Dit was net ’n gewone Woensdagmiddag toe jong Arlo Smith (14), ’n gr. 9-leerder aan die Hoërskool Secunda in Mpumalanga, saam met sy maats gaan fietsry het.

Liezel Smith, Arlo se ma, vertel Arlo se rugbyoefening is die middag van 23 September afgestel en hy wou graag saam met sy maats met die fiets, wat hy verlede jaar vir sy verjaardag gekry het, ’n draai gaan ry.

“Ons is eintlik baie streng met ons seuns en gaan gewoonlik altyd saam, maar ek onthou ek het nie die dag baie lekker gevoel nie. Ek het nog buite in die pad gestaan en hy het nog teruggekyk om vir my te waai toe ek bid: ‘Here, beskerm my kind, asseblief.’”

Arlo Smith voor die ongeluk wat sy lewe sou verand
Arlo Smith voor die ongeluk wat sy lewe sou verander. Foto: Verskaf

’n Uur later het een van sy maats se pa’s gebel: Sy moet kom. Daar was ’n ongeluk en dis ernstig. Die ambulans was reeds op pad.

“Ek dink nie enigiets berei ’n mens voor op so iets nie,” vertel sy oor die oomblik toe sy haar bebloede jongste seun gesien het.

Arlo Smith voor die ongeluk wat sy lewe sou verand
Arlo Smith was voor die ongeluk baie aktief. Foto: Verskaf
Jong Arlo Smith was voor sy ongeluk baie sportief.
Jong Arlo Smith was voor sy ongeluk baie sportief. Foto: Verskaf

Liezel vertel Arlo en sy drie maats was nie ver van die huis toe hulle agter die hoërskool met hul fietse by ’n paadjie af ry nie.

“Daar is groenstroke vir waar die kinders aan die kant met die fietse ry, maar daar was ’n bruggie sonder reëlings . . .”

Arlo Smith, 'n gr.9-leerder aan die Hoërskool Secu
Arlo Smith, 'n gr.9-leerder aan die Hoërskool Secunda, word per ambulans hospitaal toe geneem. Foto: Verskaf

Arlo het, terwyl sy maats nie op daardie oomblik gesien het nie, alleen by die paadjie afgery. Hy het om die draai beheer oor sy fiets verloor en met ’n spoed eers teen ’n sementmuur gebots. Hy het daarna meters ver deur die lug getrek en van die laagwaterbrug in die spruit beland. 

Op ’n foto van die brug, waar Liezel staan, kan ’n mens sien die bruggie is net ’n paar meter hoog. Op ander foto’s kan ’n mens ook die glas en sement sien waarop Arlo moes geval het.

Liezel Smith, Arlo se ma, staan by die brug van wa
Liezel Smith, Arlo se ma, staan by die brug van waar haar seun met sy fiets in die spruit beland het. Foto: Verskaf

“Sy maats het toe hulle besef wat gebeur het hom te hulp gesnel. Hulle het hom onder sy skouers opgetel en hom uit die water gelig. Een van die pa’s het later vertel hy was nie veronderstel om die middag by die huis te wees nie, maar moes toevallig by die huis aangaan. Dit was toe my bebloede seun vir hulp skree.”

Die pa het toe vir Arlo, wat langs die pad nie meer die krag gehad het om verder te loop nie, aangetref.

Arlo Smith in die hospitaal. Foto: Verskaf
Arlo Smith in die hospitaal. Foto: Verskaf
Arlo Smith in die hospitaal. Foto: Verskaf
Arlo Smith in die hospitaal. Foto: Verskaf

Arlo is per ambulans eerste na die Mediclinic Highveld op Trichardt geneem waar dit bepaal is sy elmboë is gebreek en byna heeltemal vergruis. Hy moes ook steke in sy kop kry. ’n Eerste operasie van vyf en ’n half uur het gevolg.

“Hulle moes sy wonde skoonmaak, sy bene heg en springs inplant. Hy was ’n week in die hospitaal. Die dag toe hulle hom ontslaan, het ons hom na ’n dokter by die Kloof-hospitaal in Pretoria gebring. Toe hulle hom weer hier in die tweede operasie oopmaak, het hulle gesien wat die omvang van die skade werklik is . . .”

Nie net het Arlo deels weens die vuil spruitwater erge infeksie in sy arms ontwikkel nie; die dokter sou ook bepaal die senuwees is reg af.

Arlo Smith moes aan beide sy elmboë geopereer word
Arlo Smith moes aan albei sy elmboë geopereer word. Die eerste operasie sou meer as vyf uur duur. Foto: Verskaf

“Arlo het ná die operasies verskriklik pyn gehad. Die dokter moes die springs verwyder en hy het so met Arlo se beentjies in sy hand gestaan. Hy moes die groeiplate ook verwyder. Daar was niks om dit mee vas te hou nie.

“In die derde operasie Saterdag 17 Oktober moes hy sy geskeurde tricep heg. Dit was vir Arlo die ergste operasie. Ons slaap so min. Hy het verskriklike pyn.”

Arlo se arms is albei steeds reguit gespalk en hy kan dit nie gebruik nie. Die vrees dat hy die gebruik van sy arms of sy arms self kan verloor, is steeds daar.

Die trane loop wanneer Liezel oor die toekoms moet praat.

“As ek dit nie eens kan verwerk nie, dink ek nie hy besef al die impak hiervan nie.”

'n Lang herstelpad lê voor vir Arlo Smith van Secu
'n Lang herstelpad lê voor vir Arlo Smith van Secunda. Foto: Verskaf

“Dit is baie erg. Ons harte is stukkend. Hy is nou by die huis, maar hy moet weekliks die dokter gaan sien. In dié stadium moet ons die bakterie in sy regterarm oorkom. Hy het baie pyn en ongemak en lê nou al vier weke in daai posisie met sy arms reguit gestrek.

“Hy kan niks vir homself doen nie en op 14 is dit maar nie lekker vir ’n besige en sportiewe seun nie. Ons moet hom voer, badkamer toe vat en bad. Hy kry ook berading vir sy gemoed.”

Liezel vertel daar lê nog minstens ses operasies voor. In dié stadium vat sy, Arlo, haar man, Eddie, en hul oudste seun, Lieward (16), dit net dag vir dag en probeer om Arlo in alles te ondersteun.

“Ek wil maar net vra dat soveel moontlik mense asseblief bly bid vir Arlo. Hy het baie pyn en ongemak. Ons weet dit gaan ’n baie lang herstelproses wees en ons bid vir ’n wonderwerk dat hy die gebruik van sy arms sal kan herwin. Wat vir die mens onmoontlik is, is vir God moontlik.”

Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe