“JD beweeg sy arms en as ek sy nek en beentjies onder vashou dan trap hy vas en staan self op,” vertel die eenjarige JD se oupa Johan Lange (56), oor sy kleinseun, wat in Maart vanjaar byna by sy nuwe dagsorg verdrink het, toe hy in die swembad beland en bygebring moes word.

“Sy nekkie is baie pap so ons moet hom baie versigtig hanteer, want ons kan hom seermaak,” benadruk ook sy ma, Jessica (29), aan Huisgenoot. 

jd lange,verdrinking
Klein JD Lange. Foto: Verskaf


Johan vertel JD se gebreekte been het intussen volkome herstel. 

Huisgenoot het vroeër berig JD het ná die voorval uiteindelik 58 dae in die hospitaal deurgebring, voordat hy in Mei vanjaar inderhaas weer in die Rooi Kruis-kinderhospitaal in Kaapstad opgeneem moes word. Sonder dat enigiemand dit besef het, het JD, wat erge breinskade weens die voorval opgedoen het, al die tyd ook sy been in die voorval gebreek.

jd lange
JD se nek is baie pap. Foto: Facebook

Dit was eers nadat hy tuis simptome van hoëkoors en braking getoon het, bepaal dat JD se been reg onder sy regterknie gebreek het.

Sy oupa, wat saam met sy ma na hom omsien, sê hoewel die been nou volkome herstel het, gaan hy nou ’n staanraam moet kry om hom te help om sy middellyf en nek te kan gebruik. Fondse vir die staalraam soek hulle nog.

Jessica vertel hulle het sover alles vir JD probeer doen om hom te help ondanks die geldelike uitdagings. Verlede Vrydag kon hulle hom weer vir die eerste keer vir fisioterapie neem.

jd lange,verdrink
JD se gebreekte been het intussen volkome herstel. Foto: Facebook

“Die fisioterapeut het, toe ons haar gaan sien, gesê sy sien dat ons haar nie meer nodig het nie, want ons doen alles in ons vermoë om hom te help by die huis,” vertel sy moedig.

Jessica erken dit is soms moeilik, maar vertel met klein JD gaan dit beter as ooit tevore. 

Díé ma was nog altyd vol hoop dat sy weer eendag haar seuntjie, soos hy was voor Maart vanjaar, sal terugkry.

jd lange
JD en sy oupa Johan. Foto: Facebook

“Die dokter het gesê ek gaan ’n vegetable huis toe vat en dis glad nie wat ek huis toe gebring het nie. My seuntjie is besig om terug te kom,” vertel sy hoopvol. 

Jessica en haar pa moet op Dinsdag 29 September weer met JD by die Rooi Kruis-kinderhospitaal wees. 

“Hy wil nie lekker sluk nie. Die pyp waardeur hy sy kos inkry gaan hulle nou verwyder en dan ’n ballon insit,” verduidelik sy oupa. 

Dit gaan die eerste keer wees wat hulle weer die hospitaal besoek sedert sy terugslag in Mei.