia kort ná die ontmoeting nog emosioneel aan Huisgenoot vertel.

Vriende en familie sal Maandag Shelby se lewe tydens 'n afskeidsdiens vier, waar 'n briefie wat Jané vir hom geskryf het vertoon sal word.

Jané sal egter nie daar kan wees nie. Sy word steeds in die waaksaal van die Netcare Unie-hospitaal in Alberton behandel ná die ongeluk verlede Saterdagmiddag.

Jané het haar skedel in die ongeluk gekraak en ook onder meer haar bekken op meer as een plek gebreek. Sy is reeds twee keer geopereer.

Shelby se valhelm, wat sy aangehad het, het waarskynlik haar lewe gered toe hulle ’n draai met Shelby se motorfiets gaan ry en teen ’n ander ligte voertuig gebots het.

Hoewel Claudia nog nie kan sê wat die presiese oorsaak van die ongeluk was nie, het sy verneem die bestuurder van die ander voertuig is ’n bejaarde man van 92 jaar oud. Hy is nie ernstig in die ongeluk beseer nie.

Daar waar sy nou alleen in die hospitaal is, weet sy nou haar beste vriend het in die ongeluk gesterf. Jané en Shelby was nie ’n paartjie nie, maar almal het geweet die twee is baie verlief op mekaar.

“Haar hartjie is baie seer. Sy is nou by haar bewussyn, maar sy is nog baie deurmekaar,” sê sy.

Jané Vorster (14) Foto: Verskaf
Jané Vorster (14) Foto: Verskaf
Jané Vorster (14) Foto: Verskaf
Jané Vorster (14) Foto: Verskaf


Claudia vertel dit was vir haar en haar man, Chris (50), asook Jané se broer, Nathan (17), en sussie, Chanté (15), sover baie erg dat hulle weens die covid-19-pandemie nie vir Jané mag besoek nie.

Die gesin noem haar hulle klein “rissiepit” en hulle klein “snip”, maar toe Claudia haar dogter eers weer Donderdag vir die eerste keer sedert die ongeluk kon sien, het sy daar waar sy gelê het, baie kleiner en fyner gelyk as die sterk meisiekind wat sy ken.

“Sy het verskriklik gehuil. So deur die trane het sy my gevra: ‘Mamma, is Shelby regtig dood?’ 

Claudia vertel Shelby en Jané het mekaar ontmoet het toe sy in graad 8 by die skool aangesluit het.

“Ons het haar so baie gespot oor Shelby, maar ons het gevoel die ouderdomsverskil tussen hulle was net te groot . . . Ek en my man het ’n groot ouderdomsverskil, maar ons het gespot ons was darem uit die skool toe ons ontmoet!

Ek dink nou dalk moes ons die kinders net laat begaan het. Shelby was so beskermend teenoor haar . . . Maar aan die ander kant dink ek weer dit sou nou vir haar net soveel slegter gewees het.”

Claudia vertel Jané het die oggend voor die ongeluk selfs vir haar nuwe klere gaan koop, so opgewonde was sy om die aand vir Shelby te sien.

“Die kinders sou die aand speletjies by ons huis speel. Jané het buite gaan wag vir Shelby om te kom. Sy kon nie wag nie.”

Claudia sê Jané was nog altyd hulle waaghals en het gesmeek om ’n draai saam met Shelby op sy motorfiets te ry.

Die stilte dan spreek van die menslike en onafwendbare skuldgevoelens waarteen sy as ouer veg.

Jané Vorster (14) en haar vriend, Shelby van Wyk (
Jané Vorster (14) en haar beste vriend, Shelby van Wyk (18), was onafskeidbaar. Foto: Verskaf


“Ons wou nie gehad het sy moes nie. Ons het eers nee ges
ê, want haar pa was verlede jaar in ’n motorfietsongeluk, maar sy het so gesmeek en gepleit, dat ons haar toegelaat het om net ’n kort draaitjie te ry . . .”

Claudia vertel Shelby het net die vorige dag aan Jané gesê as hy die dag doodgaan, hoop hy dit is op sy motorfiets en hy hoop dit is op slag sodat hy nie sal ly nie.

“Ek weet nie, dalk het die Here hom en haar toe al daarop probeer voorberei? Nathan het sy sussie gaan soek toe hulle te lank begin wegbly en op die ongeluk afgekom. Die klere wat Jané daardie oggend gekoop het, moes nooddienswerkers later van haar lyf af sny.

Claudia sal dit wat sy gesien het, nooit vergeet nie.

“Jané het daar gelê met haar swart haartjies en haar gesiggie was spierwit. Ek het die bloed oor haar lyfie gesien en net gedink my kind lyk soos Sneeuwitjie. Ek wou haar red, maar ek kon niks vir haar doen nie. Maar ek het besef dis Jesus se bloed oor haar. Hy is by haar.”

Jané Vorster (14) Foto: Verskaf
Jané Vorster (14) Foto: Verskaf


Nou is al wat hulle hoop dat Jané binnekort na ’n ander saal kan skuif. Hulle hoop om haar dan hopelik meer te kan besoek.

Intussen weet hulle die pad na herstel is nog lank en daar gaan waarskynlik nog verskeie operasies voorlê.

“Ons kan doen met elke gebed,” sê sy.

Teen die einde van die onderhoud vra Nathan of hy iets kan sê: “My nuwe bynaam van Jané is my warrior, want: ’n fighter is known for a few fights, but a warrior is known for never stopping en Jané is net een van daai kinders wat nooit gaan lê nie. Sy staan altyd op.”

  • ’n Familievriendin het namens die Van Wyk-familie versoek om hul privaatheid in hierdie moeilike tyd te respekteer.
Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe