Stories vir pikkies en peuters 

Deur Gertie Smit  (Tafelberg, R259*)

Hallo, maatjies, my naam is Bennie en ek ken al die stories. Hier in my tonnelhuisie diep onder die grond het ek rakke en rakke vol storieboeke.

Dié keer wil ek met al die maatjies se mammas praat, want ons boek van die maand is vir die heel kleintjies – kindertjies van een tot drie jaar. Hier is 40 kort, maklike stories en baie tekeninge in vrolike kleure.

Mammas, julle moet ook vir die juffrouens hiervan vertel, want die stories is geskryf rondom algemene temas wat in kleuterskole gebruik word. 

Hier is stories oor die seisoene, troeteldiere, higiëne, veiligheid, ­insekte, plaas­diere en nog baie ander. O goue blaar, my storie is klaar.  – Bennie Boekwurm

WEN

Vyf lesers kan elk ’n eksemplaar van Stories vir Pikkies en Peuters wen. 

  • Hoeveel storietjies is in die boek?

SMS jou antwoord, naam, van en adres voor 13 September om 17:00 na 35407*.

Elke sms kos R1,50. die borg is verantwoordelik vir die verskaffing van die boeke binne 'n redelike tyd.


Die geheim van die woud

Deur Gustavo Martin Garzo; illustrasies: Beatriz Martin Vidal; uit Spaans vertaal deur Nicol Stassen (Protea, R150)

Die illustreerder Beatriz Martin Vidal skryf op haar blog dat sy en die skrywer Gustavo Martin Garzo die orde omgekeer het: “Ek maak eers die tekening en dan skryf hy die teks daarvoor.

Dis wonderlik.” Dis nie seker of dit met Die Geheim van die Woud ook die geval was nie, maar ’n mens kan jou goed voorstel dat haar dramatiese illustrasies sy verbeelding op loop gesit het.

Dit het byvoorbeeld kindergesiggies van naby wat die hele bladsy oorheers en ’n wolf se oog wat deur die konyn/seuntjie skoongelek word, alles baie realisties, maar tog ook nie, want oral sypel ’n dromerigheid in.

Dis die verhaal van twee kindertjies wat elke aand wil hê hul ma moet vir hulle dieselfde storie vertel van hoe dit gekom het dat die wolf vriende geword het met die konyne en hulle nooit seergemaak het nie.

Dis ook die verhaal van hoe ’n ma liefhet, of sy ’n wolvin of ’n mensma is.

Plaasdiere en Wilde Diere

Deur Rachel Elliot (Lapa, R80 elk)

Die stoot-en-trek-boekies is ontwerp om babas se hand-oog-koördinasie te help ontwikkel.

Jy stoot byvoorbeeld die hoender met jou vinger, en wanneer die kartonprentjie van kuikens uitspring, trek jy dit verder oop sodat mamma kan lees watter geluid dit is wat hulle maak.

Die bladsye is van stewige karton om grypende handjies te oorleef (maar nie te veel spoeg nie!). Baba het ’n grootmens nodig om die interaktiewe boekies te benut.

Dit sal dus tot gehaltetyd saam met ’n ouer of versorger lei.

Wanneer is eendag?

Deur Elsa Winckler; illustrasies: Marleen Visser (Protea, R150)

Abella is ’n dikbekfeetjie met kort rooi hare wat saam met haar maats bo in die berg woon waar die mooiste blomme blom: bloedrooi disas, oranje speldekussings en koningproteas. (Die leser kan dus aflei sy is ’n Bolandse feetjie.)

Abella is geïrriteerd dat die grootmeisiefeetjies gedurig sê hulle moet net wag, want eendag gaan hulle ook mooi wees en lang hare hê en feetjiewyn van die bessies van die vlierboom maak.

Intussen moet hulle maar tevrede wees om op skoenlappers se rug te ry en met die paddas by die poele te speel. “Ek weet van gister en van vandag en van môre, maar wanneer is eendag?” wil die klein knorpot by die Koningin van die Skoenlappers weet. “Eendag kom gouer as wat julle dink,” sê die koningin.

Dis ’n heerlike storie met lieflike, verbeeldingryke illustrasies wat meisietjies sal laat droom. (Hopelik van meer as wyn maak en mooiwees as hulle eendag groot is . . .)

Die lelike vyf

Deur Julia Donald- son; illustrasies: Axel Scheffler (Protea, R150)

Maar wie is die voël in die poeierkwasboom wat lyk soos iets naar uit ’n nagmerriedroom?

Dié ding is ’n aasvoël, so lelik en bles, daar’s bittermin mooi om te sê oor die res: Sy nek is vol rimpels, ’n lyf wat erg groot is, hy’s naar en hy stink en hy vreet goed wat dood is.

Sy bek is gemaak om te skeur en te hap en saam met sy maats aan ’n karkas te krap. Wat sal ons sonder Philip de Vos doen in Afrikaans?

Wie kan soos hy in rym vertaal sodat dit klink asof die storie oorspronklik in Afrikaans geskep is?

Ek wonder of die skrywer, Julia Donaldson, onder meer die skepper van The Gruffalo (Die Goorgomgaai), weet hoe haar The Ugly Five in ’n ander taal sing.

Dis die verhaal van die arme blouwildebees, hiëna, aasvoël, vlakvark en maraboe wat lus voel om te ween, want waar moet hulle heen?

Ek dink laer- skoolkinders kan die storie gerus uit die kop leer vir eisteddfods.

  • Beskikbaar teen dié prys by Takealot.com. Die prys was korrek met druktyd en is onderworpe aan verandering sonder voorafkennisgewing.