Dit is vandag die eerste dag in byna ’n maand dat Berna Kruger (43) van Hartswater haar huis verlaat het.

Altesaam 26 dae van algehele isolasie het verloop sedert sy en haar man, Henk (46), die pastoor van die Light the World Ministeries, vir die nuwe coronavirussiekte COVID-19 getoets en hulself in kwarantyn afgesonder het.

Maar vandag kan sy met ’n blymoedige hart sê: “Ons hele gesin is gesond. Ek het vrede binne my.”

Die Kruger-egpaar het die virussiekte opgedoen nadat hulle op 10 en 11 Maart ’n groot kerksaamtrek in Bloemfontein bygewoon het.

Hulle is op Vrydag 20 Maart getoets nadat dit bekend geword het dat vyf van die buitelandse sprekers COVID-19 onder lede gehad het.

Nóg drie mense van hul omgewing – twee werknemers en ’n vriend – het positief getoets nadat hulle in direkte kontak met die egpaar was.

Met Huisgenoot se eerste onderhoud, kort ná Berna se diagnose, het die vrees nog bestaan dat hul vier dogters, Berné (17), Carla (16), Jané (14) en Marti (12), ook siek kan wees, maar ook hulle het intussen negatief getoets.

Die pastooregpaar Henk en Berna Kruger saam met hu
Henk en Berna Kruger saam met hul dogters, van links, Jané, Marti, Carla en Berné. Foto: Verskaf

’n Mens moet net eers vra hoe Henk met soveel estrogeen in een huis oorleef.

Berna lag: “Ons het darem drie reunhonde, wat sake 'n bietjie uitbalanseer!”

Maar Berna raak ernstig wanneer ’n mens vra oor die moeilike en uitdagende tyd waardeur hulle is.

“Almal in die huis was simptomaties. Ons dogters het ook erg koors, hoes en lyfseer gehad. Ek was doodseker hulle sou ook positief toets. Ek het inteendeel nog vir ons dokter gesê hy hoef hulle nie eens te toets nie. Maar die eerste toets was negatief en later ook ’n tweede. Dit sou blyk hulle het net gewone griep gehad. Ek het al soveel wonderwerke in my lewe gesien en hierdie was een.”

Berna en Henk het albei baie swaar gekry. Berna het baie met moegheid gesukkel en Henk met kopseer en moegheid. “Dit het vir ons albei letterlik 14 dae aanmekaar geduur.”

Hoewel Berna die simptome baie kan vergelyk met tye in die verlede dat sy gewone griep gehad het, was daar vir hul albei ’n dag dat hulle geweet het dit is nie.

“ Henk was een nag baie benoud. Daar was ook een nag dat ek met die dood gekonfronteer is, maar dit was vir my ook oukei, want ek het geweet as ek my oë oopmaak, sal ek in die hemel wees, en my hele gesin sal saam met my daar wees. Maar ek is dankbaar dat God my lewe gespaar het, ek weet my kinders sou my baie gemis het en ek moet as ma nog hier op aarde wees vir hulle.”

Past. Henk en Berna Kruger van Hartswater. Foto: F
Past. Henk en Berna Kruger van Hartswater. Foto: Facebook
Past. Henk en Berna Kruger van Hartswater. Foto: F
Past. Henk en Berna Kruger van Hartswater. Foto: Facebook

Berna erken daar was agterna stigma nadat sy erken het sy en haar man is positief getoets. Sy vertel ook sy het skuldig gevoel nadat hulle onwetend ander mense in hul omgewing aangesteek het.

“’n Mens hoef nie skuldig te voel nie, maar jy voel tog so wanneer jy weet jy het.”

Berna vertel die 26 dae was tot dusver vir haar wel ’n “wonderlike tyd” saam met haar man en kinders, waar hulle die inperking saam met die res van die land moet verduur. Die inperking is tans tot Donderdag 30 April van krag.

“Dit is vir my tyd saam met my gesin by die Here se voete.”

Vir hul dogters wat nou onderskeidelik in gr. 11, 10, 8 en 6 is, gaan die tuisonderrig ook aan.

“Ek dink as hulle enigiets mis, is dit net om buite te kan gaan fietsry en draf. Hulle is almal baie lief vir oefening, maar vir nou doen ons maar net die 'garden route' hier om die pastorie!

“Ons is dankbaar vir die mense wat ons onderskraag en ondersteun het. Ons kon hul gebede voel. Ek staan by wat ek voorheen gesê het: ‘Wees banger vir die hel’. Al is ek daaroor ook aangeval, is ek oukei daarmee, want ek glo net omdat jy nie in God glo nie, gaan hom nie net laat verdwyn nie. So ook nie die hel nie.

“Ek kan die geweldige aanvalle net hanteer omdat ek weet as jy jou oë op Jesus hou, sal hy alle vrees wegneem. ’n Mens vind alles in Hom: jou drome, jou veiligheid en jou lewe. Ek is nie bang nie, maar ek weet vir almal in die land gaan dinge nie makliker raak nie. Mense moet vertrou in Hom. Respekteer ons regering soos dit staan in Romeine 13 vers 1. Luister na ons president. Gee asseblief geld en hulp vir die mense wat die Here op jou hart lê.”

  • Huisgenoot het vroeër berig verskeie mense het positief getoets vir COVID-19 nadat hulle die saamtrek op 10 en 11 Maart bygewoon het, wat by die Divine Restoration Ministeries-kerk in Bloemfontein gehou is. Ook Angus Buchan, wat ’n spreker op die geleentheid was, en sy vrou, Jill, het positief getoets en is sedertdien in isolasie. Meer as 360 mense is daarna deur die departement van gesondheid getoets.