“Die koerante het dit heeltemal verkeerd gehad. Ja, ek is bly ek is kankervry, maar dit is nie waarom ek besluit het om kaal deur die dorp te ry nie,” vertel Vanessa Jarvis aan Huisgenoot.

“Ek wou my sonlose sonbrand-neussproei bemark wat jou vel bruin kan laat lyk sonder die skade van die son. Dit help jou ook om gewig af te skud."

Vanessa (48) het verlede week behoorlik aandag getrek op dié klein Oos-Vrystaatse dorpie toe sy op 'n spierwit perd, heeltemal kaal, met slegs 'n blou hoed en rooi stewels aan, deur die middedorp gery het.

Sy is deur Thabo Mahloana, die eienaar van die perd, begelei.

Foto: Glen Green Photography
Foto: Glen Green Photography

Luidens berigte was die kaalryery om haar oorwinning oor velkanker te vier.

Maar volgens Vanessa was dit alles net 'n bemarkingsveldtog. 

Vanessa is die eienaar van Neked, 'n winkel op die dorp wat onder meer dagga-olie verkoop. 

Hoewel baie inwoners haar tydens die rit toegejuig het, was talle briesend en het hulle in die sosiale media teenoor haar uitgevaar.

Ander het die kaalryery as “afskuwelik, siek en heeltemal onaanvaarbaar” beskryf.

Maar dit het haar nie van stryk laat bring nie.

Selfs nie toe die polisie verby haar gery het of toe die perd haar afgegooi het en sy weer in haar volle glorie moes opklim nie. 

“Dit het my seergemaak toe ek gehoor het hoe vroue skree ‘sies!’. Maar daar was ook baie mense wat vir my hande geklap het.

“Ek het meer ondersteuners gekry as mense wat my haat. Ek het dalk vel wat los hang, maar ek het 'n dik vel,” vertel sy.

“Ek was baie op my senuwees, want dit was nogal vreesaanjaend. Maar ek het net geglimlag en gewaai, want ek het presies geweet waarom ek dit doen."

As tiener het Vanessa die eerste keer met kanker te doen gekry toe dokters 'n kwaadaardige moesie van haar regterbobeen moes verwyder. 

Velkanker is in 2014 by haar gediagnoseer.

“Soos baie Suid-Afrikaanse vroue is ek mal daaroor om in die son te lê en baai. Ek het my lewe in die son deurgebring. En wanneer ek nie in die son was nie, was ek op 'n sonbed.

“Maar toe kry ek 'n basale kankergeswel op my rug wat deur twee operasies verwyder moes word.”

Die operasie het 'n reusemerk op haar rug gelaat wat Vanessa se selfbeeld verwoes het.

“Dit was so lelik; ek het net gehuil en gehuil. Ek was so ongelukkig ná die operasie. Ek het my binne my huis toegesluit en die son ten alle koste vermy. Ek het my selfvertroue verloor.”

Vanessa wou haar produk bemark met die waaghaalsig
Vanessa wou haar produk bemark met die waaghalsige kaalryery. Foto's: Glen Green Photography

Nadat Vanessa verlief geraak en van Johannesburg na Clarens verhuis het, het sy ’n winkel oopgemaak wat produkte met dagga-olie verkoop. 

“Sedertdien gebruik ek dagga-olie en -rome op ander dele van my lyf om kanker te verhoed. Die resultate spreek vanself en ek is gesond. Ek glo so sterk aan my produk dat ek 'n winkel daarvoor in Clarens oopgemaak het.”

Vanessa verduidelik nou dis hoekom sy die strate in haar Evasgewaad ingevaar het.

“Ek het gespog met my nuwe, bruin, maer lyf as reklame en ek wou ander vroue wys dat ek as 'n 48-jarige vrou met merke, rekmerke en los vel 'n produk gekry het wat vir my selfvertroue kan gee.”

Kom neem deel aan die gesprek

Volg Huisgenoot op InstagramTwitter en Facebook en teken gerus in op ons nuusbriewe.