Die skattige 4-jarige Lemieke le Roux was baie hartseer toe sy Sondag 26 Mei haar ma, Amanda (37), inlig dat haar speelgoedhondjie, die animasiereeks Paw Patrol se Marshall, ewe skielik “siek” geraak het.

“Sy het eers gesê dat Marshall se maag seer is, en toe later ook verduidelik dat dit sy been is. Later het sy weer gesê dit is eintlik net sy maag wat seer is,” vertel Amanda aan Huisgenoot.

Toe Lemieke steeds die daaropvolgende dae sê dat Marshall nie lekker voel nie en nie meer met haar wil speel nie want hy is siek, het Amanda en haar man, Louis (46) ’n plan beraam. 

veearts
Lemieke en haar "hondjie" Marshall. Foto: Facebook.

Sy het aanvanklik op die Amanzimtoti Trader-Facebookgroep gevra of iemand nie moontlik kan help nie, en is verras gewees toe dr. Tammy Talbot, ’n plaaslike veearts van Seadoone Veterinary Clinic net buite Amanzimtoti in KwaZulu-Natal, haar hulp aanbied.

Hoewel klein Marshall nie ’n lewendige hondjie is nie, het Tammy die volgende dag die speelgoedhondjie deeglik ondersoek. Daar is na sy hartjie, asemhaling en oë gekyk om seker te maak dat Marshall die regte medikasie vir sy “toestand” ontvang.

Tammy het vasgestel dat Marshall twee inspuitings benodig; een vir die pyn en een wat antibiotika bevat.

“Toe Tammy inspuitings voorstel, het ek gedink hier kom ’n storie. Maar Lemieke het vir die veearts geluister en Marshall vasgehou en plegtig gesê dat hy nie bang is vir inspuitings nie,” vertel Amanda.

Lemieke was verlede jaar in Maart vir twee weke in die hospitaal om ’n E. Coli bakteriële infeksie te behandel, vertel Amanda. “My kinders ken ongelukkig hospitale. Lemieke het al ’n paar keer vir my gesê wanneer ’n mens siek is, moet jy inspuitings en ’n drup kry om gesond te word,” sê sy. 

Amanda het die storie op haar Facebook geplaas en haar inskrywing het duisende reaksie gekry.

veearts
Marshall by die veearts. Foto: Facebook.

“Ek dink Lemieke is bly dat iemand haar ’n slag ernstig opgeneem het,” vertel Amanda.

Toe hulle by die veearts uitloop, het Lemieke vir haar ma gesê dat sy baie dankbaar is dat hulle veearts toe kan kom. “Sy het vir my gesê Marshall voel nog nie heeltemal beter nie, maar dat die ‘tannie-dokter’ gesê het dat hy binnekort beter sal voel,” sê Amanda.

Lemieke het Marshall by haar oom as geskenk gekry tydens Paasfees vanjaar en hy is “haar beste maatjie,” vertel Amanda.