Arno Potgieter (22) in die hospitaal nadat hy op 2
Arno Potgieter (22) in die hospitaal nadat hy op 26 Februarie in 'n ernstige motorongeluk betrokke was. Foto: Verskaf.

Sedert Steven Potgieter se oudste seun, Arno, op Vrydag 26 Februarie in ’n gru-motorongeluk in Secunda was, het hul lewe onherroeplik verander.

“Daar lê nog ’n lang, moeilike pad voor ons,” erken Steven aan Huisgenoot oor Arno wat steeds verlam in die hospitaal lê nadat hy sy nek gebreek het.

Weens die voortslepende covid-19-pandemie kon Steven (43) en Sonika (41), wat in Meyerton woon, eers onlangs weer hul seun in die hospitaal besoek. Maar selfs dit is ’n opdraande stryd, aangesien net een persoon per dag 15 minute lank by Arno (22) kan inloer.

Arno se familie het onlangs vir hom oor Paasnaweek
Arno se familie het onlangs vir hom oor Paasnaweek in die hospitaal gaan kuier. Foto: Verskaf.

“As iemand by hom is, dan gesels ons oor hoe hy voel, en ek koop en voer vir hom ’n roomys of jogurt,” verduidelik Steven, wat ook ’n 20-jarige seun het.

Arno kan tans sy arms beweeg, maar het nie gebruik in sy hande, of van sy middellyf af nie. Tog het hy ’n manier gekry om die foon wat sy ouers vir hom gegee het, “so te maneuver dat hy hom kan antwoord.”

“Ons het elke dag met hom gepraat wat ons hom nie kon sien nie, en doen dit steeds. Dan praat ons mekaar moed in. Dan sê hy vir my: ‘Pappa, moenie moed verloor nie, als sal regkom,’ ” vertel Steven. 

Skanderings wys Arno het sy nek gebreek.
Skanderings wys Arno het sy nek gebreek. Foto: Verskaf.

Steven, ’n lugreëling-tegnikus, was in Kempton Park toe hy daardie angswekkende oproep van sy broer in Secunda ontvang het.

“My broer het my gebel en gesê: ‘Jy moet hier kom, jou laaitie was in ’n baie ernstige motorongeluk’,” onthou Steven die oproep met sy broer, John Potgieter.

“Toe begin John huil, en ek het dadelik geweet ek moet in Secunda uitkom. Ek moet by my kind uitkom. Dis al wat deur my kop gegaan het,” voeg Steven by.

Die bakkie waarin Arno gery het toe hy in die onge
Die bakkie waarin Arno gery het toe hy in die ongeluk was. Foto: Verskaf.

Arno het administratiewe en tegniese werk vir John se onderneming gedoen. Op daardie Vrydag in Februarie was hy besig om met John se GWM-bakkie in Helen Joseph-straat af te ry toe ’n ander kar oor ’n stopstraat jaag en in hom vasry.

“Arno het nie ’n sitplekgordel gedra nie, en is toe uit die kar uit geslinger soos die kar gerol het. Die bakkie het eers op sy sy tot stilstand gekom, maar val toe oor op sy dak,” vertel Steven emosioneel.

“Toe lê Arno in die motor se pad op die grond, en die hele neusgedeelte van die motor beland bo-op hom,” sê hy.

Hy is na verskeie staatshospitale oorgeplaas voor hy uiteindelik sowat ’n week ná die ongeluk na Heidelberg-hospitaal geskuif is, sodat hy nader aan sy ouers in Meyerton kan wees.

“Ons het geen idee wanneer hy eindelik ontslaan gaan word en wat die herstelpad vorentoe gaan behels nie,” verduidelik Steven.

Maar al lyk die toekoms troebel, bly Steven en sy gesin positief dat Arno sal genees. “Ons hoop en glo maar hy gaan herstel. Die een dokter sê een ding en die ander een ’n ander ding, maar met genade van Bo, hoop ons hy kom reg,” sê Steven. 

Kom neem deel aan die gesprek
Volg Huisgenoot op FacebookTwitterInstagram en TikTok, en teken gerus in op ons nuusbriewe.