Onmiddelik ná sy geboorte het Nthabiseng Nhlanhla haar babaseuntjie se tone getel. Skanderings tydens haar swangerskap het immers gewys hy kan dalk met klompvoetjies gebore word.

Maar daar maak klein Mnqobi sy opwagting met 10 perfekte toontjies – nes sy tweelingboetie, Philasande.

Die nuwe ma se verligting was egter van korte duur. Oomblikke later merk sy op dat Mnqobi se voetjies en enkels tóg anders lyk as sy boetie s’n – dis na binne gedraai.

Aanvanklik was sy nie te bekommerd nie. Die dokters het voor die geboorte vir haar gesê indien hy klompvoetjies het, sou hulle dit maklik kon herstel.

Maar ’n paar dae ná sy geboorte is haar hoop weer verydel. Die probleem is ernstiger as wat hulle vermoed het, sê spesialiste aan Nthabiseng (31) en haar man, Mzwakhe (34). Die rede vir Mnqobi se misvormde bene was die uiters seldsame toestand tibiale hemimelie.

Dit tas die onderste ledemate aan en kom slegs by een uit ’n miljoen kinders wêreldwyd voor. Volgens spesialiste was amputasie al uitweg. Maar Nthabiseng en Mzwakhe – onderskeidelik ’n rekenmeester en aandelemakelaar – het geweier.

“My man het gesê ons sal ander menings kry,” vertel Nthabiseng by hul Johannesburgse huis.

Q en haar ouers en sussie
Nthabiseng en Mzwakhe Nhlanhla saam met hul tweeling. Foto: Onkgopotse Koloti/Media24/Gallo Images

Die twee boeties, nou al agt maande oud, sit by hul ouers terwyl ons gesels. Philasande is rustig; Mnqobi brabbel aanmekaar en kyk nuuskierig rond.

Die goeie nuus is die egpaar het ’n Amerikaanse dokter gevind wat die rekonstruktiewe chirurgie kan doen. Maar dit sal R3 miljoen kos . . . Die egpaar is kliphard besig om die geld in te samel vir “Baby Q,” soos Mnqobi deesdae onder weldoeners bekend is.

“Dit gaan daaroor dat my kind met sy godgegewe twee voete moet kan loop,” sê Nthabiseng.

Hulle hoop is op die ortopediese chirurg dr. Dror Paley, van die Paley- instituut by die St. Mary-mediese sentrum in Florida. Hy spesialiseer in prosedures vir ledemaatverlenging en korrektiewe operasies op misvormde ledemate.

“Hy het al verskeie operasies uitgevoer op kinders met aangebore afwykings in die onderste ledemate, ook op Phenyo Moropa van Suid-Afrika,” vertel Nthabiseng.

Phenyo (3) is met tibiale hemimelie in een beentjie gebore. Sy leer reeds loop ná haar prosedure verlede jaar. Die egpaar het Mnqobi se skanderings aan Dror gestuur. Hy het bevestig rekonstruksie is moontlik.

Hulle het toe ’n fondsinsamelingswebtuiste met die naam Help Q Walk begin.

“Ons het die veldtog met vriende en familie begin, maar dit het groter en groter geraak,” sê Nthabiseng.

Die afgelope ses maande is daar sowat R1,3 miljoen bekom deur privaat skenkings, geldinsamelingsgeleenthede en mediesefondsbydraes. Maar hulle het slegs 10 maande om die oorblywende R1,7 miljoen te vind.

As Mnqobi die operasie voor die ouderdom van 18 maande ondergaan, het sy knieskywe kans om behoorlik te ontwikkel en is die hersteltyd korter.

Drie operasies aan albei beentjies word beplan. Nthabiseng sal ook dalk haar werk moet los en vir ’n jaar in Amerika woon vir Mnqobi se rehabilitasie. Vir eers is hulle net verlig dat Dror amputasie uitskakel. Hulle wil nou ander kinders met dieselfde toestand help.

“Die plan is om hierdie infrastruktuur en vaardigheid in Suid-Afrika te kry, asook ons gesondheidsdepartement se steun.”

Mnqobi beteken “veroweraar” in Zoeloe, vertel sy ouers.

Sy ma bly vol moed: “As ons dít kan regkry, sal ons weet ons het geseëvier.” 

Kom neem deel aan die gesprek

Volg Huisgenoot op InstagramTwitterFacebookWhatsApp en teken gerus in op ons nuusbriewe.