Die sjarmante Colton Robinson van Massachusetts het reeds in sy rolstoel op die loopplank by die modeweek in New York verskyn en het al selfs modelwerk vir Tommy Hilfiger gedoen.

Daar is met sy geboorte gesê hy het een van die “ergste” gevalle van spina bifida wat sy dokter nog gesien het, met sy bene wat opwaarts in die rigting van sy kop gewys het en sy ruggraat wat by sy rug uitgesteek het.  

Hy het ’n operasie ondergaan om sy rug reg te stel toe hy minder as ’n dag oud was en ses maande later ’n operasie gekry om die vloeistof op sy brein te dreineer. 

Om sy bene en voete reguit te kry, is hy gereeld in traksie en gips geplaas, maar die vasbytertjie het altyd ’n manier gevind om sterker anderkant uit te kom.

Hy het aan die modeweek in New York en vir liefdadigheid op die loopplank met Runway of Dreams verskyn en sedertdien is hy versot op elke geleentheid om sy lyf model te hou – en doen selfs soms wheelies op die loopplank!

“Ek vra hom altyd vooraf of hy modelwerk wil doen, en hy sê altyd ja,” sê sy ma, Ashley (37). “Hy sê hy hou daarvan omdat dit hom goed oor homself laat voel.

“Hy is mal daaroor. Hy het so ’n groot persoonlikheid en is baie seker van homself. Dis wonderlik dat hy nie beperkings vir homself sien nie. 

“Colton moes al baie struikelblokke oorkom as kind in ’n rolstoel, maar in hierdie opsig doen hy iets wat ander kinders nie ’n geleentheid het om te doen nie, en hy voel dus baie goed daaroor.

“Hy was net sewe jaar oud toe hy aan die modeweek in New York deelgeneem het, en om dit was ongelooflik om hom op die loopplank voor al hierdie mense en kameras te sien. Hy het dit so goed gedoen.

“Ek het trane in my oë gehad, en dit was ’n ongelooflike oomblik om hom daar te sien, en so trots op homself. Dit het baie van hom geverg om dit te doen.

“Hy is al talle kere gevra om op die loopplank te verskyn, vir die modeweek in New York en ander, en ons doen ons bes om alles te doen wat ons kan.

“En toe is hy gevra om lente- en somer-fotosessies vir die Tommy Hilfiger Runway of Dreams-reeks verlede jaar te doen. Dit was ’n wonderlike ervaring en hy was mal oor elke sekonde daarvan.

“Met die New York-modeweek verlede jaar het hulle ’n nou loopplank vir die kinders gehad. Dit was hoog bo die grond en die ander kinders was bang, maar Colton het reg rondom dit beweeg en ’n wheelie gedoen. 

Foto: Magazine Features

“Mense was so beïndruk met hom en was mal daaroor dat hy nie ’n gebrek aan selfvertroue het nie. Hy begin besef hy kan enigiets doen.”

Spina bifida is op 20 weke van swangerskap tydens ’n ultraklanksessie by Colton gediagnoseer. Dit raak een uit elke 1 000 geboortes. 

Dié geboortedefek gebeur in die baarmoeder, en veroorsaak dat die ruggraat en rugmurg nie behoorlik vorm nie.

“Ons is na ’n vertrek geroep en meegedeel dat Colton spina bifida het. Ek was aanvanklik heeltemal verpletter en het nie geweet wat met my kind sou gebeur nie,” sê Ashley. 

“Die internet is ’n vreesaanjaende plek, en as jy Google hoor jy net van die ergste scenario’s. Ek onthou ek het verlore gevoel en was nie seker wat om te doen nie. 

Colton is gebore met ’n groot beskermende borrel wat by sy rug uitsteek wat deel van sy ruggraat en rugmurg bevat het wat nie behoorlik gevorm het nie.
Hy het binne 24 uur ’n operasie ondergaan om dit reg te stel.

“Ek onthou hulle het vir ons ’n foto gewys en gesê dis een van die ergste gevalle wat hulle in ’n lang ruk gesien het,” sê Ashley.

“Die manier hoe die ruggraat uitgesteek het en die beskermende borrel op sy rug, was so groot dat dit soos ’n reuse jellievis gelyk het. 

“Ons kon hom eers vashou toe hy meer as ’n week oud was. Hy was ná die geboorte vir twee weke in die neonatale intensiewe sorgeenheid. Dit was die moeilikste ding.

Ná nog ’n operasie om die vloeistof op sy brein te dreineer, het hy ’n reeks gipsvorms aan sy bene gekry om te help om sy voete reguit te maak.

Mees onlangs is gips ’n jaar gelede vir 10 weke opgesit om sy voete reg te kry nadat dit buitentoe begin draai het – dit het hom ongemaklik gemaak en moeiliker gemaak om sy rolstoel te gebruik.

Ten spyte hiervan het hy hard baklei om onafhanklik te word en maniere rondom sy gestremdheid te vind. 

Foto: Magazine Features.

“Toe hy gebore is, was sy bene gedraai in die rigting van sy gesig, dit was asof hy in die helfte gebuig was, maar dis reggestel ná die operasie en gips in die eerste paar jaar van sy lewe.

“Hy is nou baie onafhanklik en as hy iets wil bykom, sal hy uit sy stoel reik om dit self te kry en hy raak nie ontsteld omdat hy nie kan loop nie."

“Hy sal ook in die huis kruip en is dus nie altyd in sy rolstoel nie. Hy sleep dikwels sy spalke saam met hom rond en by die skool jaag hy rond in sy rolstoel.” 

Ashley sê haar seun se talent as model is vanaf ’n jong ouderdom raakgesien nadat hy gekies is vir ’n foto vir ’n geldinsamelingsgeleentheid vir die Shriner-kinderhospitaal in 2013.

Hy was op die kortlys vir die top-10- “oulikste kinders” in ’n kompetisie in ’n ouerskaptydskrif ’n jaar later voor hy gevra is om op die loopplank te verskyn.

“Colton is gevra om op die loopplank te verskyn in Philadelphia tydens ’n hokkiewedstryd. Hy was aanvanklik ’n bietjie senuweeagtig, maar dit het sy gesiggie laat ophelder. 

“Jy sien nie baie kinders in rolstoele of met gestremdhede in tydskrifte of op televisie nie, en daarom is ek trots op hom.”

Colton het sy ma ’n paar jaar terug gevra hoekom hy nie kan loop nie, en nadat sy spina bifida aan hom verduidelik het, het hy selfversekerd en bemagtig gevoel.
“Ek sê vir hom dieselfde ding wat ek hom al van kleins af sê – dat hy enigiets kan doen wat enige ander kind kan doen.

“Dis ongelooflik. Ek vergeet soms toe hy gebore was en sy bene so anders gelyk het, en hoe ver hy gekom het. Dis werklik ’n plesier om hom te sien grootword. 

“Dit maak my trots dat hy modelwerk geniet. Die feit dat hy daar wil wees, is regtig wonderlik.

“Hy geniet dit. Hy is nog ’n bietjie te jonk om te besef wat hy vir mense wys deur ’n model met ’n gestremdheid te wees, maar ek dink soos hy ouer word, sal hy daardie aspek waardeer.”