HAAR droomtroue was haarfyn beplan: die volmaakte rok wat haar soos ’n sprokiesbruid sou laat voel, die perfekte dekor en ’n uitgesoekte trouplek vir lekker kuier. Niks sou keer dat die voormalige beroepstennisspeler Zanele Ndlovu (25) met die man van haar drome trou nie – nie eens die amputasie van haar arm vyf dae voor die groot dag nie.

Die pragtige vrou van Zimbabwe en haar Britse bruidegom, Jamie Fox (27), het nuwe betekenis gegee aan die troubelofte “in lief en leed” toe die paartjie afhaak met wat oor is van die stralende bruid se regterarm in verbande.

Al wat anders was as wat Zanele voor die troue beplan het, was die troulokaal: Pleks van die sportklub wat sy vir die groot dag gekies het, is die seremonie in ’n hospitaalkapel gehou.

Hoekom? Want haar arm is minder as ’n week voor haar troudag in ’n aanval deur ’n krokodil afgeruk . . .

“Ek het baie tyd bestee aan die voorbereidings vir my troudag; rondgehardloop op soek na die ideale lokaal, dekor en dies meer. Ek het nie geweet die noodlot sou maak dat ek minus ’n ledemaat in ’n hospitaalkapel trou nie,” het die pasgetroude Zanele aan die Zimbabwiese koerant The Chronicle vertel.

Haar verloofde se familie uit Kent, Engeland, was reeds in Zimbabwe vir die troue en Zanele wou voor die groot dag vir hulle haar tuisland se natuurskoon wys.

Hulle was in ’n kano op die Zambezirivier naby die Victoriawaterval toe die ramp haar tref.

Vyf dae nadat Zanele Ndlovu se arm deur ’n krokodil op ’n kanovaart in die Zambezi afgeruk is, het sy in ’n hospitaalkapel in Bulawayo met Jamie Fox getrou.

“Die water was baie kalm,” vertel Zanele. “Ons het gidse gehad en daar was sowat sewe kano’s in die water.

“Die krokodil het net uit die water gespring en ’n stuk van my arm saam met die kant van die boot afgeruk.”

Die kano het afgeblaas en daarna het alles baie vinnig gebeur.

“Die krokodil het my weer gebyt en in die water ingetrek. My man is aan die ander kant uitgegooi en die boot was tussen ons twee.”

Jamie kon sy oë nie glo nie. “Ek het gedink iemand bak vir ons ’n poets. Dit het my sowat vyf sekondes geneem om te sien dis werklik,” het hy aan The Chronicle vertel.

Hy het dapper tot haar redding gekom, sê Zanele. “Jamie het geswem tot waar ek met die krokodil gesukkel het terwyl dit my na die bodem van die rivier probeer trek het. Hy het my om die middellyf gegryp en met die ander hand die houe op die krokodil laat neerreën. Jamie is beskeie toe hy die storie verder vertel.

“Die krokodil het net eindelik laat los,” sê hy. Hy het Zanele, wie se regterarm aan ’n flenter net bokant haar elmboog gehang het, met die hulp van geskokte gidse na veiligheid gedra.

Zanele het baie bloed verloor en Jamie het ’n noodtoerniket aan haar arm gesit. Sy kon sien hy is geskok, maar Jamie het haar aanhou verseker sy gaan oukei wees.

Jamie en Zanele in Zimbabwe.

“Die pyn was ondraaglik, maar met my man aan my sy het ek die krag bymekaargeskraap om daardeur te veg.”

Zanele is per helikopter na ’n hospitaal op die dorpie Victoria Falls gevlieg voor sy na die Mater Dei-hospitaal in Bulawayo oorgeplaas is. Chirurge het haar arm daar geamputeer.

Maar die dokters het nie net haar lewe gered nie – die mediese span het ook Zanele se droom help waar word.

Sy was verpletter toe sy uitvind sy kan nie die hospitaal verlaat vir die troue wat sy so noukeurig beplan het nie.

Maar haar wanhoop het in vreugde verander toe die hospitaalpersoneel ingryp en ’n romantiese seremonie met ’n Metodistiese pastoor in Mater Dei se kapel reël – op dieselfde dag dat sy en Jamie sou afhaak.

“Dit het nog nooit vantevore gebeur nie; dis nogal opwindend,” het ’n personeellid aan Sunday News gesê terwyl nuuskierige simpatiseerders die kerk gevul het. “Jy kan sien mense is opgewonde hieroor.”

Intussen het sommige gaste wat nie geweet het watter drama voor die troue afgespeel het nie ’n paar blokke daarvandaan by die Busters-sportklub in Hillside, Bulawayo, vir die beplande seremonie bymekaargekom.

Toe familielede hulle vertel wat gebeur het, was hulle geskok, maar die verliefde bruidspaar het laat weet hulle moet asseblief voortgaan en die bruilof in hul afwesigheid vier. In ’n video wat van die ongewone seremonie geneem is, stel die gaste selfs by die onthaal ’n heildronk in op die afwesige bruidspaar.

In die hospitaalkerk het die bruid asemrowend gelyk in haar kortmoukantrok en haar min gesteur aan die verbande aan haar lyf. Sy het net oë gehad vir haar held en bruidegom.

“Ek het ’n wonderlike man,” het Zanele gesê. “My troue was die beste. Ons het die onthaal op video’s gekyk en foto’s gesien. Dit was pragtig.

"Ek wens regtig ons was daar, maar ek is baie gelukkig dat die troue ondanks al die drama voortgegaan het.”

‘Die voorval het my die diepte van ons beloftes nog meer laat ervaar’.
Jamie en Zanele geniet dit om Zimbabwe se natuurskoon te verken.

Zanele weier om haar te verknies oor die ervaring wat haar by die dood laat omdraai het. “Ek raak depressief as mense hier kom en begin huil, jy weet,” sê sy.

Die jong vrou, wat al aan internasionale tennistoernooie oor Suider-Afrika heen deelgeneem het, glo sy sal steeds kan tennis speel omdat sy linkshandig is.

Die paartjie beplan om na Engeland te verhuis, maar vir eers bring Zanele haar dae by familie in Bulawayo deur. Sy is uit die hospitaal ontslaan, maar is nog op die herstelpad.

“Ek weet mense bejammer my op die oomblik, maar om beswaard te wees help nie die situasie nie,” sê sy.

“Ek sien uit na familie en vriende wat my laat lag en my nie herinner aan wat aangaan nie. Daar is altyd iets positiefs om te vier. Kyk net na die pragtige uitsig. Sonskyn en groenigheid . . . dis pragtig.”

Dis dié optimisme wat Jamie tot Zanele aangetrek het.

Dit was liefde met die eerste oogopslag vir die welsynwerker toe hy haar in 2016 tydens ’n werkbesoek aan Zimbabwe ontmoet. “Ek het net daar geweet ek wil met haar trou,” sê hy.

Jamie het die land ’n paar keer besoek en met Zanele begin uitgaan.

“Ek het eindelik in Februarie 2018 die jawoord by Antelope Park in Gweru, Sentraal-Zimbabwe, gevra. Ek was erg op my senuwees, want ek wou hê sy moes ja sê.”

Nadat hy lobola betaal het, het Zanele die troue begin beplan. En al moes die groot dag weens omstandighede aangepas word, is dit vir Jamie wonderbaarlik dat sy verloofde oorleef het om sy vrou te word.

“Daar is geen ander manier om dit te verduidelik nie. Ek het haar nog liewer. Die voorval het my die diepte van ons troubeloftes nog meer laat ervaar. In goeie en slegte tye, deur voor- en teëspoed – dis hoe dit gaan wees.”

BRONNE: DAILYMAIL.CO.UK, EWN.CO.ZA, CHRONICLE.CO.ZW

FOTO'S: BUNGU, FACEBOOK/JAMIEFOX