En moenie dink die tweejarige Zayaan du Toit sal enige hulp aanvaar om dit te doen nie – dié dapper kleuter is vasbeslote om so onafhanklik moontlik te wees, ongeag haar gebrek.

“As sy eers haar kop op ’n ding gesit het, is dit moeilik om haar van plan te laat verander,” sê haar ma, Lemeza, van Mitchells Plain, Kaapstad.

Zayaan is met ’n seldsame beensiekte Langer mesomeliese displasie gebore. Dit beteken dat daar geen beengroei is nie. As dit in die bene gebeur, staan dit bekend as bilaterale fibulêre hemimelie. Dit beteken dat daar geen gebeentes in haar bene is nie.

Zayaan kan, weens haar siekte, nie soos ’n normale kind loop of rondbeweeg nie, maar Lemeza sê die kleuter laat nie toe dat dit haar terughou nie.

“Ondanks haar gebrek wend sy innoverende maniere aan om rond te beweeg. Niks keer hierdie dogtertjie nie. Ek staan soms verbaas oor haar vermoëns. Sy weet nie van beter nie, dus gebruik sy dit waarmee sy geseën is. Sy is altyd vrolik.”

Lemeza, wat vir RCS werk, ly aan polisistiese eierstoksindroom en haar ginekoloog het haar gewaarsku dat die swangerskap hoë risiko’s sou inhou.

Lemeza en haar man, Shafiek, is na die fetale evalueringssentrum in Claremont, Kaapstad verwys nadat roetineskanderings van die fetus kommerwekkende resultate getoon het.

“Ander ma’s is vinnig in en uit in die vertrekke waar die ondersoeke gedoen is, maar hulle was ná 45 minute steeds besig om my te ondersoek,” vertel Lemeza.

Sy sê die spesialis het die skandering net een kyk gegee en toe uitgeblaker “daar is beslis iets verkeerd met hierdie baba”.

“Ek was verpletter,” sê sy. “Ek was emosioneel, verward en gespanne. Ons kon nie verstaan wat aangaan nie.”

Tydens die opvolg-afspraak het die egpaar gehoor hul ongebore baba ly aan Roberts-sindroom, ’n skaars genetiese afwyking wat deur ’n onderbreking in selverdeling veroorsaak word. Dit lei tot die misvorming van bene in die skedel, gesig, arms en bene.

“Volgens hulle was die enigste oplossing om die swangerskap te beeïndig. Hulle het voorspel dat sy nie die kraamproses lewend sal haal nie.”

Maar sy en Shafiek het besluit om hul baba te hou, en op 18 November 2016 het hulle hul pragtige dogtertjie verwelkom.

Zayaan was ’n gesonde baba by geboorte, maar haar bene was misvorm. Ná talle toetse is sy na ’n ortopeed by die Rooi Kruis-kinderhospitaal in Kaapstad verwys.

Langer mesomeliese displasie is toe by haar gediagnoseer.

“Ek was baie bekommerd oor haar toekoms en of sy ooit sou kon loop, of hoe sy met die gemeenskap en haar tydgenote sou kon regkom,” sê Lemeza, wat ook ’n seuntjie, die nege maande oue Muhammed Raeez, het.

Die dokters het aan die egpaar gesê die enigste oplossing sou wees om haar bene te amputeer sodat sy prostese kan gebruik.

“Ek kon eenvoudig nie hierdie terugvoer aanvaar nie, en ek was erg gekant teen die dokter se aanbeveling,” onthou Lemeza. “Ek kon my nie eens voorstel dat my dogter, sonder ’n tweede opinie, na ’n teater toe moet gaan om daardie voete af te sny nie.”

Lemeza het toe besluit om wêreldwyd dokters te soek wat moontlik sou kon help. Sy het eindelik vir dr. Dror Paley by die Paley Institute in Florida, Amerika, opgespoor. Die instituut bied die mees gevorderde behandeling aan ten opsigte van ledemaatverlengings- en misvormingsregstellingstegnieke ter wêreld.

Dr Paley and Lemeza het per e-pos gekommunikeer. Sy het hom van Zayaan se siekte vertel en vir hom X-straalfoto’s van die kleuter se bene gestuur. Hy het vir haar binne twee dae die presiese diagnose van Zayaan se bene gestuur, sowel as sy aanbevelings, wat nie amputasie ingesluit het nie.

“Volgens hom kan hy haar enkels weer suksesvol opbou en dit sal haar in staat stel om te kan loop,” sê Lemeza.

Die familie doen nou alles in hul vermoë om die R2,1 miljoen in te samel wat nodig is vir die reis na Amerika vir die operasies.

Hulle het tot dusver R30 000 ingesamel deur geleenthede, kosstalletjies en koekverkope aan te bied, sowel as met donasies.

“Ons het ook met ’n Back a Buddy-veldtog begin, waar een van die lede van ons Zayaan Charity Centre 1 km sal stap vir elke R20 wat geborg word.”

Die Zayaan Charity Centre is geskep om bewusmaking van die siekte te bevorder, en om operasies vir kinders soos Zayaan te befonds.

Volgens Lemeza is sy en Shafiek in die gelukkige posisie om op hul familie, vriende, en hul geloof in God staat te maak.

“Ons geloof en die krag van duah (gebed), sowel as die vertroue dat Allah nie ’n groter las op ons sal plaas as wat ons kan dra nie, dra ons op hierdie pad,” sê sy.