Die polisiekommissaris van Nieu-Suid Wallis, Mick Fuller, het gesê brokkies inligting wat onlangs na vore gekom het ná mediadekking oor Lynette se raaiselagtige verdwyning op 9 Januarie 1982, het ál duideliker in Chris Dawson (70), ’n bekende in Australiese sportkringe, laat swaai.

Chris was glo “kalm en ’n bietjie beteuterd” toe hy Woensdagoggend deur die polisie in hegtenis geneem is. Tog glo sy familie in sy onskuld. In ’n verklaring wat hulle vroeër vandag uitgereik het, spreek hulle hul teleurstelling oor sy inhegtenisname uit.

Hulle glo Lyn, soos sy bekend was, het nog lank nadat sy verdwyn het, geleef en dat “duidelike en onbetwisbare bewyse” bestaan dat dit wel die geval was.

Volgens die inligting aan hulle bekend, het Chris na bewering die oggend van 9 Januarie vir Lyn by ’n bushalte in Mona Vale afgelaai. Later het sy hom glo gebel en gesê sy het tyd vir haarself nodig. En dit was die laaste wat van Lyn gehoor is.

Chris het ses weke gewag voor hy haar as vermis aangemeld het.

Pienk trui

Lyn se liggaam is tot vandag toe nie gevind nie, maar tydens opgrawings deur die polisie het hulle ’n bebloede pienk trui van Lyn gevind wat duidelike tekens van messteke toon.

By die polisiekommissaris bestaan min twyfel oor die rol wat Chris byna 37 jaar gelede in sy vrou se verdwyning uit Sydney gespeel het.

Maar Chris het destyds volgehou sy vrou het met die een of ander kultusgroep deurmekaar geraak en saam met hulle weggeloop.

In 2015 is ’n spesiale taakmag, Strike Force Scriven, tot stand gebring om haar verdwyning en moontlike moord verder te ondersoek.

Jong liefde

Die aantreklike paartjie, wat op 26 Maart 1970 in die Sint Judes Anglikaanse kerk in Randwick, Sydney, getroud is, het mekaar vyf jaar tevore ontmoet. Hy was die aantreklike rugbyligaster en sy ’n pragtige blonde verpleegster wat as ’n dierbare mens beskryf is. Mettertyd het hulle twee dogters ryker geword.

Nadat sy dae op die sportveld tot ’n einde gekom het, het Chris ’n sportonderwyser geword. Dit was juis dié skuif wat die tonge laat klap het. Tien jaar ná sy troudag het die 16-jarige Joanne Curtis in Chris (toe 32) se klaskamer verskyn. Luidens berigte het Chris dit so gereël dat Joanne in sy klas beland omdat die pragtige jong tiener sy aandag getrek het.

Kort voor lank het die twee mekaar in die geheim begin sien.

Verblyfreëlings en 'n 'babaoppasser'

Ná beweerde moeilikheid in haar ouerhuis en gerugte van ’n gewelddadige stiefpa, het Joanne in Oktober 1981 by die Curtis-gesin ingetrek. Die verblyfreëlings het verander in ’n rondomtalie waar Joanne met tye by Chris se ewe aantreklike tweelingbroer, Paul, en ander kere by haar ma gebly het.

Joanne het na bewering tydens haar verblyf by die egpaar ook as babaoppasser vir hul twee dogters opgetree.

Twee dae ná Lyn se verdwyning in 1982 het nog ’n verskuiwing in die Dawsons se huis plaasgevind. Joanne het nie net by die huis nie, maar ook in die hoofslaapkamer ingetrek. Joanne het so tuis gevoel, sy het selfs Lyn se klere en juweliersware gedra.

Die trouklokkies het twee jaar later vir die onderwyser en sy gewese leerder gelui. Haar trouring? Een van Lyn se ringe.

Uit dié vreemde verbintenis is ’n dogter gebore. Maar Chris was nie baie opgetoë daaroor nie omdat hy na bewering nie vir Joanne met enigiemand, ongeag sy eie biologiese kind of nie, wou deel nie.

Toe hul huweliksbootjie in 1990 finaal op die rotse beland, het Joanne die polisie gesmeek om die erf vir ’n liggaam te deursoek.

Tydens ’n ondersoek in 2003 het Joanne beweer Chris was koud teenoor sy vrou en het gereeld vir haar liedjies gesing waarin sy afgekraak is as onaantreklik en dat hy nie vir haar omgee nie.

Sy het Chris as ’n beheervraat beskryf, as iemand wat haar vertel het wat sy moet doen, wat sy moet aantrek en wie se goedkeuring sy moes kry voor sy iewers heen kon gaan.

Joanne (nou 54), het ná die nuus oor Chris se inhegtenisname ook 'n draai by die polisie gaan maak.

Intussen het dit bekend geword dat 'n voormalige babaoppasser van die gesin moontlik tot staatsgetuie in die saak geroep gaan word.

Tweelingbroers en hul sekskapades
  • Sers. Damian Loone wat in 1982 Lyn se verdwyning ondersoek het, het in 2003 aan die Nieu-Suid-Wallis-lykskouer gesê die tweeling het meer as net hul geboortedag gedeel.
  • Hulle het glo ook saam seks gehad met dieselfde leerling verbonde aan Cromer High, die skool waar hulle klasgegee het. Sy het as “Alice” bekend gestaan.
  • Alice was 16 toe sy en Paul ’n seksuele verhouding aangeknoop het en 17 toe Chris ook deel van die “seksgroepie” geword het.
  • Chris het terselfdertyd ook ’n verhouding met sy leerling, Joanne, aan die gang gehad.
  • Daar word beweer hy sou op sy beurt ook sy broer toelaat om seks met Joanne te hê.

Lyn se suster, Pat Jenkins, was onbewus van die verwikkelinge rondom Chris se inhegtenisname. Toe 'n verslagspan van 7 News Sydney haar daaroor inlig, het sy aanvanklik nie geweet wat om met die nuus te doen nie. Sy het wel 'n hoera! uitgekry toe die nuus begin insink.

David Jenkins, Pat se seun, het op Twitter gesê hy het aan die bewe gegaan nadat die nuus oor Chris se inhegtenisname bekend geword het.

Hy het dié videogreep gedeel en gesê dis die enigste video wat Lyn se gesin van haar het.

’n Podsending getiteld The Teacher’s Pet deur Hedley Thomas en Slade Gibson, oor Chris, Lyn en Joanne en alles wat daarmee gepaard gaan, is met die hoogste lof vir Australiese joernalistiek bekroon: The Gold Walkley.

Bronne: smh.com.aunews.com.au, mamamia.com.au, theaustralian.com.au