Morgan (25) van Melbourne, Australië, het nou ’n 22 cm lange litteken vanaf die bopunt van haar oor tot by haar sleutelbeen nadat ’n oplettende dokter ’n verdagte moesie opgemerk het.

Sy was verpletter toe sy hoor die kanker het versprei nadat ’n knop in haar nek ontdek is. In Februarie moes ’n deel van haar nek dringend verwyder word.

Melanoom, ’n dodelike vorm van die siekte, is by haar gediagnoseer, maar nadat sy verskeie rondes bestraling ondergaan het, is Morgan se toestand nou stabiel terwyl sy op nog skanderings wag.

Die dapper blogger het besluit om haar ervaring aanlyn te deel om ander te ondersteun en in te lig.

Morgan, wat in die reklamewese gewerk het, sê: “Die klein moesie aan my oor het nie verdag gelyk nie, maar ’n dokter het besluit om dit veiligheidshalwe te verwyder. Daardie besluit het my lewe gered.

“Dit was reeds by fase 3 C, die laaste fase voor dit as terminaal geklassifiseer sou word.

“Die dokters het 22 limfkliere uit my nek asook ’n groot nekspier en die punt van my oor verwyder.

“Ek het ’n reuse-litteken in my nek as gevolg van die operasie en dis merkbaar, maar dit het die kanker vertraag.

“Hulle het al die kanker probeer verwyder, maar toe die gewasse weggestuur is, het dit gewys hulle kry nie duidelike grense nie.

“Daar was dus nog melanoomselle in my nek. Toe moes ek bestraal word om van die res ontslae te probeer raak.

“Toe die siekte aanvanklik in Junie 2017 by my gediagnoseer is, moes ek net 5 cm van die punt van my oor laat verwyder. ’n Mens kon dit skaars sien.

“Maar sewe maande later, in Januarie vanjaar, het ek ’n ertjiegrootteknop in my nek opgemerk wat vinnig gegroei het.

“Die kanker was terug en het oor die omliggende weefsel in my nek versprei.

“Ek het die afgelope week my behandeling afgehandel, maar sal gereelde skanderings moet kry om seker te maak dit keer nie op ’n ander plek in my lyf terug nie.”

Morgan het tot op 19 geen gesondheidsprobleme gehad nie. Ná ’n reeks verlammende siektes is die onvoldoende werking van die reseptor CTLA-4 – ’n seldsame genetiese mutasie wat die immuunstelsel raak – verlede Oktober by haar gediagnoseer.

Foto: Magazine Features.

“Dit het als begin met blindheid in my regteroog elke keer wanneer ek gaan hardloop het. Daarna is veelvoudige sklerose by my gediagnoseer – ’n toestand wat die brein en rugmurg raak en tot die verlies van beweging en senuweeskade kan lei.

“Daar was ook probleme met my ingewande, longsiekte en voorkankerselle in my baarmoeder.

“Die dokters het gou besef dis nie toeval nie en nadat genetiese toetse verlede jaar uitgevoer is, is die genetiese mutasie – die onvoldoende werking van die reseptor CTLA-4 – by my gediagnoseer.

“Dis ook die oorsaak van my mees onlangse diagnose van melanoom en hoekom ek vatbaar vir ander siektes is.

“Net ’n maand nadat ek uitgevind het van die CLTA-4, het ek gehoor ek het osteoporose, ’n toestand wat al die bene in my liggaam laat verswak, die gevolg van al die medikasie wat ek gebruik het om my ander toestande te behandel.

“Ek het boonop ’n klomp allergiese reaksies gehad op medikasie, en was verlede jaar amper dood terwyl dokters probeer uitpluis het hoekom my liggaam haarself aanval.

“Die geenmutasie het gemaak dat dokters nie my kanker doeltreffend kon behandel nie.

“Ek kan nie kanker-immuunterapie kry om my melanoom te bestry nie omdat die behandeling weens my genetiese afwyking my kan doodmaak, maar dis iets wat hulle gaan beproef as ek die terminale fases van my kanker bereik.

“My beste opsie sal ’n stamseloorplanting wees om my immuunstelsel te herstel, maar op die oomblik is daar nie ’n enkele geskikte beenmurgskenker nie.”

Morgan – wat verkies om nie haar van bekend te maak nie – vertel sy het haar ervaring op die internet gedeel om ander by te staan.

“Ek wou my ervaring aanlyn deel om enigeen te help wat iets soortgelyks deurmaak.

“Ek het foto’s, blog-inskrywings en mediese inskrywings gedeel, en hopelik vir ander gewys hoe dit is om met chroniese siekte saam te leef, veral uiters seldsame siektes soos CTLA4, en om uit te reik na ander wat deur iets soortgelyks gaan.

“Ek het al soveel in my lewe ervaar, maar ek doen my bes om opgeruimd en hoopvol te bly en aan te hou glimlag.”

Besoek www.dontmswithmorgs.com om Morgan se reis te volg.