Op 23 Februarie verlede jaar het Erica haar pa, Erich, aan die dood afgestaan ná 'n stryd van sewe jaar teen alzheimersiekte.

Die siekte is ongeveer twee jaar ná haar pa se aftrede by hom gediagnoseer en Erica het magteloos toegekyk terwyl die simptome stelselmatig vererger het.

Volgens Erica was dit klein veranderings wat haar gesin laat besef het dit gaan nie goed met haar pa nie.

“Hy het my eenkeer op die lughawe kom haal,” het Erica aan Minki vertel, “en skielik het hy vergeet waar hy is. Dit was vir hom baie scary. En hy het sy bankkodes begin vergeet. Sulke klein, klein goed.


“Daardie laaste drie maande (van sy lewe) was verskriklik,” het Erica vertel, “want ons moes hom êrens heen stuur. My ma kon nie meer cope nie. Dit raak regtig moeilik, want hulle raak soms 'n bietjie aggressief en my pa was ’n lang, sterk man. Hy het baie maer geraak aan die einde, maar omdat hy so lank was, was dit moeilik om hom te hanteer. Hy kon niks meer alleen doen nie.”

Ten spyte van die pyn wat met haar pa se lyding en dood gepaardgegaan het, beskou Erica dit vandag as ’n “voorreg” dat sy dié pad saam met haar pa kon stap.

“Tyd saam met hom was ongelooflik kosbaar. Ons het geweet hy is op pad uit. Hy was verskriklik kwesbaar. Iets was in my agterkop: Ek het geweet dit was ’n ongelooflike eer om ’n pad te stap saam met iemand wat deur die laaste paar weke van sy lewe gaan. Dis moeilik om te aanskou,” sê sy.

“ ’n Mens sien nogal horrible goed, maar ek het geweet dis ’n ongelooflike voorreg. En dit het my regtig gehelp in my rouproses, want ek het al my trane gestort op pad na hom toe en weg van hom af en partykeer saam met hom.”

Erica se raad aan gesinne wat ’n geliefde het by wie alzheimersiekte gediagnoseer is: “Ek dink baie mense raak verskriklik ongemaklik. Hulle weet nie hoe om te reageer nie. Hanteer hulle soos 'n mens. Wees lief vir hulle deur dit alles. Hulle kan steeds aanvoel of jy hulle raaksien, of jy hulle eer.”

  • Nuwe episodes van Minki word Woensdae om 20:00 op VIA (DStv-kanaal 147) uitgesaai, met heruitsendings op Saterdae om 18:30. Minki word geborg deur Incanda-meubels en Bacher & Co.