Volgens lt.kol. Amanda Funani, polisiewoordvoerder, was daar geen teken van ’n inbraak nie.

“Die twee meisies het die matrone gevra om die deur van die koshuis oop te los omdat iemand hul netbalklere vir hulle sou bring,” sê sy. 

Marna Engelbrecht is saam met haar beste vriendin vermoor. Foto: Facebook
Sharnelle Hough se voormalige kêrel is vir die moorde aangekla. Foto: Facebook

Toe die matrone die Saterdagoggend die meisies wou roep voor hul vertrek na Koster vir ’n sportbyeenkoms, het sy albei dood aangetref. 

“Die een het aan die trapreling gehang en die ander een is in die badkamer gevind. Sy is met ’n dun tou verwurg.” 

’n 19-jarige oudleerling van die skool, Xander Bylsma, is Saterdagaand gearresteer en het Maandagoggend in die Vryburgse landdroshof op aanklag van moord verskyn. 

Volgens Amanda is ander mense ook ondervra, maar niemand anders is in hegtenis geneem nie. “Hy is in die stadium ons enigste verdagte,” het sy gesê.

Die twee meisies se families het Maandagoggend gewag dat die saak voorkom.

Die saak is uitgestel tot 6 Augustus vir verdere ondersoek. Xander het nie aansoek gedoen om borg nie en bly in aanhouding. 

’n Familielid by die hof het gesê Marna en Sharnelle was die enigste twee meisies wat Vrydagaand in die koshuis geslaap het.