A is vir aanmekaaralfabetwoorde

Deur Werner du Toit; illustrasies: Aurora Creative Studio, Lize-Marie Dreyer en Sonia Dearling (R225)

A is vir aanmekaaralfabetwoorde
A is vir aanmekaaralfabetwoorde

P is vir plaasjapiepajamapiekniek Papawerpotpourri en pikante peuselhappies – Petronella Pansegrouw se plaasjapiepajamapiekniek was plesierig, sê die plattelanders, met die lekkerste pynappelsappies.

Net ná P kom die skreeusnaakse Q: Q is vir quinoaquiche Quid pro quo, besluit Quinn Quatermaine: Hy kan my quinoaquiche kry, maar ek soek dan sy boek Oor die quattrocento en ’n glas wyn.

Dié verkwiklike boek is nie vir kinders nie; ook nie vir grootmense nie – dis vir almal wat mal is oor woorde, veral as hulle soos lang derms aanmekaargeryg word.

Daar is die veteraanvryheids- vegtervervolgverhaal, grond- wetgeskiedenisgradeplegtigheid en die koshuiskarnavalkaskarkampioenskap.

En die charismatiese Christina Coetzer-Toerien se choreografiecurriculum asook die arme Theresa Taljaard wat totaal verdwaal op die telefoontegnologietentoonstellingsterrein.

Foto: Verskaf
Werner du Toit, skrywer van ’n bobaasboek vir baasbreinbleeksiele. Foto: Verskaf

Hierdie gekke woordspeletjies kom uit die kop van Werner du Toit, ’n entrepreneur van Kaapstad wat onlangs ’n prys gewen het vir die vervaardiging van die eerste Suid-Afrikaanse reënwatertenks wat van 100%- herwinde plastiek gemaak is.

Op die oomblik is hy van al sy projekte die meeste in sy skik met A is vir aanmekaaralfabetwoorde wat hy self laat illustreer en druk het en nou self aanlyn versprei.

Werner sê in sy voorwoord hy wou nog altyd ’n boek skryf. “Ek hoop inniglik jy hou van A is vir aanmekaaralfabetwoorde en dat dit jou en jou kinders sal laat lag en dink en saamspeel. Dit was ’n absolute fees om te skryf!”

Hy sê aan Huisgenoot dis sy eerste boek; dus kan ’n mens hopelik uitsien na nog waar dié unieke een vandaan kom.

  • Bestel dit by aanmekaar.co.za. Die eerste 100 Huisgenoot-lesers wat bestel, kry 10% afslag. Gebruik die kodewoord “huisgenoot10”. Af- lewering in Suid-Afrika is gratis.

Selfies, seksklets & slimfone – ’n internet-oorlewingsgids vir tieners

Deur Emma Sadler & Lizzie Harrison; vertaal deur Jaco Jacobs (Lapa, R200*)

Selfies, seksklets & slimfone – ’n internet-oorlew
Selfies, seksklets & slimfone – ’n internet-oorlewingsgids vir tieners

Die skrywer erken in haar voorwoord dat die meeste tieners wat haar boek lees dit heel moontlik nie uit eie keuse sou lees nie. “As ons moet raai, het jou ouers dit vir jou gekoop, of jou onderwysers het daarop aangedring dat jy dit lees, of die feit dat jy hierdie boek moet lees, is jou straf vir die een of ander glips wat jy aanlyn gemaak het!”

Die boek is prakties en bespreek al die detail van jou teenwoordigheid aanlyn.

Sy waarsku dat jy nooit digitale inhoud moet skep wanneer jy “moeg, honger, kwaad of hangry” is nie. “As jy ’n boodskap in die hitte van die stryd tik, MOENIE DIT STUUR NIE. Vra jou eerder af: Is ek bereid om hierdie boodskap op ’n reklamebord te plaas, langs my naam en ’n reusefoto van my gesig? Nee? Moet dit dan nie stuur nie.”

Sy skryf onder meer ook oor kuberboelies, seksklets, wetlike sake, die privaatheidsrevolusie en ’n mens se digitale voetspoor.

Die A, B, C van Suid-Afrikaanse baanbrekervroue

Deur Ambre Nicolson; illustrasies: Jaxon Hsu; vertaling: Ronelda Kamfer (Wenkbrou-uitgewers, R250*)

Die A, B, C van Suid-Afrikaanse baanbrekervroue
Die A, B, C van Suid-Afrikaanse baanbrekervroue

Hier is 26 vroue – een vir elke letter van die alfabet – wat ’n bydrae tot Suid-Afrika gelewer het of steeds lewer. Elkeen word in ’n kort biografie bekendgestel.

So is daar party soos Dope Saint Jude (1990-) wat dalk nie vir almal ewe bekend is nie. As jy haar vra wie sy is, sê sy maklik ’n skollie, nerd, rapper, aktivis, rolprentmaker, gemeenskapswerker, partytjiedier, suster en nog.

Dié musikant het in ’n Katolieke Xhosa-gesin in die bruin buurt Elsiesrivier in Kaapstad grootgeword. “Ná skool het sy ’n drag king-groep gestig waarin sy en ander kunstenaars manlike identiteite aangeneem het as ’n manier om die seksisme in die wêreld van hip-hop te ontbloot,” skryf Ambre Nicolson.

Eerste in die boek is Antjie Krog (1952-), wat as ’n 17-jarige skoolmeisie ’n prys gewen het vir haar gedig “My mooi land”.

Die anti-apartheidsaktivis Ahmed Kathrada het dit ná sy vrylating van Robbeneiland voorgelees op ’n byeenkoms in Soweto. “Hy het gesê die gedig het hom en sy medegevangenes hoop gegee omdat hulle besef het as ’n wit skoolkind sulke woorde kon skryf, sou hulle in hul leeftyd vry wees.”

Die boek is op hoërskoolleerders gemik.

  • Die pryse was korrek met druktyd en is onderworpe aan verandering sonder voorafkennisgewing.