Hier is ons eerste onderhoud met Cézanne voor sy en Dirk vasgetrek is. 

Onder die waardige toga is adv. Barbie – Deur Marie Opperman, 28 Maart 2002

Haar bates sluit in ’n LL.B., maar ook die DD van ’n massiewe borsmaat . .  . 

Toe sy onlangs by ’n konsert instap, na haar sitplek voor in die saal, het die mense vir haar hande geklap. “Toe glimlag ek net, want dis vir my ’n kompliment,” sê sy. 

Sy het dié aand haar silwer pakkie aangehad, vertel Cézanne Prinsloo (25). Sy wys na haar silwer broek wat aan haar klou soos vel aan ’n vis. “Dié broek.”

Hm. Onder die kontoere van daardie blink stukkie materiaal wat iewers onder haar naeltjie ophou, sien jy nie ’n greintjie vet, selluliet of oorbodige rondings nie.

Maar die applous was sweerlik nie net vir dié broek nie.   

Bokant die plat magie met die naeltjiering troon ’n paar bates wat ’n gehoor op sy voete kan bring. “Dubbel D,” gloei Cézanne. “Ek is baie trots op hulle.”

TV-kykers het al die voorreg gehad om Cézanne se trots te bewonder toe haar oudisie vir Idols uitgesaai is. Die beoordelaars het nie lank na haar stem geluister nie, maar darem erken: “Die kykers sou jou seker langer voor die kameras wou sien.”

Natuurlik. Cézanne is nie net ’n fiere voorbeeld van die indrukwekkende afmetings waartoe die vroulike liggaam in staat is nie. Sy is ook blond, en mooi, en slim. Sy vat aan haar blonde hare wat oor haar skouers hang. “Ek was eers ash, maar nou is ek platinum. Dit pas by my.”

Dis moeilik om te glo dié blonde poppie wat Pamela Anderson in die skadu’s kan stel, is ’n advokaat.

“Ek het albei my grade, B.LC. en LL.B., met lof geslaag,” vertel die vrou wat in Montana, Pretoria, op hoërskool was.

Sy is ’n volwaardige advokaat, wat in straf- sowel as siviele sake in die hof optree. Cézanne het haar droomman, Dirk Prinsloo (33), ontmoet toe sy haar verlede jaar by die onafhanklike balie aangesluit het. Dirk is die Gautengse hoof van dié balie.

Cézanne saam met haar ma Susan, nadat sy graad gekry het.

Hulle wil trou sodra hy van sy eerste vrou geskei is. Intussen het Cézanne, ’n nooi Visser, solank sy van aangeneem.

Dit was liefde met die eerste kykslag, al was Cézanne toe nog net ’n vae belofte van haar huidige glorie. “Ek het ’n diamant raakgesien”, sê Dirk. “Dit het net nog skaafwerk nodig gehad om te blink.” 

“Dirk is my krag, my bron van alles,” sê Cézanne verlief.

“Hy het my lewe verander. My wyd en oop laat dink. My geleer ’n mens leef net een keer, en jy moet jouself nooit beperk weens die samelewing se clichés nie. Jy moet jou individualiteit ontdek, ontgin en behou.”

Sprekende bewys van hul individualiteit is die Kersboompie vol liggies voor Dirk se lessenaar. “Dirk hou daarvan,” sê Cézanne doodluiters. 

Cézanne in haar statige regstoga. Foto: Nardus Nel
Cézanne Visser. Foto: Nardus Nel

Ook die Hustlers en Playboys op hul koffietafel wys hulle voel vere vir die norme van doodgewone mense.

In die tuin van hul landgoed by Centurion is ’n paar strategies geplaaste, kleurryke blomme. Blomme van sy. ”Ons het nie tyd vir tuinmaak nie. Nou het ons heeljaar blomme.”

Met Dirk se aanmoediging het Cézanne se transformasie van valerige en platborstige boekwurm tot eksotiese skoenlapper plaasgevind.

“Alles van my het verander, en ek het eindelik die ruimte in ’n verhouding gekry om nie onderdruk te word nie, maar te blom soos ek wil,” vertel sy, en kyk verby die steentjie in haar neusring na haar psigedeliese naels. 

Elkeen skitter in ’n ander kleur. Geel, groen, blou, turkoois, swart, oranje, pers. Haar toonnaels, in deursigtige plastiek-hoëhakskoene, is swart en pers.

Met Dirk se aanmoediging het Cézanne se transformasie van valerige en platborstige boekwurm tot eksotiese skoenlapper plaasgevind.

“Ek laat Dirk besluit watter kleure hy op my naels wil hê,” vertel sy. Ook haar klere, wat voorheen hoofsaaklik stemmig swart en grys was, is nou blink en kleurryk. Dirk koop die meeste daarvan. 

“Ek was ’n boring mens,” sê sy. “Ek het nie selfvertroue gehad nie. Ek sou nooit aan Idols deelgeneem het nie. 

“Mense het nooit na my gekyk nie. Nou hang mans se tonge op die grond as hulle my sien.”

Dit het einde laas jaar twee operasies gekos om haar beskeie, amper 34B-borsmaat in ’n asemrowende DD om te tower.

“Ek wou altyd groot boobs gehad het,” vertel sy.

Cézanne Visser soos sy nog ’n jaar of wat gelede gelyk het en nou, nadat sy as die blonde “adv. Barbie” ontpop het.

Eers is haar borsmaat na ’n C vergroot, maar Cézanne was nie tevrede nie. “Ek is lank, en my skouers is breed,” verduidelik sy. “Ek het gelyk soos ’n strykplank met twee bolletjies op.”

Die eindproduk is erg indrukwekkend, selfs aan haar latlyf van 1,8 m. 

“Albei operasies saam het ons R20 000 gekos,” sê Dirk. 

Cézanne se lyf het ’n streng dieet en gereelde oefen op ál die ander plekke baie kleiner geword. “Ek het van ’n nommer veertien gedaal tot ’n nommer agt,” vertel sy. “En hierdie broek is ’n ses.” 

Soms laat die aanskoue van haar boesem mans vreemde dinge kwytraak. “Soos: ‘Tonight you’re mine’ ” sê sy. ”Of ‘Kan ek jou op my Harley afneem, ek wil jou foto in my kantoor ophang?’ of ‘Jou lekker ding.’ Ek lag in my hart daaroor.”

Cézanne verdedig haar wonderlike bates met vuur. “Vroue wat sê blonde meisies is dom, vroue met groot boobs is goedkoop en vroue wat sexy is en 'n mooi lyf het, as terterig kategoriseer, het ’n geheime behoefte om self so te lyk.”

Om by haar nuwe, wulpse voorkoms te pas, het Cézanne ook haar lippe voller laat maak. “Vir vroue wat sê silikoon in boobs en lippe is onnatuurlik en vals, wil ek net sê grimering op die oë en lippe, en juwele, is ook vals en onnatuurlik.” 

Dirk se bewondering vir Cézanne se mooi lyf is onverbloembaar. “Lippies,” sê hy terwyl sy vir foto’s poseer. “Maak spiertjies. Gooi die haartjies anderkant toe. Wys die mooi boudjies.” 

‘Ek is sy Barbie-pop. Sy meesterstuk. Hy het my gevorm. Ek dra myself op aan hom. Hy is die handsomeste hunk alive.’
Dirk Prinsloo en Cézanne Visser. Foto: Nardus Nel

Cézanne slaan kort-kort haar arms om sy nek. “Ek is sy Barbie-pop,” sê sy gelukkig. “Sy meesterstuk. Hy het my gevorm. Ek dra myself op aan hom. Hy is die handsomeste hunk alive.”

Sy praat in ’n suggestiewe Barbie-stemmetjie. “He can touch my hair, undress me everywhere. . .” 

Cézanne is nog glad nie klaar met haar veranderinge nie. “Ek is doelbewus besig om myself te verbeter,” vertel sy. “My tatoeëermerke, neus- en naeltjiering was ’n oorwinning oor myself. 

“Ek glo ek is ’n bietjie ekshibisionisties. Ek wil hê die wêreld moet my ken as die meisie wat nie bang was om haarself te vermooi en te laat geld nie.

“Ek is so lief vir my liggaam, ek dra so min klere as moontlik.”  

Sy wil graag die beeld van advokate opkikker. “Baie van die regslui is te gesteld op hul eie misplaaste siening van hul waarde en waardigheid, ” sê sy. 

“Die algemene beeld van ’n vroueadvokaat is een van ’n sterk, aggressiewe super-vrou. ’n Tierkat. 

Dirk Prinsloo is die inspirasie agter Cézanne se transformasie. Foto: Nardus Nel

“Ek is nou ’n tierkat met ’n glimlag op my gesig. ’n Mens kan ’n advokaat wees én jou vroulikheid behou.”

Sy het net een probleem: “Mense wil my nie ernstig opneem nie. As ek sê ek is ’n advokaat, lag hulle en vra: ‘Wat doen jy regtig?’ En as ek sê ek is régtig ’n advokaat, sê hulle: Yea, right!’”

Cézanne se mooi koppie staan nou ál meer modelwerk en ander alternatiewe bedrywighede toe.

“Ek het nou die selfvertroue om ’n model te wees. Ek wil ook ’n eenvroukabaret doen. Ek wil die rol van die slim, oulike, sestienjarige Sandy vertolk.”

Sy gooi haar kop skuins, tuit haar lippe en praat in ’n kleindogtertjie-stemmetjie. Die DD’s sou hande geklap het as hulle kon. . .

  • Huisgenoot: Ware Lewensdramas word Donderdae om 20:00 op VIA (DStv-kanaal 147) uitgesaai.
  • Heruitsendings is Sondae om 21:00.