'n Bekende sjef word in sy kombuis vermoor, en familie en vriende staan sy treurende weduwee by – tot sy geboei in die hof ver­skyn op aanklag dat sý die sneller getrek en hom die doodskoot toegedien het.

Dié scenario klink dalk of dit uit ’n tipiese misdaadriller kom; trouens, dit kon ’n storielyn uit een van die beskuldigde se eie boeke gewees het . . .

Nancy Crampton-Brophy, skrywer van onder meer How to Murder Your Husband en The Wrong Husband, is nou self agter tralies en word deur lewenslange tronkstraf in die gesig gestaar nadat sy van die koelbloedige moord op haar man aangekla is.

Deur die jare het die 68-jarige skrywer van Portland in Amerika, wat self haar boeke uitgee, hoofsaaklik romantiese spanningsromans geskryf oor “taai mans en sterk vroue”, elk met ’n donker kinkel in die storie.

Op die oog af het dit gelyk of die huweliksdramas in haar stories nie ’n weerspieëling van haar binnekamer is nie.

Dit het gelyk asof Nancy alte gelukkig ge­­troud was met haar tweede man, Daniel Brophy (63), wat sy blykbaar as die liefde van haar lewe beskou het.

Haar inhegtenisneming was ’n groot skok vir almal – van familie tot die bure.

Net ’n dag nadat ’n bebloede Daniel deur sy geskokte studente dood aangetref is in die kombuis van die Oregon Culinary Institute, waar hy die hoofdosent was, het Nancy die nuus in die sosiale media aangekondig: “Ek het hartseer nuus vir Facebook-vriende en familie. My man en beste vriend, die sjef Dan Brophy, is gister­oggend vermoor.

“Vir julle wat na aan my is en voel dit verdien ’n foonoproep, julle is reg, maar ek sukkel op die oomblik om sin te maak van alles.”
Simpatieke boodskappe het in­­gestroom. Baie mense het liefde en gebede vir die weduwee in rou gestuur en hul simpatie met haar groot verlies uitgespreek.

Maar hul medelye het in September in verbystering verander toe ’n geboeide Nancy in ’n blou oorpak voor ’n regter verskyn.

Ek weet wanneer ek besluit het om met hom te trou.

Sy is aangekla van die moord op haar man en die onwettige gebruik van ’n vuur­wapen. Borgtog is geweier en sy is steeds verhoorafwagtend agter tralies.

Daniel en Nancy was 27 jaar lank getroud, en volgens goeie vriende was die egpaar onafskeidbaar.

“Ek kan nie vir julle vertel presies wanneer ek verlief geraak het op my man nie,” het sy op haar webtuiste geskryf, “maar ek weet wanneer ek besluit het om met hom te trou.

“Ek was in die bad. Dit was ’n reusebad. Ek het aanvaar hy gaan saam met my inklim, maar toe hy nie uitkom nie, het ek geroep: ‘ Kom jy?’ Sy antwoord het my oortuig hy’s die regte een: ‘Ja, ek maak net eers hors d’oeuvres.’

“Kan jy jou indink jy bring die res van jou lewe sonder so ’n man deur?”

Daniel is deur sy kollegas as die instituut se “ensiklopedie van kennis” beskou.

Een van sy studente het hom beskryf as “die grootste pyn én die grootste inspirasie wat ek hier gehad het”, terwyl ’n ander een op Instagram geskryf het:

“Sjef Brophy was dwarsdeur my kulinêre en boerderyloopbaan my mentor. Hy het my geleer hoe om my eerste troppie hoenders op ’n menslike manier te slag, hoe om my eerste byekorf op te rig, en hy was altyd daar toe ek moeilike tye beleef het. Ek het hom nie net as ’n vriend, dosent en inspirasie beskou nie, maar ook as familie.”

Twee dae nadat sy lyk gevind is, is honderde mense in hul hartseer verenig toe hulle buite die instituut bymekaarkom vir ’n kersligwaak. Nancy was ook by om hulde te bring.



Hoewel sy toe nog baie ontsteld gelyk het, het haar bure later begin agterkom sy tree ál vreemder op.

Don McConnell, wat die afgelope ses jaar Nancy-hulle se buurman was, sê hy was uit die veld geslaan deur haar ­apatiese reaksie in ’n gesprek wat hy met haar oor die raaiselagtige moord gehad het.

“Ek het gevra of die polisie in kontak bly met haar,” vertel Don.

“Toe sê sy nee, want sy is ’n verdagte.

“Ek het gedink sy moet ’n baie sterk vrou wees om dit so te hanteer.”

Kan dit werklik wees dat sy gedoen het waaroor sy soveel keer in die verlede geskryf het?

In haar boek The Wrong Cop het Nancy geskryf oor ’n vrou wat “elke dag van haar huwelik gefantaseer het oor hoe sy haar man vermoor”.

In ’n ander roman van haar, The Wrong Husband, beskryf sy in die fynste besonderhede hoe ’n vrou desperaat probeer wegvlug van haar afknouerige man deur haar eie dood te vervals.

Maar haar vreemdste skryfwerk kom uit 2011 toe sy ’n essay, How to Murder Your Husband, geskryf het.

'n Paar van Nancy Crampton-Brophy se pennevrugte. Foto: nancybrophyauthor.com.

In die voorwoord skryf sy: “As ’n skrywer van romantiese rillers bestee ek baie tyd daaraan om oor moord en polisieprosedure te dink.
“As die moord veronderstel is om my vry te maak, wil ek beslis nie enige tyd in die tronk deurbring nie. En laat ek dit duidelik op rekord stel: Ek hou nie van oorpakke nie. Oranje is nie my kleur nie.”

Nancy het haar lesers afgeraai om ’n huurmoordenaar te kry, want “ ’n ver­basend groot getal huurmoordenaars verklik jou by die polisie”.

Sy het ook teen gif gewaarsku omdat dit te opspoorbaar is.

In die essay gee sy potensiële redes waarom ’n mens jou man sou wou vermoor, byvoorbeeld ontrouheid, gierigheid of afknouery.

“Egskeiding is duur, en wil jy regtig jou besittings verdeel?”

Ek wil my nie bekommer oor bloed en harsings wat teen my mure spat nie. En ek onthou nie leuens baie goed nie.

En nou lig die wenkbroue éérs wanneer ’n mens lees sy het toe al geskryf sy dink dikwels aan moord, maar dink nie sy sal dit uitvoer nie.

“Dis vir my makliker om mense dood te wens as om hulle dood te maak,” het sy geskryf.

“Ek wil my nie bekommer oor bloed en harsings wat teen my mure spat nie. En ek onthou nie leuens baie goed nie.

“Maar die ding wat ek wel weet, is dat elkeen van ons dit sou kon doen as ons ver genoeg gedruk word.”

Nou sal dit die jurie se werk wees om te besluit of die geliefde sjef se moor­denaar die einste Nancy was wat haar fantasieë eindelik uitgeleef het. 

BRONNE: THE WASHINGTON POST, THE OREGON, THE OREGON, NANCYBROPHYAUTHOR.COM, PORTLAND TRIBUNE; FOTO'S: CBS PORTLAND, FACEBOOK