Wêreldwye paniek; dis wat jy kry.

Die sogenaamde momo-uitdaging was die afgelope paar dae in die nuus nadat ouers gewaarsku is van ’n virale “selfdoodspeletjie” wat glo op YouTube aan die toeneem is.

As deel van die uitdaging word kinders glo aangemoedig om hulself seer te maak nadat hulle kontak gemaak het met ’n raaiselagtige vrou met uitpeul-oë wat daarin geslaag het om kinders se YouTube-video’s te kraak. 

Maar volgens The Guardian maan kenners die momo-uitdaging is niks anders nie as “paniek” wat deur volwassenes versprei word. 

Die UK Safer Internet Centre noem die uitdaging “vals nuus”, terwyl YouTube sê hulle het geen onlangse bewyse van die uitdaging op die platform gevind nie. 

In verskeie koerantberigte word beweer die uitdaging word met die dood van 130 tieners in Rusland verbind, maar die berigte is nog nie deur die relevante owerhede bevestig nie, berig BBC.

“Ons moet ophou praat oor die kwessie sodat dit nie meer ’n kwessie is nie.”

Ten spyte van die paniek van die afgelope 48 uur is dit nie die eerste keer dat die momo-uitdaging of die monsteragtige vrouekop na vore kom nie. 

Dit het in Julie 2016 die eerste keer verskyn toe ’n YouTube-gebruiker met die naam AL3XEITOR ’n video gelaai het waarin hy sy foon voor die kamera hou en vir kykers die grieselrige beeld van die momo-wese op die skerm wys, berig Mashable. 

Die Spaanse vlogger beweer hy probeer haar op WhatsApp kontak. Hy stuur vir haar verskeie boodskappe en probeer dan die nommer bel.

Tien minute gaan verby en niks gebeur nie.

Die bisarre video is AL3XEITOR se gewildste nog en ander YouTubers het op die lawaaiwa gespring om hul eie “momo”-ervarings (of gebrek daaraan) te deel. En so word die monster – en die splinternuwe hedendaagse mite – toe gebore. 

“Die internet laat hedendaagse mites in ’n kits versprei,” het Trevor Blank, ’n assistentprofessor aan SUNY Potsdam en skrywer van Slender Man Is Coming: Creepypasta and Contemporary Legends on the Internet, aan Mashable gesê.

“In die verlede sou dit 'n hedendaagse mite jare neem om vlakke van berugtheid te bereik.” 

Interessant genoeg is die oorsprong van die figuur ook nagespoor. Dis eintlik ’n foto van ’n beeldhouwerk deur die Japannese spesiale-effekte-maatskappy Link Factory. Die popkultuurwebtuiste Know Your Meme berig dit bestaan al sedert 2016.

“Al word dit met die beste bedoelings gedoen, het die publisering van die kwessie net jong mense se nuuskierigheid geprikkel,” sê Kat Tremlett, bestuurder van skadelike inhoud by die UK Safer Internet Centre.

“Dis ’n mite wat nou verewig word as dat dit die een of ander soort werklikheid is,” sê sy.

“Ons moet ophou praat oor die kwessie sodat dit nie meer ’n kwessie is nie.”

Bronne: The Guardian, BBC, Mashable, Know Your Meme