Anicè het vertel hoe Pippie aansterk, die gesin se nuwe lewe op Stilbaai en die vloed van steun wat hulle van dwars oor die wêreld ontvang ná Pippie se brandongeluk.

Minki het Pippie met ’n spesiale besoek deur haar gunstelingsanger, Bobby van Jaarsveld, verras.

Bobby en Pippie stap al ’n lang pad saam. In 2012 het Bobby vir Pippie besoek toe sy nog in die hospitaal aangesterk het en hy het spesiale konserte op Ellisras vir haar gereël.

Bobby het vir Minki gesê hy loer gereeld by die Krugers in om te hoor hoe dit met Pippie gaan.

“ ’n Mens kan nie anders nie,” sê die sanger. “As so iets gebeur en dit raak jou hart, is dit vir ewig binne jou gegraveer.”

“Om sulke mense in jou lewe te hê,” sê Anicè, “voel dit asof daar ’n groter betekenis aan alles is. Al die mense wat haar ontmoet; sy’t almal se hart geraak. En om te weet dat (Bobby en Minki) ons op die pad steun, van vandag af en vorentoe, beteken vir my die wêreld.”

  • Nuwe episodes van Minki word Woensdae om 20:00 op VIA (DStv-kanaal 147) uitgesaai, met heruitsendings op Saterdae om 18:30. Minki word deur Incanda-meubels en Bacher & Co. geborg.