Biografiese rolprent.
Met Nicholas Hoult, Lily Collins, Colm Meaney.
Regisseur: Dome Karukoski.
13TG.

Waaroor gaan dit?

Nicholas Hoult, wat in About a Boy en Mad Max: Fury Road te sien was, vertolk die rol van die fantasieskrywer John Ronald Reuel Tolkien (1892-1973), bekend vir die boeke en rolprente The Hobbit en Lord of The Rings.

Die rolprent volg Tolkien se vroeë jare van vriendskap met ’n groep jong skrywers, sy ervarings tydens die Eerste Wêreldoorlog, sy hofmakery van sy vrou, Edith, en hoe dié belewenisse sy Middel Earth-boeke geïnspireer het.

Die Tolkien-familie het nie die vervaardiging van die rolprent goed­gekeur nie. Die ver­vaardigers se standpunt is dat dit Tolkien se lewe vier en sy werk en nalatenskap huldig.

Romanse vir die silwerdoek

Tolkien en Edith (Lily Collins, dogter van die Britse rocker Phil Collins), het mekaar ontmoet toe hulle in dieselfde losieshuis in Engeland gewoon het.

Hulle was albei weeskinders en het begin uitgaan toe hy 16 en sy 19 jaar oud was.

Tolkien se voog, die Rooms-Katolieke priester Francis Morgan (Colm Meaney, Miles O’Brien van Star Trek-faam), het ’n stokkie voor hul jong liefde gesteek. Hy het gevoel Edith gaan Tolkien se aandag van sy studie aflei en het hom verbied om met haar kontak te hê tot hy 21 was.

Op sy 21ste verjaardag het Tolkien aan Edith, wat reeds aan ’n ander man verloof was, ’n brief geskryf.

Hulle het afgespreek om mekaar te ontmoet en teen die einde van hul afspraak het Edith ingestem om met Tolkien te trou.

Op die paartjie se gedeelde grafsteen in Engeland staan die woorde “Beren” en “Lúthien” – ’n verwysing na die gedoemde paar wat in sy fiktiewe werke verenig word.

Het jy geweet?

Tolkien was die oudste seun van immigrante uit Birmingham, Engeland. Hy is in Bloem­fontein gebore waar sy pa, Arthur, bestuurder van die Bank of Africa was.

Op driejarige ouderdom het hy saam met sy ma, Mabel, en jonger broer, Hilary, familie in Engeland gaan besoek. Sy pa het gedurende hul wegbreek aan rumatiekkoors gesterf en is in Bloem­fontein begrawe.

Die gesin het nooit weer na Suid-Afrika teruggekeer nie.

Toe Tolkien 12 en Hilary 10 was, het Mabel weens diabetes gesterf en is die twee broers wees gelaat.

Dit lyk of die paar Afrikaanse sinne wat Tolkien in Bloemfontein by die gesin se Afrikaanse huiskneg geleer het, hom tot in sy volwasse jare bygebly het. Hy het jare later aangeteken: “My cradle-tongue was English (with a dash of Afrikaans).”

Daar word gesê ’n ervaring waar hy as jong seun in Bloemfontein deur ’n bobbe­jaan­spinnekop gebyt is, het tot die groot en wrede spinnekoppe in sy boeke gelei.

Springmieliefeite
  • Tolkien en CS Lewis, bekend vir sy Narnia-verhale, was hegte vriende. Albei was deel van ’n informele literatuurgesel­skap aan die Universiteit van Oxford, bekend as die Inklings.
  • Hy het aan die Slag van die Somme, een van die bloedigste veldslae van die Eerste Wêreldoorlog, deelgeneem. Hy het hegte skrywersvriende in dié oorlog verloor.
  • Tolkien het op vier leer lees.
  • Hy het The Hobbit se eerste sin geskryf terwyl hy as Oxford-professor besig was om ’n student se eksamenvraestel te merk. ’n Vraag is onbeantwoord gelaat en Tolkien het op die skoon papier geskryf: “In ’n gat in die grond woon ’n hobbit.”
  • Dit was die begin van sy wêrelde van elwe, trolle, orcs en hobbits.
  • Behalwe dat dié taalweten­skaplike vaardig was in Engels, Latyns, Duits, Wallies, Fins en Grieks, het hy sommer vir die pret ver­skeie fiktiewe tale ?geskep, waarvan sommige deur die karakters in sy boeke gepraat word.
BRONNE: IMDB.COM, HUFFPOST.COM, REFINERY29.COM, MENTALFLOSS.COM, THEGUARDIAN.COM, J.R.R. TOLKIEN ENCYCLOPEDIA: SCHOLARSHIP AND CRITICAL ASSESSMENT
Kom neem deel aan die gesprek

Volg Huisgenoot op InstagramTwitterFacebookWhatsApp en teken gerus in op ons nuusbriewe.