Die ma van Leonel Riekert (4) het haar hande vol. 

“Mamma praat net gou met die tannie!” sê Mari Malherbe (38) van Parys in die Vrystaat vir haar bekkige dogtertjie op die agtergrond.

Die volgende oomblik het Leonel die foon. “Hallo, tannie,” sê sy soet. “Ek speel met my honde,” vertel sy. 

Reeds twee maande het verloop sedert die fratsongeluk by hul huis.

Klein Leonel Riekert in die hospitaal. Foto: Versk
Leonel Riekert in die hospitaal. Foto: Verskaf
Klein Leonel Riekert in die hospitaal. Foto: Versk
Leonel Riekert in die hospitaal. Foto: Verskaf
Klein Leonel Riekert van Parys het reeds drie oper
Leonel Riekert van Parys het reeds drie operasies ondergaan om die skade aan haar oog te herstel nadat sy op 'n skêr geval het. Foto: Verskaf

Die blondekop het op 2 Junie vanjaar agter een van hul honde aangehardloop met ’n skêr, wat sy sonder haar pa, André (33), se medewete in die hande gekry het. Hy was besig met wasgoed en Mari by die werk toe hy haar gille hoor. Die skêr, sou hulle later hoor, het deur haar linkerwang tot agter in haar oog gesteek toe sy per ongeluk gly en vooroor val.

Ons vra haar hoe dit met haar linkerogie gaan.

“Ja, ek dra my oogklap, tannie,” vertel sy. "En die dokter het druppels in my oog gegooi. Nee, dis nie seer nie."

Mari kan skaars haar lag hou.

“Ja, so gaan dit elke dag. Sy is besig. Dit maak dit juis moeilik om haar rustig te hou met die ogie se genesing. Sy is vreeslik lief vir dans en hand-stands en wawiele. Ons moet net keer,” vertel sy.

Leonel en haar ouer broer, Nathan. Foto: Verskaf
Leonel en haar ouer broer, Nathan. Foto: Verskaf
Klein Leonel Riekert se ma vertel sy is 'n regte r
Klein Leonel Riekert se ma vertel sy is 'n regte rabbedoe. Foto: Verskaf

Sy vertel Leonel se negejarige boetie verstaan ook nie aldag dat sy sussie nie alles saam kan doen nie. Leonel het verlede Maandag ’n derde operasie aan die oog ondergaan, wat erg tydens die voorval beskadig is.

In die eerste operasie het ’n plaaslike oogarts die wonde geheg. Met die twee operasie is hulle na ’n vitro-retinale spesialis in Johannesburg verwys, wat ’n meer delikate operasie aan die beskadigde retina moes uitvoer.

Dit was toe hy nog ’n operasie in Julie moes uitvoer dat hy bevind het die oog het intussen katarakte ontwikkel. Pleks van die retina is sy toe verlede Maandag geopereer om die katarakte te verwyder en ’n lens-oorplanting te kry. Sy is steeds blind in die oog.

Mari vertel al gaan Leonel nou aan soos normaal, was dit vir hulle ’n woeste jaar, veral met Leonel se oupa wat ernstig siek geword het, en haar ouma wat oorlede is. “Toe gebeur die ongeluk. Dit alles was so deurmekaar die laaste maande. Ons is op autopilot. Ek dink die operasies sal dalk baie vinniger kon gegaan het, maar weens die pandemie moes ons al vier voor die operasies eers in isolasie gaan en vir covid-19 toets.”

Sy vertel Leonel verjaar op Kersdag en hulle wil haar graag volgende jaar skool toe stuur.

“Sy is nou by ’n dagsorg, maar ons wil hê sy moet skool toe gaan dat sy kan begin leer om net met die een oog te cope. Die dokter kan nie vir ons met sekerheid sê hoeveel sig sy sal kan herwin en selfs of sy ooit weer sal kan sien nie.

”Maar die hoop beskaam nie. Sy vertel op 21 Augustus sal Leonel weer na die spesialis terugkeer om te kyk wat volgende gedoen kan word. Ons vat dit nou maar net dag vir dag.”