Christopher Robin Turner by sy vrou, Chelsea.
Christopher Robin Turner by sy vrou, Chelsea. Foto: Mercury Press & Media Ltd/Magazinefeatures.co.za

Dink jou net in. Elke oggend as jy jou oë oopmaak, ken jy nie die wêreld om jou nie. Die die bed waarin jy wakker word of die vrou langs wie jy wakker word nie.

Vir Christopher Robin Turner (36) van Victoria in Kanada is dit sy realiteit. Hy ly aan ’n seldsame vorm van narkolepsie. Dit veroorsaak onder meer helder drome wat hipnagogiese hallusinasies en geheueverlies veroorsaak.

Christopher sê sy lewe is baie soortgelyk aan die romkom 50 First Dates, waarin Adam Sandler en Drew Barrymore die hoofrolle vertolk. Daarin ly Drew se karakter aan korttermyngeheueverlies – elke dag moet haar lewe van vooraf begin.

Elke oggend los sy vrou, Chelsea (28), briefies langs die bed om sy lewe aan hom te verduidelik. Die briefies sê vir Christopher wat sy naam is, watter werk hy doen, sy vrou se naam, die naam van hul twee honde, Fox en Panda, en vertel hom oor sy toestand. 
Chelsea, los briefies langs die bed om sy lewe aan
Chelsea, los briefies langs die bed om sy lewe aan hom te verduidelik. Foto: Mercury Press & Media Ltd/Magazinefeatures.co.za

Hy en Chelsea het 10 jaar gelede by die werk ontmoet en was dadelik smoorverlief. Die paartjie het gou saam ingetrek en is vyf jaar later getroud. 

“Met die eerste afspraak was dit liefde met die eerste oogopslag,” sê hy. “Ek was eerlik met haar toe ons mekaar ontmoet het. Baie narkolepsielyers knoop vehoudings aan wat nie hou nie omdat dit moeilik raak vir die lewensmaat.

“Sy skryf al sowat ses jaar briefies. Dis baie sorgsaam van haar en ek waardeer dit, want dis nie aldag dat iemand so begrypend is nie,” sê Christopher. “Die briefies help baie wanneer ek soggens wakker word, want dan weet ek ek is nie alleen nie.

“Daar was al tye waar ek wakker geword en haar nie herken het nie of in die huis rondgedwaal en probeer uitpluis het wie ek is en dan vra sy wat maak ek. 

“Sy het al ’n paar keer vertel ek het wakker geskrik en net daar gestaan en gesê ek weet nie waar ek is nie.

"Dis moeilik om te verduidelik, maar ek het twee tot drie drome per nag en dis so realisties en helder. Ek herleef my verlede soos vorige verhoudings en wanneer ek wakker word, is ek vasgekeer in die verlede en weet ek nie waar ek is nie.

“Dis so realisties en as ek byvoorbeeld in my droom deur ’n by gesteek word, kan ek dit voel. Daar was al drome waar ek vir myle op gruis gestap het en wanneer ek wakker word, pyn my voete. Wanneer ek ’n rukkie wakker is, pas my liggaam weer aan en ek keer terug.”

Christopher ly aan narkolepsie.
Christopher ly aan narkolepsie. Foto: Mercury Press & Media Ltd/Magazinefeatures.co.za

Narkolepsie is ’n seldsame langtermynbreintoestand wat veroorsaak dat ’n persoon op onvanpaste tye aan die slaap raak. Dit kan ook skielike spierverlies veroorsaak wat deur sterk emosies of harde geluide aangebring kan word. 

Dit is op 16 by Christopher gediagnoseer nadat hy in ’n botsing met sy motor betrokke was toe hy agter die stuur aan die slaap geraak het. “Niemand het toe geweet van narkolepsie nie en daar was nog nie internet nie, maar toe ek by ’n neuroloog gaan aanklop, het hulle gesê ek is die mees narkoleptiese persoon wat hulle nog gesien het.

“Dit gaan heel goed met my noudat ek ouer is, maar as ek nies, moet ek aan ’n stoel vashou en ek maak seker ek sit baie. As ek kwaad word, kan ek val.”

Christopher by sy hondekind.
Christopher by sy hondekind. Foto: Mercury Press & Media Ltd/Magazinefeatures.co.za