In jou gedagtes
Beskikbaar by Protea Boekwinkel
Beskikbaar by Protea Boekwinkel

Teks: Herman van Veen
Illustrasies: Alida Bothma

Beskikbaar by Protea Boekwinkel

In jou gedagtes kan enigiets gebeur.
Jy kan orals wees:
jy kan
oor Hongkong en Beijing
hop-hoppetie-hop oor
die Himalajas en
kaalbas
of in jou pajamas
reguit
na Lima gaan

Jy kan wees net wat jy wil:
so groot soos ’n berg
so klein soos ’n sandkorrel
’n vliegie se blertsie
’n piep-piep van ’n piepende piepertjie

Jy kan alles word:
’n walvis wat kan vlieg
’n rob wat kan lees
’n burgemeester wat kan hup-hup
soos ’n kangaroe

Jy kan begryp wat jy nie verstaan nie:
’n kindjie wat doodgaan
Jesus aan die kruis
’n man wat van homself
’n bom maak
en ontplof
op ’n plein
voor ’n skool

Ons ken die Nederlander Herman van Veen veral as musikant, maar hier is ’n interessante kinderboek uit sy pen. Dit klink heel grappig tot jy by die laaste deel kom waar ernstige sake opgehaal word. Dit kom onverwags, maar wees verseker, daar bestaan nie ’n kind wat nie wonder oor ernstige dinge nie.

  • Die mooi illustrasies is deur ­Alida Bothma, ’n Suid-Afrikaner.
Die ritme van die reën
Beskikbaar by Protea Boekwinkel
Beskikbaar by Protea Boekwinkel

Teks en illustrasies: Grahame Baker-Smith

Beskikbaar by Protea Boekwinkel

Isak speel in sy geliefkoosde poel teen die berghang. Hy voel reënvingers teen sy wang en kyk op. Bo hom word die wolke donker. Die reën giet neer en vorm stroompies wat uit Isak se poel vloei. Hy gooi die water in sy bottel ook in die poel en volg die vrolike stroompies bergaf.

In sy verbeelding volg hy die water uit sy fles: in die rivier wat verby hul huis vloei, in die woud waar die wilde diere kom drink, deur die platteland se plase, deur die stad, diep in die oseaan waar die walvis ’n fontein blaas, ver na ander lande, deur ’n woestyn waar ’n dors dogter­tjie speel, aan en aan tot weer terug by Isak se poel.

Baker-Smith gee in die werklikheid ’n natuurstudieles oor water se siklus, maar geen kind sal raai hier word les gegee nie. Hy skryf aanlyn: “Die watersiklus het my nog altyd gefassineer, maar ek wou nie ’n handboek met droë feite skryf nie, eerder iets wat soos ’n storie lees .”

Pootjies
Beskikbaar by Protea Boekwinkel
Beskikbaar by Protea Boekwinkel

Teks en illustrasies: Richard Jones

Beskikbaar by Protea Boekwinkel

Die oorspronklike boek is in Engels geskryf, maar het ’n Franse titel: Perdu. Dis die hondjie se naam, maar dit beteken ook “weg” – en dit is wat met Pootjies gebeur.

Hy verdwaal en het niks en niemand nie, behalwe ’n klein, rooi serpie om die nek. Hy loop soek-soek uit die donker bos en beland in die stad. Hier voel hy nog meer alleen, want daar is so baie mense, maar niemand steur hulle aan hom nie.

Op elke dubbelblad sien ’n mens ’n dogtertjie met ’n rooi mus op. Sy is die enigste een wat vir Pootjies raaksien . . . en natuurlik is daar ’n gelukkige einde.

Richard Jones is ’n Brit wat bekendheid verwerf het as illustreerder van ander skrywers se kinderboeke. Pootjies is die eerste een wat hy illustreer én skryf.

Mynhardt die moeilike kind
Beskikbaar by Protea Boekwinkel
Beskikbaar by Protea Boekwinkel

Teks: Michael Sussman
Illustrasies: Julia Sardia

Beskikbaar by Protea Boekwinkel

Mynhardt sien ’n reus­agtige slang uit sy klerekas seil, en toe hy by sy ouers gaan kla, sien hy hulle sit en lees ’n boek oor moeilike kinders.

Natuurlik sê hulle volgens die boek is hy gans te oud om hom nog te verbeel daar is iets soos monsters. Dan sluk die slang hom in, maar al wat sy ouers sê, is dat hy die slangkostuum moet uittrek.

Dis nie ’n kostuum nie. Die slang van my kas het my lewend ingesluk.

Dis vreemde idees soos dié wat jou so ’n moeilike kind maak, sê Ma.

Die skrywer, Michael Sussman, vertel die storie is geïnspireer deur ’n prentjie in sy kop van ’n slang wat ’n kind insluk.

“Dit was ongewoon, want ek ly aan afantasie, ’n toestand waar ’n mens nie ’n funksionerende geestesoog het nie.”

Die beeld van die reusebult wat ál laer af deur die slang se lyf loop, het hom laat dink hier is iets vir ’n kinderboek – “al was dit effens makaber”.

“Ek was bekommerd dit sou kinders dalk bang maak, tensy ek dit ’n snaakse storie maak.”

En dit is!

Ouma Voëltjie
Beskikbaar by Protea Boekwinkel
Beskikbaar by Protea Boekwinkel

Teks en illustrasies: Benji Davies

Beskikbaar by Protea Boekwinkel

Wie’s nou lus om jou somervakansie by ’n ouma te gaan bly wat stoksiel­alleen op ’n piepklein eilandjie woon? Buitendien is sy baie vreemd: Sy is heeldag besig met die sopkook van seewier, en joga en allerhande vervelige goed.

Eendag vat Noi die pad en ontdek ’n grotjie waarin hy te lekker kan speel. Maar dan kom ’n storm op en al die laagwaterrotse is weg, en Noi weet glad nie hoe hy weer by Ouma gaan uitkom nie. Maar wie is dit wat hier oor die wilde branders aangejaag kom in haar bootjie met sy rooi seil?

Dis ’n lieflike fantasiestorie (wat natuurlik heeltemal waar ook sou kon wees as ’n mens voëltjies kry wat van seewiersop hou).

Ekstra bronne: theaoi.com; lydialukidis.wordpress.com