Dié balletdanser het op 11 jaar ophou groei omdat haar kosallergieë so erg geraak het dat sy geweier het om enigiets anders as worsies te eet. 

Errin Godwin Whalley het haar eerste allergiese reaksie vir hoemoes gehad toe sy net een jaar oud was. 

Sy het so bang geword om te eet dat dokters vir haar ’n voedingsbuis moes gee. 

Die gevolg was dat Errin (nou 17), van Pitlochry in Skotland, slegs worsies en pasta wou eet. Op 11 was die danser dieselfde grootte as ’n sesjarige kind omdat haar dieet haar groei belemmer het. 

Die student het egter nou haar eetprobleem oorkom – en het dit selfs reggekry om haar droom na te volg om ’n danser te word en ’n plek by ’n gesogte Royal Ballet-skool losgeslaan. 

“Ek onthou nie veel van my eerste reaksie nie, want ek was net ’n baba, maar ek onthou ek was so bang om nuwe goed te probeer en was angstig met etenstye,” vertel Errin.

“Al wat ek wou eet, was worsies en pasta, want in my kop het ek net geweet kos maak my siek. 

“Al wat ek kon doen, was om die kos van een bord na die ander oor te skuif.” 

Die tiener se ma, Myette (52) en pa, Mike (43), het gesukkel om hul dogter gesond te hou deur haar uiterse fobie, en was vreesbevange dat haar toestand sou versleg.

Foto: Magazine Features.
 “Ons was op pad na Devon met vakansie toe Errin haar eerste allergiese reaksie gehad het,” sê Myette. 

“Ek het vir haar ’n kraakbeskuitjie met hoemoes aangegee waar sy op die agtersitplek in die kar was en haar lippe het begin opswel, sy het ’n snaakse kleur gekry en gesukkel om asem te haal.

“ ’n Lugambulans is eindelik gestuur en ’n allergie vir sesamsade en eiers is aanvanklik by haar gediagnoseer. 

“Dit het gevorder na ander allergieë, soos melk, ertjies en alle suiwelprodukte, en van daar het sy alle kosse as gevaarlik beskou. 

“Sy het so maer geword dat jy haar bene kon sien.” 

Dinge het vererger toe sy vier jaar oud was. Errin is met ’n virus by die Royal Lancaster-hospitaal opgeneem. 

Dokters was bekommerd sy is te ondervoed om teen die infeksie te baklei. 

Daar is later ontdek Errin ly aan ’n toestand genaamd meervoudige pituïtêre hormoontekort (MPHD) – ’n toestand wat ’n tekort veroorsaak van verskeie hormone wat deur die pituïtêre klier, wat aan die basis van die brein geleë is, vervaardig word, volgens Genetics Home Reference.

Sy het egter met behulp van haar ouers en dokters uiteindelik sekere kosse begin eet, tot sy eindelik spaghetti bolognese en selfs ’n tipiese Sondagmaaltyd geëet het. 

“Toe sy die eerste keer die groot maaltyd eet, het ons almal gejuig, maar daar is nog sekere kosse wat sy stresvol vind, soos vrugte of enigiets wat gemeng is, soos risotto,” sê haar ma. 

Errin, wat net 1,2 m in haar balletskoene staan, gebruik nou ’n daaglikse groeihormooninspuiting om die hormone te vervang wat haar liggaam nie vervaardig nie. 

Maar ten spyte van haar toestand en klein lyf het die dapper tiener ’n plek in die Ballet West-skool losgeslaan. 

Foto: Magazine Features.

“Ek en Mike het jare lank ’n teatermaatskappy bestuur, en sy was dus in die bedryf gebore. Sy het as baba in haar drasak langs die verhoog gesit terwyl ek optree, en sy was heeltemal verslaaf toe ons haar neem om Die Neutekraker te gaan kyk. 

“Ballet West is wonderlik en het haar regdeur haar toestand ondersteun,” sê Myette. 

Errin hoop nou om groot dinge in ballet te bereik en studeer ook vir haar finale skooleksamen.

“Met die mediese hulp en harde werk het sy die krag en tegnieke verwerf wat nodig is om ’n balletdanser te word,” sê die ma van twee. 

“Omdat sy klein is, help dit haar om die rolle te kry waar sy opgetel en gegooi word. 

“Dit kan ’n hindernis wees vir sommige dansskole omdat hulle hou van dansers van ’n sekere lengte, maar sy is vasberade om haar eie loopbaan uit te kerf en daar is tog ook kort dansers. 

“Jy moet jouself ’n bietjie meer bewys deur hoër te spring en vinniger te draai. Dis ook goed vir wanneer sy jong karakters speel. 

“Sy het baie hard gewerk om hierdie plek los te slaan.”