Arlo Smith voor die ongeluk wat sy lewe sou verand
Arlo Smith voor die ongeluk wat sy lewe omvergegooi het. Foto: Verskaf.

So vertel Liezel Smith aan Huisgenoot amper twee maande nadat haar jongste seun, Arlo, in ’n fratsongeluk met sy fiets van ’n brug afgeval en albei sy elmboë vergruis het.

“Ek gee alles vir die Here. Ons glo en bid, want hierdie ding is bo ons,” sê Liezel.

Arlo het op 23 September saam met sy vriende gaan fietsry nadat sy rugbyoefening afgestel is. Arlo en sy drie vriende was nie te ver van die huis af toe hulle agter die hoërskool met hul fietse in ’n paadjie afgery het nie.

Liezel Smith, Arlo se ma, staan by die brug van wa
Liezel Smith, Arlo se ma, staan by die brug van waar haar seun met sy fiets in die spruit beland het. Foto: Verskaf.

“Daar is groen stroke vir waar die kinders aan die kant met hul fietse ry, maar daar was ’n bruggie sonder reëlings . . .” het Liezel vroeër aan Huisgenoot verduidelik.

Hy het alleen by die paadjie afgery en om die draai beheer oor sy fiets verloor. Hy het eers met ’n spoed teen ’n sementmuur gebots voor hy meters ver deur die lug getrek en van die laagwaterbrug in die spruit geval het.

Arlo saam met sy hondjie, Oreo.
Arlo saam met sy hondjie, Oreo. Foto: Verskaf.

Intussen het Liezel-hulle vir Arlo ’n hondjie gekry nadat ’n terapeut en traumaberader dit voorgestel het. Die skattige Boston-terriër heet Oreo, want “Arlo is mal oor koekies”.

Al kan Arlo hom nie vryf of optel nie, hou Oreo vir Arlo baie besig. “Hy lek Arlo in die gesig, en dan lag hy,” vertel Liezel.

Klein Oreo.
Klein Oreo. Foto: Verskaf.
Oreo
Foto: Verskaf.

Ná die aanvanklike drie noodoperasies het Arlo kwaai infeksies in sy arms ontwikkel weens die vuil spruitwater. Arlo-hulle moes dus nou vier weke wag om seker te maak die infeksie is heeltemal genees voor hulle verder kan beplan. “Die dokter sê ons moet dit dag vir dag vat; hý moet worry oor die res,” vertel Liezel.

Liezel bieg sy wil nie te veel aan al die toekomstige operasies dink nie omdat dit steeds baie emosioneel is. “Arlo is bang om dokter toe te gaan, want hy weet dat dit moontlik nog operasies kan beteken,” verduidelik Liezel. “Maar ons sit by hom en ons sit die hondjie by hom. Dit is alles maar tender love and care,” voeg sy by.

Te midde van hierdie moeilike tyd het Arlo op 3 November 15 jaar oud geword. 

Liezel bly in verwondering oor die gemeenskap se ondersteuning en al die gebede en inspirerende boodskappe wat hulle van regoor die land ontvang.

Arlo se ouers, Lizel en Eddie, dra blou om hul ond
Arlo se ouers, Lizel en Eddie, dra blou om hul ondersteuning vir hul seun te wys. Foto: Facebook.

As simbool van hul ondersteuning het talle mense Dinsdag iets blou aangetrek.

“Ons wil die dag vul met gebede en aan hom opdra. Ons wil hierdeur vir hom wys ons staan saam, bid saam en gee om,” skryf een van sy laerskoolonderwyseresse, Sammy Loots, op die Facebookblad Prayers for Arlo Smith, wat sy vir Arlo begin het.

“Ons wil vir hom wys hoeveel mense werklik daar buite saam bid en dat hy nie alleen is nie,” skryf sy oor die dag wat vroeër vandeesweek plaasgevind het.

Jong Arlo Smith was voor sy ongeluk baie sportief.
Arlo Smith was voor sy ongeluk baie sportief. Foto: Verskaf.

Arlo sal nie hierdie jaar eindeksamen skryf nie en Liezel en haar man, Eddie, sal Donderdag met die bestuur van die Hoërskool Secunda oor volgende jaar gesels. 

“Arlo kan steeds nie skryf of ’n tas dra nie, so ons sal moet besluit hoe ons en die skool dit volgende jaar gaan benader,” vertel Liezel.