Selma en Louise

Deur Susan Coetzer (Human & Rousseau, R295)

“Ek hou van Selma én Louise – hulle is soos vinkel en koljander en vul mekaar aan,” sê Susan Coetzer.

Sy is bekend vir haar geestelike boeke, veral Oros vir die Siel, wat dié aktrise as skrywer gevestig het toe dit in 2007 uitgegee is.

“Selma en Louise het albei eienskappe waarmee ek, en ek dink die meeste ander vroue, sou kon identifiseer. Tog leun ek meer na Selma, wat meer behoudend en deursigtig is met ’n goeie waardestelsel, en wat transformeer ná trauma en aan die einde van die verhaal meer insig in haarself en ander het. Maar ek het terselfdertyd ook groot waardering vir die losser Louise se impulsiwiteit, humorsin, ligtheid, haar kommunikasievaardighede met haar kinders en die feit dat sy nie so naïef soos Selma is nie,” vertel Susan.

Haar enigste vorige boek wat (soos Selma en Louise) nie spesifiek op die geestelike mark gerig is nie, is Lisa Se Dagboek (2008), wat ontstaan het uit ’n tydskrifrubriek oor ’n loslopermeisie.

“Die hele onderwerp van die lief en leed van uitgaan en loslopers het my al van die dae van Lisa Se Dagboek geïnteresseer. Toe ek ’n lekkerleesroman moes aanpak, het die idee vir ’n ligte vriendskapverhaal by my opgekom. Ek het besluit ’n ouer dating-bestanddeel kan ’n goeie tema wees om te ondersoek. Dit leen hom tot humor en diepte, deernis en verraad – baie vroue kan hiermee identifiseer."

"Die verraad kom in die vorm van die nuwe man in Selma se lewe, Theo, wat ’n ware walglap is. ’n Menigte vroue wat ek ken, het al iewers in hul lewe met ’n Theo-tipe te doen gekry.

"Ek het heelwat vertroulike briewe op lêer van vroue wat ’n rat voor die oë gedraai is deur wolwe in skaapsklere. Theo se karakter het ek geteken volgens vele verwonde vroue se vertellings."

Susan vertel sy het ook navorsing gedoen oor narsiste se vermoë om mense meesterlik te bedrieg en te manipuleer.

Sy lei ’n bedrywige lewe as vryskut en moet gereeld na afgeleë plekke reis as motiveringspreker of aktrise.

“Ek werk dus in blokke toegewyste skryftyd wat ek in rooi omkring op my kalender vir wanneer ek tuis is en met ’n bewustelike kwota woorde in gedagte, byna soos gim toe gaan. Dit verg baie dissipline, doelgerigtheid, harde werk en ook ’n bereidwilligheid om te herskryf en te slyp.”

Sy vertel die beste tyd om te skryf is soggens vroeg wanneer sy vars is.

“As ek tot ounag skryf, kan ek glad nie my gedagtes afskakel en aan die slaap raak nie. Ek lê heeltyd en storielyne uitdink en skape tel en is die volgende dag doodmoeg. Maar as die kalf in die put is, ja, dan skryf ek wel dag en nag in daardie laaste pylvak.”

Waaroor gaan die storie?

Die rolprent Thelma & Louise het al in 1991 uitgekom, maar het so ikonies geword dat vroue tot vandag toe nog praat van ’n padreis saam met ’n goeie vriendin met dalk iets gewaagds daaraan as ’n “Thelma en Louise”.

Net so vat Selma en Louise die pad. Selma treur steeds oor haar man, Zander, wat ses jaar tevore oorlede is.

“Hoe het sy hier beland – op die rand van die lewe waar sy desperaat met haar French tips aan ’n klein sprietjie lewe vasklou om nie oor die afgrond te stort nie? Haar vel bly die kleur van pannekoekdeeg ná Zander se verlies.”

Haar vriendin van 40 jaar, Louise, is al jare lank gelukkig getroud met haar Karel.

“Watter goeie gemmerbroodman het ek nie gekry nie. Hy was al die jare daar soos ’n solid rock. Lekker bedonnerd party dae. En hy kan so ’n ou drol wees. Maar solid.”

Hulle gaan Indië toe om elk van hul persoonlike demone ontslae te raak. In hierdie kleurryke land kom ’n skokkende geheim aan die lig.

Selfhelpstorie

Die Alchemis

Deur Paulo Coelho; deur Kobus Geldenhuys in Afrikaans vertaal (Protea Boekhuis, R180)

“Om Die Alchemis te lees is soos om met dagbreek op te staan en die son te sien opkom terwyl die res van die wêreld nog slaap.”

Paulo Coelho vertel dis wat die Amerikaanse uitgewer HarperCollins aan hom geskryf het.

Dit was in die tyd toe hy nog gesukkel het om hom as skrywer te vestig.

Die boek het al in 1988 in Portugees verskyn; vandag is dit al in 71 tale vertaal en meer as 65 miljoen eksemplare is verkoop.

Toe aan Coelho gevra is wat die geheim agter hierdie reusesukses is, het hy gesê: “Die enigste eerlike antwoord wat ek kan gee, is dat ek nie weet nie. Al wat ek weet, is dat ons almal soos Santiago die skaapwagter bewus moet wees van wat ons persoonlike roeping is.”

Die Alchemis gaan oor die vind van ’n persoonlike roeping en word vertel aan die hand van ’n allegorie oor die jong Spaanse skaapwagter Santiago wat ’n herhalende droom het.

Hy vertrek dan op ’n reis, want hy glo daar wag vir hom ’n skat by die piramides in Egipte.

Hy ontmoet vroeg-vroeg ’n koning wat vir hom verduidelik jong mense weet wat hul roeping is en is nie bang om te droom nie.

“Maar soos die tyd verbygaan, begin ’n geheimsinnige mag hulle oortuig dat dit vir hulle onmoontlik gaan wees om hul persoonlike roeping te verwesenlik.”

Die boek het die eerste keer in 2003 in Afrikaans verskyn en is verlede jaar heruitgegee.