Hunter Biden se vrou, Melissa Cohen, sê hy het ’n
Hunter Biden se vrou, Melissa Cohen, sê hy het ’n hart van goud. Foto: ABC News

Toe daar ná ’n naelbytstryd eindelik ’n uitslag in die Amerikaanse presidentsverkiesing kom, het die aangewese president, Joe Biden, in Delaware die verhoog betree om sy ondersteuners te bedank.

Langs hom was sy familie, oftewel die “Biden clan”, soos hy hulle noem: sy vrou, Jill (69), en sy seun Hunter (50) met die president se sewe maande oue kleinkind, Beau, in sy arms.

Op die verhoog ná Joe Biden se oorwinning in die v
Op die verhoog ná Joe Biden se oorwinning in die verkiesing. Van links is Biden, sy vrou, Jill, Hunter en Melissa by hul babaseun, Beau. Foto: Gallo Images/Alamy

Langs Hunter was ’n blonde vrou, uitgevat in ’n kanariegeel uitrusting – met haar oë wat bo ’n masker glimlag: die 34-jarige Melissa Cohen, Hunter se vrou van die afgelope jaar. Dat sy deel is van die hegte familie kon ’n mens duidelik sien.

Maar wat dié verskyning nie kon verklap nie, is dat Melissa eg Suid-Afrikaans is, soos sonskyn, braaivleis en biltong. 

Ja, Suid-Afrika het nou ’n direkte skakel met die Withuis en die man wat in Januarie ingehuldig sal word as die nuwe Amerikaanse president. Melissa en Hunter is op 16 Mei verlede jaar in ’n intieme seremonie in haar woonstel in Los Angeles getroud – slegs 10 dae ná hul ontmoeting.

’n Gas het hul troufoto’s sommer met ’n selfoon geneem. Sy is sy “redding” en “beskermer”, het Hunter vyf maande ná die troue aan ABC News gesê. 

Hy was voorheen aan dwelms verslaaf en het tydens sy pa se verkiesingsveldtog onder kritiek van Donald Trump deurgeloop. Dié het Biden probeer bykom deur te suggereer dat Hunter voorheen by onderduimse sakebedrywighede betrokke was.

Maar Melissa sê die moeilike tydperk in die politiek het hul toewyding tot mekaar versterk.

“Dit het ons band net getoets en duideliker gemaak hoe sterk dié band regtig is,” het sy aan ABC News gesê. 

Sy was nooit bekommerd dat die druk daartoe sou lei dat Hunter ’n terugslag met sy verslawing sou beleef nie, vertel sy in haar eiesoortige aksent tydens die videogesprek met ABC News.

“Hy is ongelooflik sterk.” 

Sy het die skoot duidelik hoog deur. “Hy is wonderlik en goedhartig. Ek weet nie hoe enigeen wat Hunter ken nie vir hom lief is nie. Hy het ’n hart van goud.” 

Melissa word deur haar familie beskryf as merkwaardig en intelligent. Foto: Facebook
Melissa word deur haar familie beskryf as merkwaardig en intelligent. Foto: Facebook

Melissa kom uit ’n hegte Joodse familie van Johannesburg en sy is die jongste van ma Zoe, ’n maatskaplike werker, en pa Lee, nou afgetree, se vier kinders. 

Haar broer, Garyn Cohen, ’n voetheelkundige van Johannesburg, beskryf Melissa as vry van gees, kunstig en avontuurlustig.

“Dit is nie moeilik om verlief te raak op my suster nie; sy is beeldskoon binne en buite,” het Garyn aan die South African Jewish Report (SAJR) gesê.  

“Sy is ’n voorstander van natuurbewaring en die omgewing en gee om vir minderbevoorregtes en mense van alle agtergronde. Sy is merkwaardig, intelligent en het ’n spesiale siel.” 

Nadat Melissa, onder haar naastes bekend as Missy of Mel, aan die King David School in Victory Park, Randburg, matrikuleer het, het sy ’n B.A. in binneontwerp aan die Greenside Design Centre College of Design studeer en dié kwalifikasie in 2007 ontvang. 

Op 21 het sy Los Angeles toe getrek om ’n kursus in tuinboukunde te doen, en daar het sy die entrepreneur Jason Landver ontmoet. Hulle is in 2012 in Stellenbosch getroud, maar het twee jaar later geskei. Die paartjie is op goeie voet uit mekaar, het ’n vriendin aan die Daily Mail gesê.

As jong meisie het sy haarself graag “jungle girl” genoem omdat sy op haar gelukkigste was in die natuur, omring deur diere.

Sy het toe vir ’n maand lank oorsee gereis om dit te verwerk, en het daarna teruggekeer na Amerika. 

Sy is mede-eienaar van Tribal Worlds, ’n maatskappy met die missie om “inheemse bewaring te bevorder”, berig die Washington Post.

As jong meisie het sy haarself graag “jungle girl” genoem omdat sy op haar gelukkigste was in die natuur, omring deur diere.

“Sy is lief vir diere en die natuur en is heftig teen stroping gekant,’” sê die vriendin, en voeg by dat Melissa “nog nooit konvensioneel was nie”.

“Mel is baie spiritueel en glo in karma en mistieke energie – sy is baie ‘liefde, lig en vrede’-mens. Sy’s waarskynlik die vryste gees wat ek ken en almal het haar innig lief.” 

Sy het ’n hegte vriendekring en is na aan haar familie.

“Mel is toegewyd aan haar ouers en broers, Garyn, Dalan en Josh. Sy is mal daaroor om haar broerskinders se ‘Tannie Loo’ te wees en dra hulle op die hande,” het die vriendin aan die Daily Mail vertel.

Sy en Hunter het deur gemeenskaplike vriende ontmoet en was onmiddellik aangetrokke tot mekaar. Hunter het kort ná hul ontmoeting presies dieselfde tatoeëermerk as Melissa s’n gekry.

Die tatoe? “Shalom” – die Hebreeuse woord vir vrede. 

Hunter en Melissa het afgehaak 10 dae nadat hulle
Hunter en Melissa het afgehaak 10 dae nadat hulle mekaar ontmoet het, en hy het kort daarna dieselfde tatoe as Melissa gekry, die Hebreeuse woord vir vrede: “Shalom.” Foto: ABC News

“Ek het oombliklik op haar verlief geraak,” het Hunter aan ABC gesê. “En sedertdien het ek elke dag net nog meer verlief geraak op haar.” 

Hunter het sy pa op hul troudag gebel om die nuus te deel, het hy aan The New Yorker gesê. 

“Ek het my pa op die luidspreker gesit, en hy het aan Melissa gesê: ‘Dankie dat jy my seun weer die moed gegee het om lief te hê.’ ” 

Melissa het op haar beurt dadelik geweet sy wil met Hunter trou, het Garyn aan die SAJR vertel. 

Die oomblik toe ek Hunter ontmoet het, het ek geweet dit is die persoon saam met wie ek die res van my lewe wil deurbring.

“Melissa het gesê sy glo in liefde met die eerste oogopslag, en nadat hulle ’n week saam deurgebring het, het hulle besluit daar is geen nut daarin om dit uit te stel nie.

Dit is soos ’n sprokiesverhaal.” 

Die nuwe mev. Biden het dit self so aan die SAJR gestel: “Die oomblik toe ek Hunter ontmoet het, het ek geweet dit is die persoon saam met wie ek die res van my lewe wil deurbring. Ons het baie in gemeen. Ons is baie gelukkig saam.” 

Die kroon op hul eerste gelukkige jaar saam was die geboorte van die paartjie se babaseun in Mei vanjaar.

Hunter het ook drie kinders saam met sy eksvrou Kathleen, en ’n baba saam met die Amerikaanse ontkleedanseres Lunden Roberts (28). Hy het ontken dat hy die pa van haar kind is, maar ’n biologiese toets het bepaal dit is wel sy kind.

Ná Beau se dood het Hunter ’n verhouding met sy broer se weduwee – sy skoonsuster, Hallie – aangeknoop, terwyl hy nog met Kathleen getroud was.

Die jongste Biden-kleinkind is genoem na Hunter se wyle broer, Beau, wat in 2015 op 46 aan breinkanker oorlede is. 

Ná Beau se dood het Hunter ’n verhouding met sy broer se weduwee – sy skoonsuster, Hallie – aangeknoop, terwyl hy nog met Kathleen getroud was.

Die egpaar is kort daarna, ook in 2015, geskei. Hy en Hallie het mekaar getroos ná die dood van Beau, het Hunter aan The New Yorker gesê.

“Ons het ’n baie spesifieke hartseer gedeel. Ek het aan Hallie begin dink as die enigste persoon wat my verlies verstaan het.” 

Maar nou lyk dit asof hy eindelik tot rus gekom het. Hy en Melissa lei ’n betreklik normale en onomstrede lewe.

Hulle bly in Los Angeles en die voormalige prokureur verf graag in die kunsateljee by hul huis.

Biden soen sy sewe maande oue kleinseun, Beau, by die vierings in Delaware nadat hy koning gekraai het in die onlangse Amerikaanse verkiesing. Foto: Gallo Images/Alamy
Biden soen sy sewe maande oue kleinseun, Beau, by die vierings in Delaware nadat hy koning gekraai het in die onlangse Amerikaanse verkiesing. Foto: Gallo Images/Alamy

“Dit hou my letterlik gesond van gees,” sê hy.

Hy was aan sy vrou se sy toe sy die eed aflê om ’n Amerikaanse burger te word en volgens verskeie vertellings is die twee salig gelukkig saam.

Melissa se gesin het die besluit geneem om nie oor hul dogter se huwelik te praat nie, buiten aanvanklike kommentaar om hul ondersteuning uit te spreek.

“Dit is inderdaad ’n sprokiesverhaal, en ons wil net hê Melissa moet gelukkig wees,” sê Garyn.

“Sy is ’n baie spesiale meisie,” het ma Zoe aan die Washington Post gesê. “Hulle is baie gelukkig.”

Bronne: The New Yorker, ABC News, South African Jewish Report, People.com, businessinsider.co.za, New York Post, BBC.com, The Sun, The Daily Mail, The Washington Post, pagesix.com; FOTO'S: GALLO IMAGES/ALAMY, ABCNEWS, FACEBOOK
Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe