In 2011 het ons met Cézanne se ma, Susan Lemmer, oor haar dogter gesels.

‘Sy is en bly my dogter’ – Deur Karin Eloff, 1 September 2011

Die gr. 2-meisie klou aan haar pa se bene vas en soebat hy moenie weggaan nie, maar die groot man skud haar soos ’n keffende brakkie van hom af. Ander kere, wanneer hy buite homself raak van woede en haar ma rondstamp en klap, druk die meisie haar ore met haar hande toe en skree so hard as wat sy kan.

Dit is die prentjie wat die veroordeelde kindermolesteerder Cézanne Visser (34), oftewel adv. Barbie, se ma van haar skets in haar boek, Ek Wil Hê Jy Moet Weet . . . Sy Is Steeds My Kind!

Hierin vertel Susan Lemmer (53) van haar onvoorwaardelike liefde vir Cézanne, maar ook van haar wroeging oor wat sy as ma verkeerd gedoen het. Sy beskryf ook haar kommer en magteloosheid terwyl haar kind in ’n web van dwelms en seks verstrengel was.

Cézanne is skuldig bevind op 11 klagte, waaronder onsedelike aanranding van minderjarige kinders en die besit en vervaardiging van kinderpornografie. Sy het verlede Mei haar vonnis van sewe jaar tronkstraf in Pretoria-Sentraal se vrouegevangenis begin uitdien.

In haar boek vertel Susan van haar ongelukkige huwelik met Cézanne se pa en haar eie ouers se verhoudingsprobleme.

‘Algaande kry hy ’n sterker houvas op haar lewe. Hy besluit wat sy moet eet, hoe laat sy gaan slaap, met wie sy mag praat.’
Cézanne Visser en Dirk Prinsloo buite die hof. Kort hierna het hy gevlug.

Die aantreklike en skrander blonde advokaat wat in die hof uitgebeeld is as 'n willose slagoffer van haar destydse kêrel, adv. Dirk Prinsloo, was volgens haar ma een van drie geslagte vroue wat fisiek en emosioneel mishandel is.

Die boek se openingstoneel beskryf die dag toe Cézanne en Dirk Prinsloo in hegtenis geneem is vir die onsedelike aanranding van minderjariges. Dit was 9 Desember 2002, ’n dag wat Susan in haar hart geweet het sou aanbreek.

’n Privaat speurder, Smartryk Kruger, het haar ’n maand tevore al genader met inligting wat die polisie oor die twee minnaars gehad het. Sy het haar dogter probeer waarsku, maar dit was vergeefs. Cézanne wou nie daaroor praat nie.

Ook Susan se lewe het sy eie hartseer opgelewer. Haar oorlede pa het haar ma verkul en ook soms geslaan, vertel sy in die boek. Eindelik is haar ouers geskei en het sy in ’n klein woonstelletjie in Pretoria by haar ma grootgeword.

Op skool het sy smoorverlief geraak op Johan Visser, ’n aantreklike man uit Namibië, en op 19 het sy swanger geraak met sy kind. ’n Troue is inderhaas gereël en kort voor lank was sy ’n jong meisie met ’n baba en ’n man wat ná maande as grenssoldaat geen werk kon hou nie.

’n Lewe van seks, dwelms en botsings met die gereg het gevolg.
Cézanne met haar vonnisoplegging van sewe jaar tronkstraf. Foto: ER Lombard

Sy wy ’n groot deel van die boek aan haar ongelukkige huwelik met Johan; hoe hy haar na bewering mishandel het en ontrou was. Sy beweer hy het haar geklap, rondgepluk en gestamp. Sy vertel ook hoe hy beeldjies wat sy uit klei gemaak het, van die tafel afgevee het as sy ‘‘teëgepraat’’ het, of hoe hy uit woede die kombuiskaste van die mure afgeruk en neergegooi het. 

Toe Cézanne klein was, het dit haar geweldig ontstel, maar toe sy ouer word, het sy maar altyd die gemors met ’n skoppie en besem opgevee. Dikwels het haar ma op haar skouer gehuil.

Susan erken in die boek sy het in die nagmerriejare van haar huwelik dikwels by haar enigste kind troos gesoek. Susan en Johan het geskei, weer getrou en toe, 24 jaar nadat hulle die eerste keer getroud is, vir ’n tweede en finale keer geskei. Cézanne was toe reeds ’n regstudent.

Om weg te kom van al die probleme by die huis, het sy haarself ná skool in haar studie verdiep. Sy het haar eerste regsgraad en toe ’n LL.B. met lof verwerf.

Maar toe druip sy haar balie-eksamen ná haar eerste groot liefdesteleurstelling. Sy was smoorverlief op Johan Gouws, ook ’n advokaat, maar hul verhouding het ná net twee maande op die rotse geloop.

Daarna het sy ’n lid geword van die onafhanklike balie – en Dirk was die voorsitter van die Gautengse afdeling. 

Kort voor lank het Dirk, of die ‘‘wolf ’’, soos Susan hom noem, Cézanne vir ’n piekniek genooi en die koeël was deur die kerk.

‘‘Algaande kry hy ’n sterker houvas op haar lewe. Hy besluit wat sy moet eet, hoe laat sy gaan slaap, met wie sy mag praat,’’ skryf Susan in die boek.

Susan en Johan Lemmer ondersteun Cézanne in die hof. Foto: Gallo Images

’n Lewe van seks, dwelms en botsings met die gereg het gevolg. Cézanne het in ’n stadium op Dirk se aandrang ’n interdik teen haar ouers gekry nadat haar bekommerde ma hulle voortdurend gebel het.

Hulle is toe vir nege maande verbied om haar te kontak. Vir Johan was dit die einde van sy verhouding met sy dogter. Cézanne en Susan het later versoen geraak, maar haar pa het nooit weer die verhouding met sy dogter hervat nie. Hy het nie die hofsaak bygewoon nie en Cézanne ook nooit in die tronk besoek nie. 

In die tyd dat sy die interdik teen haar ouers gekry het, het Dirk haar begin mishandel, het Susan later uitgevind. Wanneer Cézanne ’n ‘‘fout’’ gemaak het, het Dirk briesend geword en haar geklap, nes Susan beweer met haar en haar ma gebeur het.

So het sy die derde generasie vroue in haar familie geword wat in ’n patroon van mishandeling vasgevang is.

Die grootste ding wat sy en haar dogter uit die hele ervaring met Dirk geleer het, is deernis, sê Susan.

So het sy die derde generasie vroue in haar familie geword wat in ’n patroon van mishandeling vasgevang is.

Mense oordeel maklik ’n vrou wat in so ’n verhouding bly en nie die man los nie, maar ‘‘wat gebeur as jy so verstrik raak in jou vrees en obsessie dat jy nie die groter prentjie kan sien nie?’’ vra sy. Sy glo ook sy het skuld daaraan dat Cézanne die verkeerde keuses oor mans gemaak het, want sy het lank self toegelaat dat ’n man haar mishandel.

Ná haar ongelukkige huwelik het sy nog ’n rampspoedige verhouding aangeknoop, dié keer met Johan Lemmer, ’n voormalige predikant en later seksuoloog. Dit was nie liefde met die eerste oogopslag nie, vertel Susan, maar hy het aangebied om Cézanne as pasiënt te spreek en was baie ondersteunend. 

Haar dogter se voortslepende hofsaak het Susan uitgeput en sy was weerloos toe die sjarmante man vir haar begin ogies maak, skryf sy. Eenmaal tydens ’n afspraak het hy haar ’n allemintige klap op die boud gegee en gevra of dit ‘‘iets aan haar doen’’.

Teen daardie tyd het hy al erken hy is deel van ’n sado-masochistiese groep, beweer Susan, en sy het besluit hy is nie die regte man vir haar nie. Maar nadat hy gesmeek het dat sy hom moet terugneem, het hulle verloof geraak. Met hul troue in 2008 het sy gestraal, maar hy het verveeld gelyk, vertel sy in die boek.

Susan skryf haar nuwe man het haar ook verkul. 

Cézanne se stiefpa, Johan Lemmer, buite in die hooggeregshof in Pretoria. Foto: Gallo Images

Die affair het glo aan die lig gekom nadat ’n voormalige pasiënt van hom vir ’n koerant vertel het hulle het ’n verhouding gehad. Ná ’n huwelik van korter as ’n jaar is Susan ook van hom geskei.

Susan skryf nie veel oor Dirk en Cézanne se jong slagoffers nie, maar probeer Zani, soos sy haar dogter noem, eerder simpatiek skets.

Sy glo Cézanne het aan die ‘‘mishandeldevrou-sindroom’’ gely. Sy was so vasgevang daarin dat sy nie gesonde keuses kon maak nie, glo sy. Sy droom daarvan om haar dogter eendag, wanneer alles verby is, Frankryk toe te neem en vir haar die skilderye te gaan wys van Paul Cézanne, na wie sy genoem is.

‘‘Ek wil haar nooit verontskuldig nie, maar ek staan by haar,’’ skryf die ma wat haar mooi, slim dogter op wie sy eens so trots was, agter tralies sien beland het.

  • Alle pogings om Johan Visser, Susan se eerste man, vir kommentaar te bereik, was onsuksesvol. Volgens Ren Oosthuizen, Susan se prokureur, het hy en Susan geen kontak nie.
  • Johan Lemmer, Susan se tweede man, het aan Huisgenoot gesê hy het nog nie Susan se boek gelees nie, maar lei af dat dit ’n boek “vol van haar verbeelding en vrese” is. Sy boek, Adv. Barbie: Wat Regtig Gebeur Het, sal binnekort bekendgestel word. Hy wil derhalwe nie nou kommentaar lewer nie, maar sal wanneer sy boek gepubliseer is. 
  • Ek Wil Hê Jy Moet Weet . . . Sy Is Steeds My Kind! is deur die joernalis Ingrid Botha geskryf en deur Carpe Diem Uitgewers uitgegee.
  • Ren Oosthuizen, Cézanne se huidige prokureur, het bevestig twee van haar en Dirk se slagoffers eis elk R600 000 skadevergoeding van haar.
  • Dirk Prinsloo is in ’n tronk in Belarus en dien ’n vonnis van 13 jaar tronkstraf uit nadat hy ’n bank daar probeer beroof het. Hy het soontoe gevlug om sy verhoor hier vry te spring.
  • Huisgenoot: Ware Lewensdramas word Donderdae om 20:00 op VIA (DStv-kanaal 147) uitgesaai.
  • Heruitsendings op Sondae om 21:00.