Bennie Boekwurm se mooiste sprokies

Deur Louise Smit; illustrasies: Johann Strauss (Human & Rousseau, R160)

Hallo, maatjies, my naam is Bennie en ek ken al die stories. Hier in my tonnelhuisie diep onder die grond het ek rakke en rakke vol storieboeke.

Maatjies, ek is so ’n bietjie skaam, want my gunstelingboek waaroor ek vandag wil praat, is my eie. Dis Bennie Boekwurm Se Mooiste Sprokies.

Ja, dis my naam, maar dis nie regtig-egtig my boek nie. Tannie Louise Smit het dit geskryf.

Die storie wat sy vertel, is van eenkeer toe ek vir die kindertjies in die Wielie Walie-parkie sprokies gelees het waarvoor ek lief is.

Dis Die Drie Varkies, Jan en die Boontjierank, Hansie en Grietjie, Die Lelike Eendjie en Repelsteeltjie. As ’n mens eers een keer dié stories gehoor het, sal jy dit altyd onthou. Vra enige grootmens of hulle dié sprokies ken.

As jy al self kan lees, gaan jy nog meer van my sprokiesboek hou, want die letters is lekker groot om jou te help sien wat op elke bladsy geskryf staan. O goue blaar, my storie is klaar. –Bennie Boekwurm

WEN

Vyf lesers kan elk ’n eksemplaar van Bennie Boekwurm Se Mooiste Sprokies wen.

**SMS jou antwoord, naam, van en adres voor 9 Augustus om 17:00 na 35407.

Wat is Bennie se van?


Paddington

Deur Michael Bond; illustrasies: R.W. Alley (Protea Boekehuis, R195)

Die liewe wêreldberoemde beer het in 1958 die eerste keer in ’n kinderboek opgeduik toe hy heel verlore op Paddington-stasie in Engeland deur die Brown-gesin gevind is.

Nadat hulle hom aangeneem het, is hy Paddington Brown gedoop.

Hy kom eintlik uit Peru en sy enigste familie is sy tannie Lucy, vir wie hy briewe stuur na die Tehuis vir Afgetrede Bere in Lima.

Hy het ook ’n oom Pastuzo by wie hy sy hoed gekry het. Paddington praat verskeie tale, selfs Afrikaans, en in die boek is drie van sy stories: Paddington die Kunstenaar, Paddington in die Hospitaal en Paddington by die Dieretuin.

Hy besoek ’n buiteluguitstalling waar ’n skildery, Storm op See, hom so naar maak dat hy spyt kry hy het so ’n groot ontbyt geëet. In die volgende storie beland hy pote in die lug op die Browns se grasperk.

Hy’s so deurmekaar dat hy nie eens weet wat “broodjie” beteken toe mev. Brown hom een aanbied nie.

In die laaste storie vererg Paddington hom bloedig toe hy nie in die dieretuin toegelaat word nie omdat troeteldiere nie welkom is nie.

Hy’s mos deel van die Brown-gesin! Allawêreld, man.

Bak en Brou

Teks en illustrasies: Ellie Snowdon (Lapa, R125*). Uit Engels vertaal.

Jan-Daniël is lief vir bak: “Kaneelrolletjies, krummelrige brosbeskuit, karringmelkkoekies en sy gunsteling – sjokoladekoek.”

Die enigste probleem: Hy het niemand om dit mee te deel nie. Dan kry Jan-Daniël ’n brief waarin hy genooi word om aan die Hasie-Bak-En-Brou-kompetisie deel te neem.

Ag, en hy bak alte lekker; tot sy koekstruif kry die meeste wiebelpunte.

Maar hy het nie regtig net een probleem nie; hy het nog een, ’n grote: Jan-Daniël is nie ’n hasie nie; hy’s ’n wolf!

Klapper die drakie en die groot towenaar

Deur Ingo Siegner (Human & Rousseau, R130*). Uit Duits vertaal.

Klapper en Mathilda gaan soek sampioene in die woud toe hulle op so ’n snaakse toneel afkom dat hulle kliphard uitbars van die lag.

’n Boerbok sukkel hom dood om ’n bottel se kurkprop uit te trek. Hy vervies hom vieslik vir hulle, want sien, hy’s nie regtig ’n bok nie; hy’s die beroemde towenaar Rikus Ringkop wat deur die bose towenaar Bokbaard getoor is.

En hoekom wil hy die kurkprop uittrek? Want daarbinne is Bottelland, sy koninkryk.

Toe Klapper en Mathilda hul neuse styf teen die glas druk, sien hulle sowaar daar’s ’n hele piepklein landjie in die bottel.

Die nare towenaar Bokbaard het Rikus getoor, maar die ergste is dat Bokbaard hom getoor het dat hy soos Rikus lyk en nou in sy plek die land regeer.

Hulle besluit om die boerbok te help, maar hoe gaan hulle klein genoeg word om in die bottel te kom? En hoe gaan hulle weer uitkom?

Is Jy Bang In Die Bos, Pappa Wolf?

Teks en illustrasies: Jan De Kinder (Protea Boekhuis, R150). Uit Nederlands vertaal.

Waar het jy nou al gehoor van ’n wolf wat bang is vir ’n bos?

Maar Wolfie se pa is bitter bang vir alles wat kraak en vir brandnetels en die wind wat raas en iets wat kwaak.

Pappa Wolf begin sommer huil toe hy die maan sien, en toe hy iets vreemds ruik, draai hy om en hardloop weg sonder om ’n oomblik terug te kyk.

Dis eintlik Wolfie se maatjie, ’n meisie met ’n rooi band in die hare en ’n mandjie vol van die lekkerste piekniekkos vir hulle twee.

Hulle kan net giggel oor sy pa en haar ma wat vir mekaar bang is oor iets van lank, lank gelede. 

Kry dit hier

*Beskikbaar teen dié pryse by Takealot.com. Die pryse was korrek met druktyd en is onderworpe aan sonder voorafkennisgewing.

**Elke SMS kos R1,50. die borge is verantwoordelik vir die verskaffing van die boeke.