Shania, van Telford, Engeland, ly aan ’n seldsame siekte, genaamd Rasmussen se sindroom, wat slegs 1,8 miljoen mense in die wêreld aantas.

Dié sindroom veroorsaak dat bloedselle in die een helfte van die brein opswel en stuiptrekkings veroorsaak.

Shania kry meer as 30 sulke aanvalle per dag.

 “Shania se eerste aanval was in Januarie 2016, net voor haar tiende verjaardag,” het haar ma, Tilly, aan die nuuswebtuiste, Birminghamlive, gesê.

“Ek onthou dit asof dit gister was.

“Voor dit was sy ’n gesonde jong meisie. Dit het uit die bloute gebeur.”

Volgens The Mirror het dit die gesin 18 maande gevat om uit te vind hul kind ly aan dié seldsame siekte. 

Dokters het vir hulle gesê daar is n manier om dit te behandel, maar dit gaan een van die moeilikste besluite wees wat hulle moet neem.

Hulle moes besluit: Óf hul kind hou aan met stuiptrekkings kry, óf dokters kan die regterkant van haar brein isoleer, maar dit sou beteken die linkerkant van haar ligaam sou geheel en al verlam wees.

Haar linkeroog sou blind wees, en sy sal nie kan loop of haar linkerhand gebruik nie.

Maar sonder die operasie kon haar toestand vererger.

“Dit was ’n baie moeilike besluit, maar dit moes gedoen word,” sê haar ma.

Haar kind wou eers nie instem nie.

“Sy was bang en het gesê sy kan nie met die operasie voortgaan nie, maar toe wys ek vir haar die Facebook-blad wat ek vir haar gestig het en al die wonderlike boodskappe. Toe stem sy in."

Tilly het geweet haar dogtertjie is mal oor Disneyland en net voor die operasie het hulle haar vir ’n sorgelose dag gevat om vir oulaas kind te wees.

Shania is op 1 Februarie geopereer.

Die operasie was ’n sukses en Shania het nie weer ’n aanval gehad nie.

“Sy kan nog nie self loop nie en ons moet haar uit die bed uit optel,”sê Tilly.

“Hulle het ’n deeltjie van my brein gevat vir toetse. Hopelik kan dit ander mense met Rasmussen help,” het die dapper Shania gesê.

Bronne: The Mirror, The Birmingham Mail