Max met stuifmeel op sy pels
Max met stuifmeel op sy pels. Foto: Verskaf

Elizabeth Pretorius het dit met skok uitgevind toe haar kat soos gewoonlik water gedrink het uit die blompot waarin haar lelies staan. 

“Ek het dit bloot uitgevind omdat my kat altyd water uit die vase drink en homself in die proses met stuifmeel besmeer het. 

“Toevallig het ’n vriendin kom kuier en dit gesien. Sy het my daarvan vertel omdat ’n kliënt van haar se katjie by die dood omgedraai het.” 

Elizabeth het ná die nuus vir Max na ’n veearts gevat waar hulle nierfunksietoetse gedoen het en hom vir twee dae op ’n drup gesit het. 

Volgens dr. Liesel van der Merwe van Onderstepoort se Veterinêre Akademiese Hospitaal in Pretoria is lelies dodelik vir katte. 

Die hele lelie, insluitend die blom, stuifmeel, blare, stingels en selfs die water in die pot, kan ’n kat se dood beteken. 

Foto ter illustrasie: Pexels/Manuel Alvarez
Foto ter illustrasie: Pexels/Manuel Alvarez

Sy sê die gifstowwe van die lelies veroorsaak nierversaking. 

“Katte is van nature baie nuuskierig en wil ondersoek instel as daar nuwe blomme of plante in die huis is. Gewoonlik sal die stuifmeel op hulle pels agterbly en hulle sal daarna hulself skoonmaak en so die gifstowwe inkry. Baie min van die gifstowwe is nodig om skade aan te rig.” 

Volgens Liesl kan die eerste teken van vergiftiging binne 12 tot 24 uur gesien word. 

Die tekens sluit in ’n tekort aan energie, naarheid en ’n gebrekkige aptyt. 

“As behandeling binne 18 uur geskied, is die kanse goed dat die kat sal oorleef, maar sodra daar nierversaking is, is die kanse goed dat die kat uitgesit moet word.

“Moenie lelies in jou huis inbring as jy ’n kat het nie, en moenie lelies plant as jy weet jou bure het katte nie.”

Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe