Drama.
Met Vinette Ebrahim, June van Merch en Quanita Adams.
Regie: Amy Jephta.
13TGDV.

Waaroor gaan dit?

Die dood van hul pa het die Davids-­gesin geruk. Party sal sê dis ’n disfunksionele gesin, maar myns insiens is dit ’n doodgewone gesinsverhaal, want ons almal ken die storie van verlies en hard­nekkige en soms sinnelose spanning tussen broers.

Barakat bring die lens in fokus op ’n gesin wat tussen tale bid, kos maak en asemhaal. Die geluide van Arabies en Afrikaans wys ’n refrein van Suid-­Afrikaans-wees wat tot dusver baie in die skadu van die Afrikaanse rolprent­milieu was.

Die gesinsmatriarg Aisha Davids (Vinette Ebrahim) is ná haar man se dood weer verlief en besluit om ja te sê toe die nuwe liefde in haar lewe haar vra om te trou. Sy besluit om haar vier seuns oor Eid-oel-Fiter – die einde van die heilige maand van Ramadaan – in te lig oor dié nuwe ontwikkeling in haar lewe.

Vinette Ebrahim steel die kollig as die matriarg A
Vinette Ebrahim steel die kollig as die matriarg Aisha Davids. Foto: Instagram/barakatmovie

Die enigste vlieg in die salf is dat haar twee oud­stes ná hul pa se dood nie ooghare vir mekaar het nie. Dis net skindertonge wat die seuns toe eindelik almal onder valse voorwendsels onder een dak bymekaarkry toe dié bom bars.

Is dit die kyk werd?

Hierdie karaktergedrewe draaiboek, gepaard met sy uitmuntende akteurs – groot name soos Quanita Adams, Joey Rasdien en June van Merch – ontroer met geloofwaardige toneelspel.

Vinette en June van Merch in ’n toneel. Foto: Inst
Vinette en June van Merch in ’n toneel. Foto: Instagram/barakatmovie

Vinette skitter in die hoofrol en verdien applous vir die diepte waarmee sy dié rol takel.

“Barakah” beteken “seën” in Arabies, en in die Kaaps-Maleise kultuur is ’n barakat ’n papiersak gevul met koeke, vrugte en lekkergoed wat deur vriende en bure gedeel word.

Danny Ross (links) en Joey Rasdien speel Zunaid en
Danny Ross (links) en Joey Rasdien speel Zunaid en Nur Davids. Foto: Indigenous Film Distribution

Springmieliefeit

Amy Jephta, wat in die regisseurstoel van Barakat sit, is ook die skrywer van die nuwe Afrikaanse neo-noir-moordraaiselreeks, Skemerdans, wat nou op Showmax gesien kan word.

In hierdie geval is Barakat ’n dapper gesinsfliek in die tyd waarin rolprente uit die puin moet terugveg ná ’n verwoestende pandemie.

Al is die teks plek-plek voorspelbaar, is dit ’n fliek wat jou op ’n reis van selfondersoek neem en kykers deur ’n maalkolk van emosies begelei en jou laat lag, huil en van glimlag stil laat raak.

Die Davids-broers kom nie oor die weg nie. Foto: Indigenous Film Distribution
Bonnie Mbuli (links), Quanita Adams en Joey in ’n
Bonnie Mbuli (links), Quanita Adams en Joey in ’n toneel uit die fliek. Foto: Indigenous Film Distribution

Dié Barakat is meer as ’n wegneempakkie; dit is ’n seën. 

Kom neem deel aan die gesprek

Volg Huisgenoot op Facebook, Twitter, Instagram en TikTok, en teken gerus in op ons nuusbriewe.