KINDERS LEER WAAR VELKLEUR VANDAAN KOM

Onder my vel

Deur Sindiwe Magona en Nina G. Jablonski (David Philip-uitgewers, R94*)

“Hoekom kry ’n mens so baie verskillende kleure mense?” 

Njabulo wil soos die verkleurmannetjie sy velkleur verander. Sy oom Joshua is hartseer hieroor.

Toe hy en sy drie klasmaats (almal met verskillende velkleure) bymekaarkom vir ’n skooltaak, verduidelik oom Joshua vir hulle die weten­skaplike feite van hoe dit gekom het dat velkleur begin verander het.

Hy begin by die begin toe die eerste mense uit Afrika begin wegtrek het na minder sonnige gebiede.

Agterin is ’n rapliedjie wat suksesvol in die klaskamer gebruik kan word. 

Hier is die refrein: “Jy moet dieper kyk as hoe ek lyk / my vel is daar buite, /my hart is hier binne.”

NET DIE OORTJIES VAN DIE SEEKOEI EN ANDER AFRIKAANSE IDIOME

Deur Kobus galloway (Zebra Press, R145*)

“Moet nou nie vlieë met ’n kanon skiet nie, my vrou.” 

“Ja, my man, maar ek is moeg daarvoor dat jy so met die witbrood onder die arm kla.”

“Ag nee wat, liefie, ek dink dis nou sommer ’n storm in ’n glas water.”

As jou kinders dié gesprek hoor, sal hulle beangs dink hul ouers se varkies is nie almal op hok nie? 

Of ken hulle hul idiome?

Kobus Galloway, die skepper van Idees Vol Vrees, volg sy ’n Wolf in Skaapsklere op met nog ’n prenteboek waarin hy idiome op grappige wyse uitbeeld. 

Albei boeke  hoort tuis in laerskoolklaskamers, nie net om kinders te leer nie, maar om hulle bewus te maak van taal se kleurryke moontlikhede.

Gaan kyk by instagram.com/ideesvolvrees wat Kobus nog alles met Afrikaans aanvang.

WEB VAN DIE MUMMIE – GRILGRYPERS 2

Deur De Wet Hugo (Human & Rousseau, R140)

Pippa woon saam met haar ouers op hul familieplaas, Moordkuil, in die Moordenaarskaroo.

Op die dag voor sy Paarl toe moet vertrek vir die begin van haar hoërskooldae, word iets vrees­liks in ’n skeur in die berg gevind: ’n mummie. Dis dieselfde berg waar haar pa se sussie as kind verdwyn het. 

In die koshuis raak sy onmiddellik met Siphokazi bevriend, en dis ook maar goed so, want met al die spookagtighede wat gebeur, het ’n mens ’n beste maat nodig. Veral as jy ’n fobie vir spinnekoppe het en iemand jou vrees uitbuit.

Ja, daardie iemand is die mummie wat Pippa van die plaas af koshuis toe gevolg het!

KLASSIEKE BOEK NOU IN AFRIKAANS

Brug na Terabithia

Deur Katherine Paterson (Protea Boekhuis, R180)

Dit is die tienjarige Jess en Leslie se storie.

Jess oefen hom die hele lang vakansie in ’n koors in sodat hy die vinnigste seun kan wees wanneer die skool weer begin en hulle pouses resies hardloop. Nog iets wat in die vakansie gebeur, is nuwe mense trek op die plasie langsaan in. Hulle het net een kind, Leslie. 

Tydens die eerste pouse op die eerste dag gebeur dit dan so dat Jess ver voorloop – tot iemand hom verbysteek: “Die gebleikte, afgeknipte jeans seil ’n volle drie tree voor hom oor die wenstreep.” 

Dit is nie ’n goeie begin vir ’n vriendskap nie, maar die plaasseun en die nuwe intrekker van Washington wie se ouers volgens die ander mense beslis hippies is, vind diep aanklank by mekaar. 

Dit bereik ’n hoogtepunt toe hulle Terabithia, hul kasteel in die bos, bou.

“Dit moet ’n geheim wees waarvan ons niemand in die hele wêreld ooit sal vertel nie,” sê Leslie. 

Die bekroonde boek wat in 1977 in Engels ver­skyn het, is ’n voorbeeld van hoe ’n mens vir die jeug skryf sonder om voor te gee jy is ’n koel grootmens. Koop dit vir jou kind, maar lees  dit gerus eers self (en staal jou vir die einde). 

* BESKIKBAAR TEEN DIÉ PRYSE BY TAKEALOT.COM. DIE PRYSE WAS KORREK MET DRUKTYD EN IS ONDERWORPE AAN VERANDERING SONDER VOORAFKENNISGEWING